8–14 Maj

Doktrin mo Ol Kavenan 23–26

“Mekem Jos I Kam Strong Moa”

Bifo yu ridim aotlaen ia, ridim Doktrin mo Ol Kavenan 23–26 mo tingting hevi long olgeta prinsipol we yu filim se bae i mekem ol memba blong klas blong yu oli kam strong moa. Afta, tingting long wanem risos nao bae i helpem yu blong tij, wetem olgeta ia we oli putum i stap long aotlaen ia.

Raetemdaon Ol Filing mo Tingting blong Yu

Invaetem Ol Man blong Serem Wanem Oli Gat

?Wanem blesing nao yumi bin gat taem yumi “letem taem blong yumi i go blong stap stadi long ol skripja”? (Doktrin mo Ol Kavenan 26:1). ?Olsem wanem nao yumi bin stap filim Spirit insaed long hom blong yumi? Maet ol memba blong klas blong oli save serem olsem wanem oli bin winim ol samting we oli kam blokem rod o oli kam pulumaot tingting blong putum taem blong skripja stadi blong olgetawan mo blong famli.

Stap Tijim Doktrin

Doktrin mo Ol Kavenan 23–26

Yumi evriwan i save mekem Jos i kam strong moa.

• Maet yu wantem blong lukluk, wetem ol memba blong klas, se i minim wanem blong “askem strong long Jos” (Doktrin mo Ol Kavenan 25:7). Mebi wan i save serem ol mining long diksonari blong toktok ia, exhort (askem strong) o ol eksampol blong fasin blong askem strong, be oli bin luk. ?Wanem janis i stap blong yumi save askem strong samting long wanwan long yumi?” ?Olsem wanem nao hemia i mekem Jos i kam strong moa? ?Wanem moa yumi lanem insaed long Doktrin mo Ol Kavenan 23–26 we i save helpem yumi blong mekem Jos i kam strong moa? Yu save tokbaot tu olsem wanem yumi save yusum tu olgeta prinsipol ia blong mekem hom blong yumi i kam strong moa. Blong yusum olgeta prinsipol ia insaed long ol traehad blong yumi blong givhan, yufala i save luklukbak long samfala pat blong mesej blong Sista Bonnie H. Cordon “Kam Wan Man blong Lukaot long Sipsip”” (Ensign o Liahona, Nov 2018, 74–76).

Doktrin mo Ol Kavenan 24

Sevya i save leftemap yumi “blong tekemaot [yumi] long ol hadtaem blong [yumi].”

• Revelesen we i stap long Doktrin mo Ol Kavenan 24, God i bin givim blong mekem Josef mo Oliva “i kam strong moa, blong leftemap tingting mo givim instraksen” long tufala long taem blong wan hadtaem (Doktrin mo Ol Kavenan 24, seksen heding; luk tu long Saints, 1:94–96). Yu save invaetem klas blong luklukgud insaed long seksen ia blong faenem sam pruf we Lod i bin save abaot Josef mo situesen blong hem. ?Olsem wanem nao Lod i lukluk long ol nid blong Josef? ?Olsem wanem nao Hem i mekem sem samting long yumi tedei? Tingting blong askem ol memba blong klas blong oli serem ol eksperiens blong wan taem we oli bin filim se Lod i bin save abaot situesen blong olgetawan mo i bin leftemap olgeta long taem blong hadtaem blong olgeta.

  

  Hem i Hilim Plante Kaen Sik, i kam long J.Kirk Richards

Doktrin mo Ol Kavenan 25

Ema Smit i “wan woman we Lod i jusum.”

• Blong helpem ol memba blong klas blong faenem se revelesen blong Lod long Ema Smit, bae i helpem olgeta, nao tingting long aktiviti ia: Askem haf blong klas blong luklukgud insaed long seksen 25 blong faenem ol samting we Lod i bin askem long Ema blong mekem, mo askem nara haf blong lukaotem ol samting we Lod i bin promesem se bae Hem i mekem. Invaetem olgeta blong mekem wan lis blong wanem oli faenem mo serem wetem wanwan long olgeta. Samfala memba blong klas oli save serem ol prinsipol we i gat bigfala mining long olgeta.

• ?Wanem toktok o sentens insaed long seksen 25 i sapotem toktok blong Lod long Ema Smit: “Yu, yu wan woman we Lod i jusum”? (ves 3). Ol memba blong klas oli save toktok raon long wei we Ema i bin laef folem olgeta prinsipol ia insaed long revelesen. Ol risos we oli help oli vidio ia: “An Elect Lady” (ChurchofJesusChrist.org), “Thou Art an Elect Lady” (Ol revelesen insaed long histri ia, 33–39), mo “Voices of the Restoration” insaed long aotlaen blong wik ia insaed long Kam Folem Mi—Blong Wanwan Man, Woman mo Famli.

• Folem wanem we i stap insaed long Doktrin mo Ol Kavenan 25:11–12, ?olsem wanem nao Lod i stap filim abaot tabu miusik? Maet klas ia i save toktok raon long ol wei blong yusum ol hym blong save invaetem Spirit i kam insaed long ol hom blong yumi.

Doktrin mo Ol Kavenan 25:5, 14

Yumi mas lukaotem blong gat “spirit blong no stap flas.”

• Lod i givim advaes long Ema blong “gohed wetem spirit blong no stap flas” (Doktrin mo Ol Kavenan 25:14; luk tu long ves 5). Blong lukluk moa se hemia i minim wanem, yu save raetem Fasin blong No Stap Flas antap long bod, mo invaetem ol memba blong klas blong raet long saed blong hem, se toktok ia i stap mekem olgeta oli tingting long wanem. Afta, oli save luklukgud insaed long seksen 25 blong faenem ol toktok mo ol sentens we oli filim se i go wetem fasin blong no stap flas, mo afta, serem wanem oli faenem. Tingting blong serem toktok blong Elda David A. Bednar we i stap long “Sam Moa Risos.” ?From wanem hem i impoten blong no stap flas?

Doktrin mo Ol Kavenan 25:10, 13

Yumi mas lukaotem ol samting blong wan wol we i moa gud.

• Blong helpem ol memba blong klas blong yusum advaes ia blong Lod, blong “livim ol samting blong wol ia oli stap long saed, mo yu yu lukaotem ol samting blong wan wol we i moa gud” (Doktrin mo Ol Kavenan 25:10), yu save askem olgeta blong oli mekem wan lis blong ol eksampol blong “ol samting blong wol ia,” mo wan lis blong ol eksampol blong “ol samting blong wan wol we i moa gud.” ?Wanem advaes yumi save serem wetem wanwan long yumi blong helhelpem yumi blong lukluk nomo long ol samting we oli no save finis? ?Olsem wanem advaes ia insaed long ves 13 i go wetem gol ia?

Sam Moa Risos

Fasin blong no stap flas, hem i paoa.

Elda David A. Bednar i eksplenem: “Kwaliti ia blong Kraes, blong no stap flas, plante taem, man i no andastanem long wol blong yumi tedei. Fasin blong no stap flas i blong stap strong, i no blong stap slak; i blong tekem aksen, i no blong stap nating; i blong gat strong paoa long tingting, i no blong stap kwaet; i blong holembak yuwan, i no blong bosta; i blong yu no soemaot yu, i no blong tokbaot bigwan yu; mo i blong toktok kaen, i no blong tok strong tumas. Wan we i no stap flas, bae man i no save mekem hem i kros kwik, i no stap soemaot hem o toktok bigwan, be i rere blong luksave wok blong ol narafala man.” (“Hem I No Stap Flas mo Tingting blong Hat blong Hem I Stap Daon,” Liahona, Mei 2018, 30).

Stap Kam Antap long Fasin blong Yumi blong Stap Tij

Testifae abaot ol blesing we Hem i promesem. Taem yu invaetem ol memba blong klas blong tekem aksen folem wanem we oli stap lanem, testifae abaot ol blesing we God i bin promesem (luk long Teaching in the Savior’s Way, 35).