Marso 8–14

Doktrina ug mga Pakigsaad 23–26

“Lig-una ang Simbahan”

Sa dili pa mobasa niini nga outline, basaha ang Doktrina ug mga Pakigsaad 23–26 ug pamalandungi ang mga baruganan nga gibati nimo nga makalig-on sa mga sakop sa imong klase. Dayon hunahunaa kon unsa nga mga kapanguhaan ang makatabang kanimo sa pagtudlo, lakip niadtong gisugyot niini nga outline.

Irekord ang Imong mga Impresyon

Dapita ang Pagpaambit

Unsa nga mga panalangin ang atong nasinati samtang kita “mohatag sa[atong] panahon sa paghalad ngadto sa pagtuon sa mga kasulatan”? (Doktrina ug mga Pakigsaad 26:1). Sa unsang paagi nato gibati ang Espiritu diha sa atong mga panimalay? Tingali ang mga sakop sa klase mahimong mopaambit kon giunsa nila pagbuntog ang mga babag o mga makabalda sa paggahin og panahon sa pagtuon sa kasulatan sa personal ug uban sa pamilya.

Itudlo ang Doktrina

Doktrina ug mga Pakigsaad 23–26

Makahimo kitang tanan sa paglig-on sa Simbahan.

• Mahimo nimong susihon uban sa mga sakop sa klase kon unsay gipasabut sa “pag-awhag sa simbahan” (Doktrina ug mga Pakigsaad 25:7). Tingali adunay usa nga mahimong mopaambit og mga ehemplo sa pag-awhag nga ilang nakita. Unsa ang atong mga oportunidad sa pag-awhag sa usag usa? Sa unsang paagi kini makalig-on sa Simbahan? Unsa pa ang atong makat-unan diha sa Doktrina ug mga Pakigsaad 23–26 nga makatabang kanato sa paglig-on sa Simbahan? Mahimo usab nimong hisgutan kon sa unsang paagi kini nga mga baruganan magamit sa pagpalig-on sa atong mga panimalay. Aron magamit kini nga mga baruganan sa atong mga paningkamot sa pagpangalagad, mahimo nimong ribyuhon ang mga parte sa mensahe ni Sister Bonnie H. Cordon “Pagkahimong usa ka Magbalantay” (Liahona, Nob. 2018, 74–76).

Doktrina ug mga Pakigsaad 24

Ang Manluluwas makapataas kanato “gikan sa [atong] mga kasakit.”

• Ang pinadayag diha sa Doktrina ug mga Pakigsaad 24 gihatag aron sa “paglig-on, pagdasig, ug pagtudlo” ni Joseph ug Oliver sa panahon sa pagsulay (Doktrina ug mga Pakigsaad 24, ulohan sa seksyon; tan-awa usab ang Mga Santos, 1:106–109). Mahimo nimong dapiton ang klase sa pagsiksik niini nga seksyon alang sa mga ebidensya nga ang Ginoo nahibalo kang Joseph ug sa iyang sitwasyon. Giunsa man pagtubag sa Ginoo ang mga panginahanglan ni Joseph? Sa unsang paagi nga nagbuhat Siya niini alang kanato karon? Ikonsiderar ang paghangyo sa mga sakop sa klase sa pagpaambit og mga kasinatian sa dihang mibati sila nga ang Ginoo nahibalo sa ilang personal nga mga sirkumstansya ug mitabang kanila panahon sa ilang mga kasakit.

  

  Miayo Siya og Daghang Nagkalain-laing mga Sakit, ni J.Kirk Richards

Doktrina ug mga Pakigsaad 25

Si Emma Smith usa ka “pinili nga babaye.”

• Aron sa pagtabang sa mga sakop sa klase nga makakita og personal nga koneksyon diha sa pinadayag sa Ginoo kang Emma Smith, ikonsiderar kini nga kalihokan: Hangyoa ang katunga sa klase sa pagsiksik sa seksyon 25 alang sa mga butang nga gipabuhat sa Ginoo kang Emma, ug hangyoa ang laing katunga sa pagsiksik sa mga butang nga gisaad Niya nga Iyang buhaton. Dapita sila sa paglista sa ilang nakit-an sa pagpaambit niini sa usag usa. Ang pipila ka mga sakop sa klase mahimong mopaambit og mga baruganan nga labing makahuluganon kanila.

• Unsa nga mga pulong ug hugpong sa mga pulong diha sa seksyon 25 ang nagsuporta sa deklarasyon sa Ginoo ngadto kang Emma Smith, “Ikaw ang pinili nga babaye”? (bersikulo 3). Ang mga sakop sa klase mahimo usab nga maghisgot kon giunsa ni Emma pagsunod ang mga baruganan niini nga pinadayag. Ang makatabang nga mga kapanguhaan naglakip sa “Thou Art an Elect Lady” (Revelations in Context, 33–39), ug “Mga Tingog sa Pagpahiuli” sa outline niini nga semana sa Dali, Sunod Kanako—Alang sa mga Indibidwal ug mga Pamilya.

• Sumala sa Doktrina ug mga Pakigsaad 25:11–12, unsay bation sa Ginoo kalabut sa sagrado nga mga musika? Tingali ang klase mahimong maghisgot og mga paagi sa paggamit sa mga himno aron madapit ang Espiritu sa ilang panimalay.

Doktrina ug mga Pakigsaad 25:5, 14

Kinahanglang magtinguha kita nga makabaton og “espiritu sa kaaghup.”

• Ang Ginoo mitambag kang Emma nga “[mag]padayon diha sa Espiritu sa kaaghup” (Doktrina ug mga Pakigsaad 25:14; tan-awa usab ang bersikulo 5). Aron masusi kon unsay gipasabut niini, mahimo ka nga mosulat og Kaaghup diha sa pisara ug dapita ang mga sakop sa klase sa pagsulat tupad niini sa unsay mahunahunaan nila tungod niini nga pulong. Dayon mahimo nilang siksikon ang seksyon 25 alang sa mga pulong ug hugpong sa mga pulong nga gibati nila nga may kalabutan sa kaaghup ug dayon mopaambit sa ilang nakit-an. Ikonsiderar ang pagpaambit sa pamahayag ni Elder David A. Bednar diha sa “Dugang nga mga Kapanguhaan.” Nganong importante man nga mahimong maaghup?

Doktrina ug mga Pakigsaad 25:10, 13

Kinahanglang magtinguha kita sa mga butang sa mas maayo nga kalibutan.

• Aron matabangan ang mga sakop sa klase nga magamit ang tambag sa Ginoo sa “[pag]salikway sa mga butang niini nga kalibutan, ug pangitaa ang mga butang nga maayo” (Doktrina ug mga Pakigsaad 25:10), mahimo nimo silang hangyoon sa paglista og mga ehemplo sa “mga butang niini nga kalibutan” ug mga ehemplo sa “mga butang [sa mas] maayo [nga kalibutan].” Unsa nga tambag ang mapaambit nato sa usag usa aron makatabang kanato nga nakatutok sa mahangturong mga butang? Sa unsang paagi ang tambag sa bersikulo 13 may kalabutan niini nga tumong?

Dugang nga mga Kapanguhaan

Ang kaaghup usa ka kalig-on.

Mipasabut si Elder David A. Bednar: “Ang Kristohanong hiyas sa kaaghup kasagaran masaypan sa pagsabut sa atong moderno nga kalibutan. Ang kaaghup usa ka kalig-on, dili kahuyang; aktibo, dili walay timik; maisugon, dili mahadlukon; kontrolado, dili nanghinubra; ligdong, dili magpalabaw sa kaugalingon; ug matinahuron, dili bastos. Ang maaghup nga tawo dili dali nga masuko, magpakaaron-ingnon, o hambugero ug daling moila sa mga kalampusan sa uban” (“Maaghup ug Mapaubsanon sa Kasingkasing,” Liahona, Mayo 2018, 32).

Pagpalambo sa Atong Pagtudlo

Pagmapatuod sa gisaad nga mga panalangin. Kon dapiton nimo ang mga sakop sa klase sa pagbuhat sa unsay ilang nakat-unan, pagpamatuod sa mga panalangin nga gisaad sa Dios (tan-awa sa Pagtudlo sumala sa Pamaagi sa Manluluwas, 35).