Hom blong Pita Witma, i kam long Al Rounds

1–7 Maj

Doktrin mo Ol Kavenan 20–22

“Jos Ia blong Kraes I Stanap”

Raetemdaon ol filing blong yu we oli kam long saed blong spirit taem yu stap stadi long Doktrin mo Ol Kavenan 20–22. Sam long ol filing ia oli save lidim yu i go long ol aedia we bae i helpem yu taem bae yu stap tij.

Raetemdaon Ol Filing mo Tingting blong Yu

Invaetem Ol Man blong Serem Wanem Oli Gat

Long taem blong stadi blong olgeta long hom, maet ol memba blong klas oli kasem sam niu tingting abaot ol blesing blong stap gat tru Jos ia i stap long wol. Invaetem olgeta blong serem sam ves long ol seksen ia we i soemaot from wanem oli talem tangkyu from Lod i bin putumbak Jos ia.

Stap Tijim Doktrin

Doktrin mo Ol Kavenan 20–21

Lod i putumbak Jos Ia blong Jisas Kraes.

• Ol memba blong klas oli save lanem samting taem oli stap stadi long wanem i semmak bitwin Jos Ia blong Jisas Kraes blong Ol Lata-dei Sent mo Jos we Kraes i bin stanemap long taem bifo. Yu save droem wan jat antap long bod, wetem fofala kolom, we taetol blong wanwan i Doktrin, Ol Odinens, Prishud Atoriti, mo Ol Profet. Yu save givim olgeta refrens ia abaot Jos blong Kraes long taem blong bifo: Matiu 16:15–19; Jon 7:16–17; Efesas 2:19–22; 3 Nifae 11:23–26; Moronae 4–5. Ol memba blong klas oli save serem wanem wanwan skripja ia i tijim abaot Jos blong Kraes, mo raetem refrens long stret kolom long bod. (Maet sam refrens i save go long moa long wan kolom.) Oli save mekem semmak wetem olgeta refrens ia abaot Jos Ia blong Kraes we oli putumbak: Doktrin mo Ol Kavenan 20:17–25, 60, 72–79; 21:1–2. ?Wanem nao yu lanem abaot taem ia blong putumbak Jos Ia blong Kraes, taem yu komperem tufala samting ia?

Doktrin mo Ol Kavenan 20:37, 75–79; 22

Ol tabu odinens oli helpem yumi blong kam olsem Sevya.

• Givim taem long ol memba blong klas blong stadi long ol samting we wan i mas mekem blong save kasem baptaes, olsem we oli tokbaot insaed long Doktrin mo Ol Kavenan 20:37, mo askem olgeta blong tingting hevi long ol kwestin olsem: ?Olsem wanem nao olgeta samting ia we yumi mas mekem i helpem yumi blong rere blong kasem baptaes insaed long Jos Ia blong Lod? ?Hem i minim wanem blong tekem nem blong Kraes long yumiwan bakegen? (luk long Mosaea 5:5–12). ?Wanem nao i helpem yu blong holemtaet “strong tingting blong givim seves long [Jisas Kraes] kasem en”?

• ?Wanem nao seksen 22 i stap tij abaot baptaes? Askem ol memba blong klas blong traem tingting se oli gat wan fren we i bin baptaes i go long wan nara jos. Oli save ridim seksen ia blong faenem sam advaes long wei blong helpem fren blong olgeta blong andastanem from wanem baptaes insaed long Jos ia blong Sevya, Jos ia we i bin kambak, hem i wan nid. Ol memba blong klas oli save mekem wan rol plei blong smol storian ia; oli save mekem olsem wan klas, o taem oli sidaon tutu.

• Ridim Doktrin mo Ol Kavenan 20:75–79 tugeta, mo invaetem ol memba blong klas blong tingting long wanem nao ol ves ia oli stap tij abaot Sevya mo paoa blong Hem insaed long laef blong olgeta. ?Wanem toktok o sentens nao i kamaot klia taem yumi stap ridim ol sakramen prea long wei ia? ?From wanem hem i impoten blong tekem mo kakae sakramen evri wik?

  

  Sakramen i wan tabu odinens.

Doktrin mo Ol Kavenan 20:38–60

Prishud seves i blesem ol memba blong Jos mo ol famli blong olgeta.

• Wanem oli talem abaot ol prishud diuti insaed long Doktrin mo Ol Kavenan 20:38–60 i save helpem ol memba blong klas blong yu blong oli mekem save blong olgeta i go moa abaot prishud seves. Mebi yu save invaetem olgeta blong traem tingting long maen blong olgeta se i gat wan fren o memba blong famli we i jes baptaes, mo oli stap rere blong odenem hem i go long wan prishud ofis. ?Olsem wanem nao bae oli save yusum ol ves ia blong helpem hem blong andastanem ol diuti blong hem? ?Wanem eksampol nao oli save serem blong save helpem hem blong andastanem olsem wanem we, taem hem i stap mekem olgeta diuti ia, i save helpem hem blong kam moa olsem Jisas Kraes? Maet oli save rolplei long storian ia.

  Antap long hemia,?olsem wanem nao oli save yusum olgeta ves ia blong helpem wan sista we i jes baptaes blong hem i luk wei we hem i save tekpat long wok we oli tokbaot long ples ia? (Toktok we i stap long “Sam Moa Risos,” i save help.)

Doktrin mo Ol Kavenan 21:4–7

Yumi gat blesing taem yumi stap kasem toktok blong Lod tru long profet blong Hem.

• Insaed long Doktrin mo Ol Kavenan 21 i gat ol toktok we i gat paoa long ol, abaot fasin blong stap folem profet blong Lod. Blong helpem ol memba blong klas blong tingting hevi mo toktok raon long olgeta toktok ia, askem olgeta blong luklukgud insaed long ol ves 4 kasem 7 blong faenem wan sentens we oli wantem blong andastanem i gud moa, mo blong oli raetem sentens ia antap long bod. Jusum samfala long ol sentens ia, mo toktok raon long olgeta olsem wan klas, abaot mining blong olgeta. ?Wanem nao ol sentens ia oli stap tijim yumi abaot fasin blong stap folem profet blong Lod?

Sam Moa Risos

Yumi evriwan i wok wetem prishud paoa.

“Ol man, oli odenem olgeta long ol ofis blong prishud, be tugeta, ol woman mo ol man, oli stap invaetem olgeta blong gat eksperiens long paoa mo ol blesing blong prishud insaed long laef blong olgeta.

“… [Ol woman] oli stap prij mo stap prea insaed long ol kongregesen, oli holem plante posisen blong lidasip mo seves, oli tekpat long ol prishud kaonsel long lokol mo jeneral level, mo oli givim seves long ol misin blong misinari wok raon long wol. Long olgeta wei ia, mo long sam narafala wei bakegen, ol woman oli yusum prishud atoriti, iven taem we oli no odenem olgeta i go long wan ofis blong prishud. …

“ … Long ol eklesiastik koling, ol tempol odinens, ol famli rilesensip, mo long ol kwaet seves blong wanwan, ol Lata-dei Sent woman mo man oli go fored wetem prishud paoa mo atoriti. Fasin ia blong man mo woman i dipdipen long wanwan long olgeta blong mekem wok blong God i kamtru tru long paoa blong Hem, i stap long stamba blong gospel blong Jisas Kraes” (Gospel Topik, “Joseph Smith’s Teachings about Priesthood, Tempol, Woman,” topics.ChurchofJesusChrist.org).

Stap Kam Antap long Fasin blong Yumi blong Stap Tij

Yumi stap lan tugeta. Olsem wan tija, yu stap lan wetem haf blong klas we i stap. Soem we yu yu wantem blong lanem samting aot long olgeta taem yu stap lisin long ol tingting blong olgeta.