Tanang Tuhod Mangluhod, ni J. Kirk Richards

Marso 22–28

Doktrina ug mga Pakigsaad 29

Si Jesukristo Mopundok sa Iyang Katawhan

Ang labing importanting paagi sa pagpangandam sa pagtudlo sa Doktrina ug mga Pakigsaad 29 mao ang mainampuong pagtuon niini ug pagtinguha sa giya sa Espiritu. Pagkonsiderar og ubang paagi sa pagdapit sa Espiritu sa imong kinabuhi, sama sa pagpuasa, pagtambong sa templo, o pagserbisyo sa uban.

Irekord ang Imong mga Impresyon

Dapita ang Pagpaambit

Sa Doktrina ug mga Pakigsaad 29:5, ang Ginoo misulti sa mga Santos, “Ipataas ang inyong mga kasingkasing ug pagmaya.” Mahimo nimong dapiton ang mga sakop sa klase sa pagpaambit og usa ka butang nga ilang nakat-unan sa ilang pagtuon sa kaugalingon o uban sa pamilya nga nakahimo kanila sa “[Pag]pataas sa [ilang] mga kasingkasing ug pagmaya.”

Itudlo ang Doktrina

Doktrina ug mga Pakigsaad 29

Ang Langitnong Amahan miandam og plano alang sa atong kahimayaan.

• Usa ka paagi sa pag-awhag og pagkat-on sa panimalay mao ang paggamit sa mga kalihokan nga makita sa outline sa kasamtangang semana sa Dali, Sunod Kanako—Alang sa mga Indibidwal ug mga Pamilya. Sama pananglit, mahimo ka nga molista sa pisara og mga parte sa plano sa kaluwasan, sama sa premortal nga kinabuhi, Paglalang, ang Pag-ula ni Jesukristo, ug uban pa. Ang mga sakop sa klase mahimong mopaambit sa unsay ilang nakat-unan gikan sa Doktrina ug mga Pakigsaad 29 mahitungod niini nga mga parte sa plano. Mahimo pa gani nga tugutan nimo silang mopaambit sa unsay ilang itudlo gikan niini nga seksyon ngadto sa tawo nga wala masayud sa plano sa Dios.

Doktrina ug mga Pakigsaad 29:1–8, 14–21

Si Jesukristo mopundok sa Iyang katawhan sa wala pa ang Iyang Ikaduhang Pag-anhi.

• Aron matabangan ang mga sakop sa klase nga makasabut nganong pundukon ni Jesukristo ang Iyang katawhan, mahimo nimo silang dapiton sa pagbasa sa mga bersikulo 1–8 ug maghisgot sa mga pangutana mahitungod sa pagpundok, sama sa: Sa unsang paagi nga atong nasinati nga si Kristo nagpundok ug nagpanalipod kanato, sama sa usa ka himongaan nga nagpundok ug nagpanalipod sa iyang mga pisô? Unsaon nato sa pagpundok ngadto sa Manluluwas? (tan-awa, sama pananglit, ang bersikulo 2). Ang mga sakop sa klase mahimong mopaambit kon sa unsang paagi sila napanalanginan pinaagi sa pagpundok ug pagsimba kauban ang ubang mga miyembro sa Simbahan.

  

  Pila ka Higayon, ni Liz Lemon Swindle

• Aron matabangan ang mga sakop sa klase nga maghunahuna sa ilang responsibilidad nga motabang sa Langitnong Amahan sa pagpundok sa Iyang mga anak, mahimo nimong mapaambit ang mga pulong ni Presidente Russell M. Nelson diha sa “Dugang nga mga Kapanguhaan.” Unsay atong makat-unan mahitungod sa pagpundok gikan niini nga mga mensahe? Sa unsang paagi kini nga mga mensahe naglig-on sa unsay gisulti sa Ginoo diha sa Doktrina ug mga Pakigsaad 29:1–8?

• Ang ubang mga panghitabo sa ulahing mga adlaw nga gihulagway diha sa Doktrina ug mga Pakigsaad 29:14–21 tingali makaguol sa mga sakop sa klase. Tuguti sila nga mopaambit sa ilang gibati. Nganong gipasidan-an man kita sa Ginoo mahitungod niini nga mga panghitabo? Unsa nga makahupay nga mga kamatuoran ang atong makat-unan mahitungod sa Manluluwas ug sa pagpundok gikan sa mga bersikulo 1–8? Sa unsang paagi ang pagpundok makatabang kanato nga magpaabut niini nga mga panghitabo uban ang hugot nga pagtuo imbis nga kahadlok? Isip kabahin sa inyong diskusyon, mahimo kamong mokanta og usa ka himno mahitungod sa pagpundok, sama sa “Israel, Israel, Dios Nagtawag” (Mga Himno, nu. 7), ug maghisgot kon unsay gitudlo sa himno mahitungod sa pagpundok sa Israel.

Doktrina ug mga Pakigsaad 29:34–35

Ang matag sugo sa Ginoo espirituhanon.

• Bisan kon ang ubang mga sugo daw temporal, ang tanang sugo espirituhanon ngadto sa Ginoo. Aron masabtan kini nga kamatuoran, ang mga sakop sa klase mahimong magbasa og dungan sa mga bersikulo 34–35 ug molista og pipila ka mga sugo diha sa pisara, uban sa espirituhanon nga mga baruganan ug mga panalangin kalabut sa matag usa. Mahimo silang mopaambit og mga ehemplo gikan sa ilang kinabuhi o gikan sa mga kasulatan nga nakatabang kanila nga makakita sa espirituhanong kinaiyahan sa mga sugo sa Dios. Sa unsang paagi kini nga kalihokan nakaapekto sa paagi sa atong pagtan-aw sa mga sugo?

Dugang nga mga Kapanguhaan

Doktrina ug mga Pakigsaad 29

Pag-apil sa pagpundok sa Israel.

Si Presidente Russell M. Nelson mitudlo:

“Sigurado nga kini karon ang ulahing mga adlaw, ug ang Ginoo mipadali sa Iyang buhat sa pagpundok sa Israel. Kana nga panagpundok mao ang labing importanting butang nga nahitabo sa yuta karon. Walay makatandi niini sa gidak-on, walay makatandi niini sa kaimportante, walay makatandi niini sa kahalangdon. Ug kon pilion ninyo, kon gustuhon ninyo, mamahimo kamong dakong bahin niini. Mahimo kamong dakong bahin sa usa ka dakong butang, mahinungdanong butang, halangdong butang!

“Kon maghisgot kita kalabut sa pagpundok, nagsulti lamang kita niining sukaranang kamatuoran: ang matag usa sa mga anak sa atong Langitnong Amahan, sa matag kilid sa tabil, angayang makadungog sa mensahe sa gipahiuli nga ebanghelyo ni Jesukristo. Mohukom sila sa ilang kaugalingon kon gusto ba nilang masayud pa og dugang. …

“Gireserba sa atong Langitnong Amahan ang daghan sa Iyang labing halangdong mga espiritu—tingali moingon ko nga ang labing nindot Niya nga team—alang niining katapusang hugna. Kadtong halangdon nga mga espiritu—kadtong labing maayo nga mga magdudula, kadtong mga bayani—mao kamo!” (“Paglaum sa Israel,” [tibuok kalibutan nga debosyonal alang sa kabatan-onan, Hunyo 3, 2018], ChurchofJesusChrist.org).

Pagpalambo sa Atong Pagtudlo

Pagtudlo sa klaro ug yano nga paagi. Imbis nga mosulay sa paglingaw sa imong klase, itudlo ang doktrina sa klaro ug yanong paagi. Makasalig ka nga “ang hiyas sa pulong sa Dios” adunay “labaw nga gamhanan nga sangputanan diha sa mga hunahuna sa katawhan kay sa … bisan unsa pa” (Alma 31:5).