Marso 15–21

Doktrina ug mga Pakigsaad 27–28

“Ang Tanan nga mga Butang Kinahanglan Gayud Himoon sa Kahusay”

Bisan tuod ang mga panghitabo nga nakaaghat sa mga pinadayag diha sa Doktrina ug mga Pakigsaad 27–28 nahitabo sa lahi nga panahon ug lugar, ang mga baruganan nga gitudlo niini nga mga seksyon magamit karon. Unsa nga mga baruganan ang tingali makapanalangin sa mga sakop sa imong klase sa mga sitwasyon nga ilang giatubang?

Irekord ang Imong mga Impresyon

Dapita ang Pagpaambit

Hatagi ang mga sakop sa klase og pipila ka minuto sa pagribyu sa Doktrina ug mga Pakigsaad 27–28 ug sa pagpangita og bersikulo o hugpong sa mga pulong nga makahuluganon kanila. Aron mahatagan ang tanan og oportunidad sa pagpaambit, mahimo nimong paris-parison ang mga sakop sa klase aron sa pagpaambit sa ilang nakit-an.

Itudlo ang Doktrina

Doktrina ug mga Pakigsaad 27:1–2

Kinahanglang moambit kita sa sakramento uban sa bug-os nga tinguha sa himaya sa Dios.

• Aron sa pag-awhag og diskusyon mahitungod sa Doktrina ug mga Pakigsaad 27:1–2, ikonsiderar ang pagsulat og pangutana nga sama niini diha sa pisara: Unsa ang gitudlo kanato sa Manluluwas mahitungod sa katuyoan sa sakramento? Ang mga sakop sa klase mahimong mangita og mga hugpong sa mga pulong niini nga mga bersikulo nga makatabang kanila sa pagtubag sa pangutana. Mahimong andam silang mopaambit og mga impresyon nga ilang nadawat kon unsaon sa pagbaton og mas sagradong kasinatian kon moambit sa sakramento.

  Ang mga sakop sa klase mahimong makakita og dugang nga mga ideya pinaagi sa pagbasa kon unsay gisulti sa Manluluwas sa dihang gipasiugdahan Niya ang sakramento (tan-awa sa Lucas 22:19–20; 3 Nephi 18:1–11). Kon ang Manluluwas anaa sa atong miting sa sakramento, unsa kaha ang lahi nato nga buhaton?

  

  Ang sakramento naglangkob og mga simbolo sa sakripisyo sa Manluluwas.

Doktrina ug mga Pakigsaad 27:15–18

Ang taming sa Dios motabang kanato nga makasukol sa dautan.

• Unsaon nimo pagtabang ang mga sakop sa klase nga makasabut unsaon sa paggamit ang taming sa Dios aron makasukol sa dautan sa atong panahon? Ikonsiderar ang paghangyo sa usa ka tawo sa pagdrowing sa pisara sa taming nga gihulagway diha sa mga bersikulo 15–18. Ang mga sakop sa klase mahimo dayong mopaambit og bisan unsa nga mga ideya nga ilang nadiskubrehan sa ilang personal nga pagtuon mahitungod sa mga piraso sa taming. O ang klase mahimong mobasa sa Doktrina ug mga Pakigsaad 27:15–18 ug sulatan og ngalan ang mga piraso sa taming ug ang mga parte sa lawas nga gipanalipdan niini. Unsay gipasabut sa pagsul-ob sa taming sa Dios? Tingali ang mga sakop sa klase mahimong maghisgot kon sa unsang paagi ang Ginoo mopanalipod kanato gikan sa dautan kon atong isul-ob ang taming sa Dios.

• Kon nagtudlo ka og mga batan-on, mahimo nimong ikonektar ang Doktrina ug mga Pakigsaad 27:15–18 ngadto sa mga sumbanan diha sa Alang sa Kalig-on sa mga Kabatan-onan. Sama pananglit, ang mga sakop sa klase mahimong mobasa sa mga bersikulo ug maghisgot nganong nagkinahanglan kita sa taming sa Dios. Dayon mahimo silang magtrabaho nga magparis ug moribyu og usa sa mga sumbanan diha sa Alang sa Kalig-on sa mga Kabatan-onan. Unsa ang atong makat-unan gikan niini nga mga kapanguhaan mahitungod sa mga pag-ataki ni Satanas kanato? Sa unsang paagi ang taming sa Dios makatabang kanato sa pagsukol niini nga mga pag-ataki? Unsaon nato sa pagsul-ob ang Iyang taming?

Doktrina ug mga Pakigsaad 28

Ang buhi nga propeta makadawat og pagpadayag alang sa Simbahan sa Ginoo.

• Aron matabangan ang mga sakop sa klase nga makat-on mahitungod sa tahas sa propeta, mahimo nimong ribyuhon ang kasinatian nga nakaaghat ni Joseph Smith sa pag-ampo ug pagdawat sa seksyon 28 (tan-awa ang ulohan sa seksyon), ug dayon mahimo nimong basahon ang mga bersikulo 2–3, 6–7, 11–13. Sa unsang paagi si Satanas mosulay sa pagkombinser kanato sa pagsunod niadtong wala gitudlo sa Ginoo? Mahimo nimong dapiton ang mga sakop sa klase sa pagpaambit og mga kasinatian nga nakalig-on sa ilang pagpamatuod nga ang propeta makadawat og pinadayag alang sa Simbahan.

• Usa ka paagi nga maribyu sa mga sakop sa klase ang Doktrina ug mga Pakigsaad 28 mao ang paghunahuna nga nakaila sila og tawo nga bag-ohay lang nakadawat og bag-o nga calling sa Simbahan. Unsay atong mapaambit gikan sa Doktrina ug mga Pakigsaad 28:1–6, 13–16 aron sa pagtabang nianang tawhana sa iyang calling? Ang kinutlo diha sa “Dugang nga mga Kapanguhaan” mahimong makadugang og mga ideya sa diskusyon.

Dugang nga mga Kapanguhaan

Tambag mahitungod sa personal nga pagpadayag.

Si Presidente Joseph F. Smith ug ang iyang mga magtatambag sa Unang Kapangulohan mitudlo:

“Kon ang mga panan-awon, mga damgo, mga pinulongan, panagna, mga pagbati o bisan unsa nga dili ordinaryong gasa o pagdasig nga nagpahayag og usa ka butang nga wala mahiuyon sa gidawat nga mga pagpadayag sa Simbahan o supak sa mga desisyon sa gipili nga mga may katungod niini, ang mga Santos sa Ulahing mga Adlaw mahimong makaila nga kini dili iya sa Dios, bisan kon unsa pa kini ka daw kasaligan nga tan-awon. … Sa kalibutanon maingon man usab sa espirituhanon nga mga kalihokan, ang mga Santos mahimong makadawat og Balaan nga paggiya ug pagpadayag nga makaapekto sa ilang kaugalingon, apan dili kini makahatag og pagtugot sa pagtudlo sa uban. …

“Ang kasaysayan sa Simbahan nagrekord og gipakaaron-ingnon nga mga pinadayag nga giangkon sa mga impostor o mga panatiko kinsa mituo sa mga pagpakita nga gitinguha nilang makadala og ubang mga tawo nga modawat, ug sa matag higayon, ang kasagmuyo, kaguol ug katalagman miresulta gikan niini” (Joseph F. Smith, Anthon H. Lund, Charles W. Penrose, “A Warning Voice,” Improvement Era, Sept. 1913, 1148–49).

Pagpalambo sa Atong Pagtudlo

Tutuki ang tinuod nga doktrina. Si Presidente Boyd K. Packer mitudlo, “Ang tinuod nga doktrina, unya nasabtan, mopausab sa mga kinaiya ug pamatasan” (“Ayaw Kahadlok,” Liahona, Mayo 2004, 79). Samtang magtudlo kita, kinahanglang motutok kita sa mga pagtulun-an ni Jesukristo kon gusto kitang motabang sa pagdala og mga kalag ngadto Kaniya.