Iosefa Samita

15–21 Mati

Mataupu Faavae ma Feagaiga 27-28

“E tatau Ona Faia Mea Uma i le Faatulagaga Tatau”

E ui lava o mea na tutupu na afua ai faaaliga i le Mataupu Faavae ma Feagaiga 27-28 na tutupu i se taimi ma se nofoaga ese, o mataupu faavae ua aoaoina i nei vaega e faatatau i aso nei. O a mataupu faavae e ono faamanuiaina ai tagata o lau vasega i tulaga o latou feagai?

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Tuu atu i tagata o le vasega ni nai minute e iloilo ai le Mataupu Faavae ma Feagaiga 27-28 ma sue se fuaiupu po o se fuaitau e taua ia i latou. Ina ia tuu atu i tagata uma se avanoa e faasoa mai, e mafai ona e vaevae tagata o le vasega i ni paga e faasoa mai ni mea sa latou maua.

aikona o le aoao atu

Aoao Atu le Aoaoga Faavae

Mataupu Faavae ma Feagaiga 27:1–2

E tatau ona tatou tagofia le faamanatuga faatasi ma se manatu tasi i le mamalu o le Atua.

• Ina ia uunaia le talanoaga e uiga i le Mataupu Faavae ma Feagaiga 27:1–2, mafaufau e tusi se fesili faapea i le laupapa: o a mea na aoaoina ai i tatou e le Faaola e uiga i le faamoemoega o le faamanatuga? E mafai e tagata o le vasega ona vaai mo fuaitau i nei fuaiupu e fesoasoani ia i latou e tali ai le fesili. Atonu latou te naunau e faasoa mai ni uunaiga na latou maua e uiga i le ala e maua ai se aafiaga e sili atu le paia pe a aai ma feinu i le faamanatuga.

  E mafai ona maua e tagata o le vasega nisi manatu e ala i le faitauina o mea na fai mai ai le Faaola ina ua Ia faatoa faia le faamanatuga (tagai Luka 22:19–20; 3 Nifae 18:1–11; tagai foi i le vitio “The Last Supper” i le ChurchofJesusChrist.org). Ana i ai le Faaola i la tatou sauniga faamanatuga, o le a se mea semanu e ese tatou te faia?

  falaoa ma le ipu o le faamanatuga

  O le faamanatuga o loo i ai ni faatusa o le taulaga a le Faaola.

Mataupu Faavae ma Feagaiga 27:15–18

O le ofutau o le Atua e fesoasoani e puipui i tatou mai le tiapolo.

• E mafai faapefea ona e fesoasoani i tagata o le vasega ia malamalama pe faapefea ona faaaoga le ofutau a le Atua e tetee ai le tiapolo i o tatou aso? Mafaufau e fai i se tasi e tusi i luga o le laupapa le ofutau o loo i fuaiupu 15–18. E mafai e tagata o le vasega ona faasoa mai ni manatu na latou maua i a latou suesuega faaletagata lava ia e uiga i vaega o le ofutau. Pe mafai foi e le vasega ona faitau le Mataupu Faavae ma Feagaiga 27:15–18 ma faaigoa vaega o le ofutau i le laupapa ma vaega o le tino latou te puipuia. O le a le uiga o le fai o ofutau a le Atua? Atonu e mafai e tagata o le vasega ona talanoa pe faapefea ona puipuia tatou e le Alii mai le tiapolo pe a tatou faia le ofutau o le Atua?

• Afai e te faiaoga i le autalavou, atonu e te manao e fesootai i le Mataupu Faavae ma Feagaiga 27:15–18 ma tulaga faatonuina i le Mo le Malosi o le Au Talavou. Mo se faataitaiga, e mafai e tagata o le vasega ona faitau fuaiupu ma talanoaina pe aisea tatou te manaomia ai le ofutau o le Atua. E mafai ona latou galulue i paga ma iloilo se tasi o tulaga faatonuina i le Mo le Malosi o le Au Talavou. O a ni mea ua tatou aoaoina mai i nei punaoa e uiga i osofaiga a Satani e faasaga ia i tatou? E mafai faapefea e le ofutau o le Atua ona fesoasoani ia i tatou e tatalia nei osofaiga? E mafai faapefea ona tatou ofuina Lana ofutau?

Mataupu Faavae ma Feagaiga 28

E maua e le perofeta soifua faaaliga mo le Ekalesia a le Alii.

• Ina ia fesoasoani i tagata o le vasega e aoao e uiga i le matafaioi a le perofeta, e mafai ona outou iloiloina le aafiaga na taitai atu ai Iosefa Samita e tatalo ma maua ai le vaega 28 (vaai i le ulutala o le vaega), ona faitau lea o fuaiupu 2–3, 6–7, 11–13. E faapefea ona taumafai Satani e uunai i tatou ia mulimuli i tagata e lei filifilia e le Alii? E mafai ona e valaaulia tagata o le vasega e faasoa mai ni aafiaga na faamalosia ai a latou molimau faapea o le perofeta e mauaina faaaliga mo le Ekalesia.

• O se tasi ala mo tagata o le vasega e iloilo ai le Mataupu Faavae ma Feagaiga 28 o le mafaufau faapea latou te iloaina se tasi na mauaina talu ai nei se valaauga fou i le Ekalesia. O a ni mea e mafai ona tatou faasoa mai le Mataupu Faavae ma Feagaiga 28:1-6, 13-16 e fesoasoani i lena tagata i lona valaauga? O le upusii i le “Punaoa Faaopoopo” e mafai ona faaopoopoina ni manatu i le talanoaga.

aikona o punaoa faaopoopo

Punaoa Faaopoopo

Fautuaga i faaaliga patino.

Na aoao mai Peresitene Iosefa F. Samita ma ona fesoasoani i le Au Peresitene Sili e faapea:

“Pe a auina mai e ni faaaliga, miti, gagana, valoaga, uunaiga pe soo se meaalofa po o se uunaiga ese se mea e le tusa ai ma faaaliga ua taliaina e le Ekalesia pe ese mai filifiliga a ona taitai tofia, e mafai ona iloa e le Au Paia e le mai le Atua, e tusa lava po o le a le foliga sao. … I mataupu masani ma faaleagaga, e mafai ona maua e le Au Paia le taitaiga ma faaaliga Mamana e aafia ai i latou lava, ae e le tuuina atu ai le pule e taitaia ai isi. …

“Ua faamaumauina e le talafaasolopito o le Ekalesia le tele o faaaliga faafoliga na maua e tagata taufaasese ma tagata o le malo na talitonu i faaaliga na latou sailia e taitai ai isi tagata ia taliaina, ma i soo se tulaga lava, na le fiafia, faanoanoa ma na taunuu i ni faafitauli mai ia i latou” (Joseph F. Smith, Anthon H. Lund, Charles W. Penrose, “A Warning Voice,” Improvement Era, Sept. 1913, 1148–49).

Faaleleia o Lo Tatou Aoao Atu

Taulai i aoaoga faavae moni. Na aoao mai Peresitene Boyd K. Packer, “O aoaoga faavae moni, a malamalama i ai, e suia ai uiga faaalia ma amioga” (“Aua le Fefe,” Ensign po o le Liahona, Me 2004, 79). Ao tatou aoao atu, e tatau ona tatou taulai atu i aoaoga a Iesu Keriso pe a tatou mananao e aumaia agaga ia te Ia.