Panimalay ni Peter Whitmer, ni Al Rounds

Marso 1–7

Doktrina ug mga Pakigsaad 20–22

“Ang Pagsugod sa Simbahan ni Kristo”

I-rekord ang imong espiritwal nga mga impresyon samtang magtuon ka sa Doktrina ug mga Pakigsaad 20–22. Ang uban niini nga mga impresyon mahimong mosangput ngadto sa mga ideya nga makatabang kanimo samtang magtudlo ka.

Irekord ang Imong mga Impresyon

Dapita ang Pagpaambit

Panahon sa ilang pagtuon sa panimalay, ang mga sakop sa klase tingali nakaangkon og mga ideya mahitungod sa mga panalangin nga anaa ang tinuod nga Simbahan sa yuta. Dapita sila sa pagpaambit og usa ka tudling gikan niini nga mga seksyon nga naghulagway nganong mapasalamaton sila nga ang Simbahan napahiuli.

Itudlo ang Doktrina

Doktrina ug mga Pakigsaad 20–21

Ang Simbahan ni Jesukristo gipahiuli na.

• Ang mga sakop sa klase mahimong makabenepisyo sa pagtuon sa pagkasusama tali sa Ang Simbahan ni Jesukristo sa mga Santos sa Ulahing mga Adlaw ug sa Simbahan nga giestablisar ni Kristo sa karaang panahon. Mahimo ka nga modrowing sa pisara og tsart nga adunay upat ka kolum nga gingalanan og Doktrina, Mga Ordinansa, Awtoridad sa Pagkapari, ug Mga Propeta. Mahimo nimong ihatag ang mosunod nga mga pakisayran mahitungod sa Simbahan ni Kristo sa karaang kapanahonan: Mateo 16:15–19; Juan 7:16–17; Mga Taga-Efeso 2:19–22; 3 Nephi 11:23–26; Moroni 4–5. Ang mga sakop sa klase mahimong moila kon unsa ang gitudlo sa matag tudling mahitungod sa Simbahan ni Kristo ug mosulat sa pakisayran diha sa tukma nga kolum sa pisara. (Ang ubang pakisayran mahimong magamit sa sobra sa usa ka kolum.) Mahimo usab nila kining buhaton alang sa mosunod nga mga pakisayran mahitungod sa gipahiuli nga Simbahan ni Kristo: Doktrina ug mga Pakigsaad 20:17–25, 60, 72–79; 21:1–2. Unsa ang inyong nakat-unan mahitungod sa Pagpahiuli sa Simbahan ni Kristo gikan niini nga pagkumpara?

Doktrina ug mga Pakigsaad 20:37, 75–79; 22

Ang sagrado nga mga ordinansa makatabang kanato nga mahimong sama sa Manluluwas.

• Hatagi ang mga sakop sa klase og panahon sa pagtuon sa mga kwalipikasyon sa bunyag nga gihulagway diha sa Doktrina ug mga Pakigsaad 20:37, ug hangyoa sila sa pagpamalandong og mga pangutana nga sama niini: Sa unsang paagi kini nga mga kwalipikasyon makatabang kanato nga mangandam sa pagpabunyag diha sa Simbahan sa Ginoo? Unsay gipasabut sa pagdala sa ngalan ni Kristo sa atong kaugalingon? (tan-awa sa Mosiah 5:5–12). Unsay makatabang ninyo nga mapadayon ang inyong “hugot nga tinguha sa pag-alagad [ni Jesukristo] ngadto sa katapusan”?

• Unsa ang gitudlo sa seksyon 22 mahitungod sa bunyag? Hangyoa ang mga sakop sa klase sa paghunahuna nga aduna silay usa ka higala kinsa nabunyagan ngadto sa laing simbahan. Mahimo nilang basahon kini nga seksyon aron makakita og tambag sa pagtabang sa ilang higala nga makasabut nganong ang bunyag ngadto sa gipahiuli nga Simbahan sa Manluluwas gikinahanglan. Ang mga sakop sa klase mahimong mag-role-play niini nga sitwasyon isip tibuok klase o magparis.

• Basaha ang Doktrina ug mga Pakigsaad 20:75–79 nga magdungan, ug dapita ang mga sakop sa klase sa pagkonsiderar kon unsay gitudlo niini nga mga bersikulo mahitungod sa Manluluwas ug sa Iyang gahum sa atong kinabuhi. Unsa nga mga pulong o hugpong sa mga pulong ang daw mahinungdanon kaayo kon mobasa kita sa mga pag-ampo sa sakramento niini nga paagi? Nganong importante man nga moambit sa sakramento matag semana?

  

  Ang sakramento usa ka sagrado nga ordinansa.

Doktrina ug mga Pakigsaad 20:38–60

Ang serbisyo sa pagkapari mopanalangin sa mga miyembro sa Simbahan ug sa ilang mga pamilya.

• Ang deskripsyon sa mga katungdanan sa pagkapari diha sa Doktrina ug mga Pakigsaad 20:38–60 makatabang sa mga sakop sa imong klase nga mapalapdan ang ilang pagsabut sa serbisyo sa pagkapari. Tingali mahimo nimo silang dapiton sa paghunahuna nga ang usa ka bag-o lang nabunyagan nga higala o sakop sa pamilya hapit na i-orden ngadto sa usa ka katungdanan sa pagkapari. Unsaon nila paggamit kini nga mga bersikulo sa pagtabang kaniya nga makasabut sa iyang mga katungdanan? Unsa nga mga ehemplo ang ilang ipaambit sa pagtabang kaniya nga makasabut kon sa unsang paagi ang pagtuman niadto nga mga katungdanan makatabang kaniya nga mahimong mas sama kang Jesukristo? Tingali mahimo nilang ma-role-play kini nga pag-istoryahanay.

  Agig dugang, unsaon kaha nila paggamit niini nga mga bersikulo sa pagtabang sa bag-o lang nabunyagan nga sister nga makakita unsaon niya sa pag-apil sa buhat nga gihulagway dinhi? (Ang pamahayag diha sa “Dugang nga mga Kapanguhaan” makatabang.)

Doktrina ug mga Pakigsaad 21:4–7

Mapanalanginan kita kon modawat kita sa pulong sa Ginoo pinaagi sa Iyang propeta.

• Ang Doktrina ug mga Pakigsaad 21 naglangkob og gamhanang mga pamahayag mahitungod sa pagsunod sa propeta sa Ginoo. Aron matabangan ang mga sakop sa klase nga mamalandong ug maghisgot niini nga mga pamahayag, hangyoa sila sa pagsiksik sa mga bersikulo 4–7 alang sa hugpong sa mga pulong nga gusto nila nga masabtan pag-ayo ug sa pagsulat sa hugpong sa mga pulong diha sa pisara. Pagpili og pipila ka hugpong sa mga pulong, ug hisguti sa tibuok klase kon unsa kaha ang gipasabut niini. Unsa ang gitudlo niini nga hugpong sa mga pulong mahitungod sa pagsunod sa propeta sa Ginoo?

Dugang nga mga Kapanguhaan

Kitang tanan naglihok uban sa gahum sa pagkapari.

“Ang mga lalaki gi-orden sa mga katungdanan sa pagkapari, samtang ang mga babaye ug mga lalaki gidapit sa pagsinati sa gahum ug mga panalangin sa pagkapari sa ilang kinabuhi. …

“… Ang [mga babaye] mosangyaw ug mag-ampo sa mga kongregasyon, modawat sa responsibilidad sa daghang mga posisyon sa pagpangulo ug pagserbisyo, moapil sa mga konseho sa pagkapari sa lokal ug kinatibuk-ang mga lebel, ug moserbisyo sa pormal nga pang-proselyte nga mga misyon sa tibuok kalibutan. Niini ug sa ubang mga paagi, ang mga babaye migamit sa awtoridad sa pagkapari bisan kon wala sila gi-orden sa katungdanan sa pagkapari. …

“… Sa eklesyastikanhong mga calling, mga ordinansa sa templo, mga relasyon sa pamilya, ug sa hilum, indibidwal nga pagpangalagad, ang Santos sa Ulahing Adlaw nga mga babaye ug mga lalaki naglihok uban sa gahum ug awtoridad sa pagkapari. Kini nga pagsinaligay sa mga lalaki ug mga babaye sa pagtuman sa buhat sa Dios pinaagi sa Iyang gahum usa ka mahinungdanon bahin sa ebanghelyo ni Jesukristo” (Gospel Topics, “Joseph Smith’s Teachings about Priesthood, Temple, Women,” topics.ChurchofJesusChrist.org).

Pagpalambo sa Atong Pagtudlo

Dungan kitang magkat-on. Isip magtutudlo, nagkat-on ka uban sa tibuok nimong klase. Ipakita ang imong kaandam nga makat-on gikan kanila pinaagi sa pagpaminaw sa ilang mga ideya.