Ema Samita

8–14 Mati.

Mataupu Faavae ma Feagaiga 23-26

“Faamalosi le Ekalesia.”

Ae lei faitauina lenei otootoga, faitau le Mataupu Faavae ma Feagaiga 23-26) ma mafaufau loloto i mataupu faavae e te manatu o le a faamalosia tagata o lau vasega. Ona mafaufau lea i punaoa o le a fesoasoani ia te oe e aoao atu ai, e aofia ai na o loo fautuaina mai i lenei otootoga.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

O a faamanuiaga ua tatou maua a o tatou “tuu atu lo [tatou] taimi i le suesue i tusitusiga paia”? (Mataupu Faavae ma Feagaiga 26:1). Na faapefea ona tatou lagonaina le Agaga i totonu o tatou aiga? Atonu e mafai e tagata o le vasega ona faasoa mai pe na faapefea ona latou faatoilalo faafitauli po o faatosinaga ae tuuto atu le taimi i suesuega patino pe faaleaiga o tusitusiga paia.

aikona o le aoao atu

Aoao Atu le Aoaoga Faavae

Mataupu Faavae ma Feagaiga 23-26

E mafai ona tatou faamalosia uma le Ekalesia.

• Atonu e te manao e suesue ma tagata o le vasega le uiga o le “apoapoai atu i le Ekalesia” (Mataupu Faavae ma Feagaiga 25:7). Atonu e mafai e se tasi ona faasoa mai ni faamatalaga o le lomifefiloi (dictionary) o le apoapoai po o faataitaiga o apoapoaiga na latou vaaia. O a ni avanoa ua tatou maua e apoapoai ai le tasi ma le isi? E faapefea e lenei mea ona faamalosia le Ekalesia? O a nisi mea tatou te aoao i le Mataupu Faavae ma Feagaiga 23-26 e mafai ona fesoasoani ia i tatou e faamalosia ai le Ekalesia? E mafai foi ona e talanoaina pe faapefea ona faaaoga nei mataupu faavae e faamalosia ai o tatou aiga. Ina ia faaaoga nei mataupu faavae i a tatou taumafaiga i auaunaga, e mafai ona e iloiloina vaega o le savali a Sister Bonnie H. Cordon “Avea ma se Leoleo Mamoe” (Ensign po o le Liahona, Nov. 2018, 74–76).

Mataupu Faavae ma Feagaiga 24

E mafai e le Faaola ona sii i tatou “i fafo o [tatou] puapuaga.”

• O le faaaliga i le Mataupu Faavae ma Feagaiga 24 na tuuina mai e “faamalosi, faalototele, ma faatonu” ai Iosefa ma Oliva i se taimi o tofotofoga (Mataupu Faavae ma Feagaiga 24, ulutala o le vaega; tagai foi Au Paia, 1:94–96). E mafai ona e valaaulia le vasega e sue i lenei vaega mo faamaoniga na silafia e le Alii ia Iosefa ma lona tulaga. Na faapefea ona tali mai le Alii i manaoga o Iosefa? E faapefea ona Ia faia foi lea lava mea mo i tatou i le aso. Mafaufau e valaaulia le vasega e faasoa mai ni aafiaga ina ua latou lagonaina na silafia e le Alii o latou tulaga patino ma na sii i latou i luga i o latou puapuaga.

  O Iesu Keriso o loo faamaloloina tagata

  Sa Ia Faamaloloina le Tele o Faama’i Eseese, saunia e J.Kirk Richards

Mataupu Faavae ma Feagaiga 25

O Ema Samita o se “tamaitai filifilia”

• Ina ia fesoasoani i tagata o le vasega e maua faaaliga patino i le faaaliga a le Alii ia Ema Samita, mafaufau e fai lenei gaoioiga: Fai i le afa o le vasega e sue le vaega 25 mo mea na fai atu le Alii ia Ema e fai, ma fai i le isi afa e sue mea na Ia folafola atu o le a Ia faia. Valaaulia i latou e lisi mea na latou maua ma faasoa mai i le tasi ma le isi. E mafai e ni nai tagata o le vasega ona faasoa mai mataupu faavae e faapitoa lava le taua ia i latou.

• O a upu ma fuaitau i le vaega 25 e lagolagoina le folafolaga a le Alii ia Ema Samita, “O oe o se tamaitai filifilia”? (fuaiupu 3). E mafai foi e tagata o le vasega ona talanoaina pe na faapefea ona soifua Ema i mataupu faavae i lenei faaaliga. O ni punaoa aoga e aofia ai le vitio “An Elect Lady” (ChurchofJesusChrist.org), “Thou Art an Elect Lady” (Revelations in Context, 33–39), ma le “Voices of the Restoration” i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga.

• E tusa ai ma le Mataupu Faavae ma Feagaiga 25:11–12, o a lagona o le Alii e uiga i musika paia? Atonu e mafai e le vasega ona talanoaina auala e faaaoga ai viiga e valaaulia ai le Agaga i totonu o latou aiga.

Mataupu Faavae ma Feagaiga 25:5, 14

E tatau ona tatou saili “le agaga o le agamalu.”

• Na fautuaina e le Alii ia Ema e “tumau pea i le agaga o le agamalu.” (Mataupu Faavae ma Feagaiga 25:14; tagai foi fuaiupu 5). Ina ia sailia le uiga o lenei vaega, e mafai ona e tusia le Agamalu i le laupapa ma valaaulia le vasega e tusi i talaane pe o le a le mea latou te mafaufau i ai ona o lena upu. Ona mafai lea ona latou sue le vaega 25 mo upu ma fuaitau latou te lagonaina e fesootai i le agamalu ona faasoa mai lea o mea na latou maua. Mafaufau e faasoa le saunoaga a Elder David A. Bednar i le “Punaoa Faaopoopo.” Aisea e taua ai le agamalu?

Mataupu Faavae ma Feagaiga 25:10, 13

E tatau ona tatou saili mo mea o se lalolagi e sili atu.

• Ina ia fesoasoani i tagata o le vasega e faaaoga le fautuaga a le Alii ia “tuu ese mea o lenei lalolagi, ma saili mo mea o se lalolagi sili atu ona lelei” (Mataupu Faavae ma Feagaiga 25:10)), e mafai ona e fai ia i latou e lisi faataitaiga o “mea o lenei lalolagi” ma faataitaiga o “mea o se [lalolagi] sili atu ona lelei.” O le a se fautuaga e mafai ona tatou fefaasoaai i le tasi ma le isi e taulai atu i mea e faavavau? E faapefea ona fesootai le fautuaga i le fuaiupu 13 i lenei sini?

aikona o punaoa faaopoopo

Punaoa Faaopoopo

O le agamalu o le malosi lea.

Na faamatala mai e Elder David A. Bednar: “O le uiga auau mama FaaKeriso o le agamalu e tele ina malamalama sese i ai lo tatou lalolagi i nei aso. O le agamalu e malosi, e le vaivai; e mataalia, e mataala; lototele, e le popolevale; e loto pulea, e le soona fai; e tauagafau, e le faasausili; ma agaalofa, ae le amio pa’a’a. O se tagata agamalu e le faaitagofie, e le faafoliga, pe faafefeteina ma e vave ona faamamalu i ausiaga a isi tagata.” (“Agamalu ma Maualalo i le Loto,” Ensign po o le Liahona, Me 2018, 32).

Faaleleia o Lo Tatou Aoao Atu

Molimau atu i faamanuiaga ua folafola mai. A e valaaulia tagata o le vasega e ola i mea ua latou aoaoina, molimau atu i faamanuiaga ua folafola mai e le Atua (tagai Aoao Atu i le Ala a le Faaola, 35).