15–21 Maj

Doktrin mo Ol Kavenan 27–28

“Evri Samting, Oli Mas Mekem long Oda”

I nomata we ol samting we oli bin hapen, we i mekem se ol revelesen we oli kamaot insaed long Doktrin mo Ol Kavenan 27–28 oli bin hapen long wan defren taem mo ples, olgeta prinsipol we oli tijim insaed long ol seksen ia, i stret blong taem blong yumi tedei. ?Wanem prinsipol nao i save blesem ol memba blong klas blong yu long ol situesen we oli stap fesem?

Raetemdaon Ol Filing mo Tingting blong Yu

Invaetem Ol Man blong Serem Wanem Oli Gat

Givim sam minit long ol memba blong klas blong luklukbak long Doktrin mo Ol Kavenan 27–28 mo faenem wan ves o sentens we oli faenem se i gat mining. Blong givim long evriwan wan janis blong serem samting, yu save serem ol memba blong klas blong oli sidaon tutu, mo oli serem wanem we oli bin faenem.

Stap Tijim Doktrin

Doktrin mo Ol Kavenan 27:1–2

Yumi mas tekem sakramen wetem wan ae we i lukluk nomo long glori blong God.

• Blong leftemap tingting blong tekpat long toktok abaot Doktrin mo Ol Kavenan 27:1–2, tingting blong raetem wan kwestin olsem hemia, antap long bod: ?Wanem nao Sevya i stap tijim yumi abaot stamba tingting blong sakramen? Ol memba blong klas oli save lukaotem ol sentens long ol ves ia we bae i helpem olgeta blong oli ansarem kwestin ia. Maet bae oli glad blong serem sam tingting we oli bin kasem abaot wei blong gat moa tabu eksperiens taem we oli stap tekem mo kakae sakramen.

  Ol memba blong klas oli save faenem sam niu tingting taem oli ridim wanem we Sevya i bin talem taem Hem i statem sakramen (luk long Luk 22:19–20; 3 Nifae 18:1–11; luk tu long vidio ia, “The Last Supper” we i stap long ChurchofJesusChrist.org). Sapos Sevya i stap wetem yumi long sakramen miting blong yumi, ?wanem nao bae yumi mekem i defren?

  

  Sakramen, hem i tekem ol simbol blong sakrifaes blong Sevya.

Doktrin mo Ol Kavenan 27:15–18

Klos blong faet blong God bae i helpem yumi blong stanap agensem ivel.

• ?Olsem wanem nao yu save helpem ol memba blong klas blong andastanem olsem wanem blong yusum klos blong faet blong God blong save stanap agensem ivel blong taem blong tedei? Tingting blong askem wan blong dro long bod, klos blong faet ia we oli tokbaot long ol ves 15–18. Afta, ol memba blong klas oli save serem eni niu tingting we oli faenem long taem blong stadi blong olgetawan abaot ol defren pis blong klos ia blong faet. O, klas i save ridim Doktrin mo Ol Kavenan 27:15–18 mo raetem nem blong ol pis blong klos blong faet antap long bod, mo tu, ol defren pat blong bodi we oli stap protektem. ?Hem i minim wanem blong werem klos blong faet blong God? Maet samfala memba blong klas oli save tokbaot olsem wanem nao Lod i stap protektem yumi long ivel taem yumi werem klos blong faet blong God.

• Sapos yu stap tijim olgeta yut, maet bae yu wantem joenem Doktrin mo Ol Kavenan 27:15–18 wetem ol standet we oli stap insaed long Blong Ol Yut Oli Kam Strong. Eksampol. Ol memba blong klas oli save ridim ol ves mo toktok raon long risen from wanem yumi nidim klos blong faet blong God. Nao bae oli save wok tutu mo luklukbak long wan long ol standet insaed long smol buk ia, Blong Ol Yut Oli Kam Strong. ?Wanem nao yumi lanem aot long ol defren ples ia abaot ol atak blong Setan agensem yumi? ?Olsem wanem nao klos blong faet blong God i helpem yumi blong stanap agensem ol atak ia? ?Olsem wanem nao yumi save werem klos blong faet blong God?

Doktrin mo Ol Kavenan 28

Profet we i stap laef i stap kasem revelesen long saed blong ol samting blong Jos blong Lod.

• Blong helpem ol memba blong klas blong lanem abaot rol blong profet, yu save luklukbak long eksperiens we i lidim Josef Smit blong prea mo kasem seksen 28 (luk long seksen heding), mo afta, yufala i save ridim ol ves 2–3, 6–7, 11–13. ?Olsem wanem nao Setan i stap traem blong winim tingting blong yumi blong folem olgeta we Lod i no jusum olgeta? Maet yu save invaetem ol memba blong klas blong serem ol eksperiens we i bin mekem testemoni blong olgeta i kam strong moa, se i tru se, profet i stap kasem revelesen long saed blong Jos.

• Wan wei blong ol memba blong klas oli luklukbak long Doktrin mo Ol Kavenan 28, hem i blong traem tingting long maen blong olgeta se oli save wan we i jes kasem wan niu koling insaed long Jos. ?Wanem nao bae yumi save serem aot long Doktrin mo Ol Kavenan 28:1–6, 13–16 blong helpem man o woman ia long koling blong hem? Kwot insaed long “Sam Moa Risos” i save givim sam niu tingting long taem blong toktok insaed long klas.

Sam Moa Risos

Kaonsel abaot revelesen we i blong yuwan.

Presiden Josef F. Smit mo tufala kaonsela blong hem long Fas Presidensi i bin tijim se:

“Taem ol visen, ol drim, ol lanwis, profesi, tingting blong maen, o eni nara bigfala presen o insperesen, i talem wan samting we i no go nating wetem ol revelesen we oli akseptem insaed long Jos, o i agensem ol desisen blong ol atoriti blong Jos, nao bae ol Lata-dei Sent oli save se hemia i no kam long God, i nomata se oli luk se i gud hamas. … Long saed blong ol samting blong wol ia mo ol samting long saed blong spirit, Ol Sent oli save kasem daereksen mo revelesen we i kam long heven from ol samting we i blong laef blong olgetawan, be hemia i no minim se oli save yusum blong daerektem ol narawan. …

“Histri blong Jos i rekodem se i gat plante toktok we oli talem se oli ol revelesen, we ol giaman man oli talem, from oli bilivim ol samting we oli bin lukaotem blong lidim ol nara man blong akseptem, mo long evri taem, i bin en wetem harem nogud long tingting, harem nogud long filing, mo prapa nogud samting i hapen” (Joseph F. Smith, Anthon H. Lund, Charles W. Penrose, “A Warning Voice,” Improvement Era, Sept. 1913, 1148–49).

Stap Kam Antap long Fasin blong Yumi blong Stap Tij

Lukluk nomo long tru doktrin. Presiden Boyd K. Packer i bin tijim: “Tru doktrin, taem oli andastanem, i jenisim ol fasin mo ol aksen.” (“Do Not Fear,” Ensign o Liahona, May 2004, 79). Taem yumi stap tij, yumi mas lukluk nomo long ol tijing blong Jisas Kraes sapos yumi wantem blong help blong tekem sol blong ol man i go long Hem.