Umahan ni Martin Harris

Umahan ni Martin Harris, ni Al Rounds

Pebrero 22–28

Doktrina ug mga Pakigsaad 18–19

“Ang Bili sa mga Kalag Mahinungdanon”

Pinaagi lamang sa Espiritu Santo nga ang kasingkasing sa tawo mausab. Si Presidente Henry B. Eyring mitudlo, “Kon magtudlo ka og mga baruganan sa doktrina, ang Espiritu Santo moabut” (“Diskusyon uban ni Elder Richard G. Scott ug Elder Henry B. Eyring” [satellite nga sibya sa pagbansay sa Church Educational System, Ago. 11, 2003]).

Irekord ang Imong mga Impresyon

icon sa pagpaambit

Dapita ang Pagpaambit

Aron sa pag-aghat sa mga sakop sa klase nga mopaambit sa ilang mga kasinatian kalabut sa mga kasulatan, basaha og dungan ang Doktrina ug mga Pakigsaad 18:34–36. Dayon hangyoa ang mga sakop sa klase sa pagpaambit og usa ka bersikulo nga ilang nabasa karong semanaha diin ilang naila ang tingog sa Ginoo.

icon sa pagtudlo

Itudlo ang Doktrina

Doktrina ug mga Pakigsaad 18:10–16; 19:15–20, 39–41

Ang Ginoo malipay kon kita maghinulsol.

• Daghang mga tawo ikonektar ang paghinulsol sa negatibo nga mga pagbati. Sa unsang paagi ang mga pulong sa Ginoo diha sa Doktrina ug mga Pakigsaad 18 ug 19 makatabang sa mga sakop sa klase nga motan-aw sa paghinulsol isip makalipay nga butang? Mahimo nimong isulat sa pisara Ang paghinulsol ug hangyoa ang mga sakop sa klase sa pagsugyot og mga paagi sa pagkompleto niini nga kapahayag, base sa unsay ilang nabasa sa seksyon 18 ug 19. (Ikonsiderar ang pagribyu sa Doktrina ug mga Pakigsaad 18:10–16; 19:15–20, 39–41 diha sa klase.)

• Unsay buot ipasabut sa “pagsangyaw og paghinulsol”? (Doktrina ug mga Pakigsaad 18:14). Tingali ang mga sakop sa klase mahimong mokonsiderar niini nga pangutana samtang magbasa sila sa Doktrina ug mga Pakigsaad 18:10–16. Nganong ang mga tawo mopili man usahay nga dili maghinulsol? Unsaon nato sa pagdasig niadtong atong gimahal nga moduol sa Manluluwas ug modawat og kapasayloan? Awhaga ang mga sakop sa klase sa pagpangita og usa ka butang diha sa Doktrina ug mga Pakigsaad 18:10–16 o 19:15–20 nga makatabang.

Doktrina ug mga Pakigsaad 18:10–16

“Ang bili sa mga kalag mahinungdanon sa panan-aw sa Dios.”

• Unsaon nimo pagtabang ang mga sakop sa klase nga makasabut unsa ka bililhon ang matag usa kanato sa panan-aw sa Dios? Tingali mahimo nilang basahon ang Doktrina ug mga Pakigsaad 18:10–16 ug mopaambit og mga kasinatian diin nasabtan nila ang ilang bili ngadto sa Dios. Sa unsang paagi kini nga mga bersikulo nakaapekto sa paagi sa atong pagtan-aw sa atong kaugalingon? sa ubang tawo? Sa unsang paagi ang Dios mipakita kanato nga dako kita og bili ngadto Kaniya?

  Si Jesus nagkugos og gamay nga bata

  Bili sa usa ka Kalag, ni Liz Lemon Swindle

Doktrina ug mga Pakigsaad 19:15–19

Si Jesukristo miantus alang sa tanang katawhan.

• Unsaon nimo pagtabang ang mga sakop sa klase nga mobati sa pagsaksi sa Espiritu Santo samtang mamalandong sila sa paghulagway sa Manluluwas sa Iyang kaugalingong maulaon nga pag-antus? (Doktrina ug mga Pakigsaad 19:15–19). Tingali mahimo ka nga modapit og usa ka tawo sa pagkanta og paborito nga himno mahitungod sa Manluluwas. Mahimo ka usab nga mopakita og hulagway sa Manluluwas ug modapit sa mga sakop sa klase sa pagbasa sa mga bersikulo 15–19; dayon mahimo nilang isulat ang ilang mga hunahuna ug mga pagbati. (Ang mga pulong ni Elder D. Todd Christofferson diha sa “Dugang nga mga Kapanguhaan” makapalawom usab sa pagsabut sa mga sakop sa klase sa pag-antus sa Manluluwas.) Ang kapahayag nga sama niini diha sa pisara makatabang sa mga sakop sa klase sa pagpamalandong: Mapasalamaton ako sa Pag-ula ni Jesukristo tungod … Pipila ka mga sakop sa klase tingali andam nga mopaambit sa unsay ilang gisulat ug mohatag sa ilang pagpamatuod kabahin ni Jesukristo.

Doktrina ug mga Pakigsaad 19:16–26, 34–41

Ang pagbuhat sa kabubut-on sa Dios kasagaran nga magkinahanglan og sakripisyo.

• Samtang ang mga sakop sa klase mag-atubang og mga sitwasyon diin kinahanglan silang mohimo og mga sakripisyo alang sa ebanghelyo, makadasig kanila nga makat-on mahitungod sa sakripisyo nga gihimo ni Martin Harris aron mamantala ang Basahon ni Mormon. Mahimo ka nga modapit og usa ka tawo sa pagtambong sa klase nga andam nga mosaysay mahitungod sa desisyon ni Martin nga iprenda ang iyang umahan aron makabayad sa pagpa-imprinta sa Basahon ni Mormon (tan-awa sa Mga Santos, 1:85–87). Unsa nga mga bersikulo gikan sa seksyon 19 ang tingali nakatabang kaniya sa paghimo sa iyang desisyon? Mahimo nimong dapiton ang mga sakop sa klase sa pagpaambit kon sa unsang paagi ang Basahon ni Mormon nakapanalangin kanila ug unsa sila ka mapasalamaton sa sakripisyo ni Martin Harris ug sa uban nga misakripisyo aron mamantala ang basahon.

• Tingali usa ka tawo sa klase makapaambit og sakripisyo nga ilang nahimo alang sa Ginoo. Makagiya kini sa mga sakop sa klase sa paghunahuna sa ilang kaugalingong kaandam sa pagsakripisyo. Awhaga sila sa pagpaambit og bisan unsa nga ilang nakita sa Doktrina ug mga Pakigsaad 19 nga nagdasig kanila sa paghimo og mga sakripisyo aron sa pagbuhat sa kabubut-on sa Dios (tan-awa ilabi na ang mga bersikulo 16–26, 34–41).

icon sa dugang nga mga kapanguhaan

Dugang nga mga Kapanguhaan

Ang bili sa gugma sa Dios.

Nagpasabut sa Doktrina ug mga Pakigsaad 19:18, si Elder D. Todd Christofferson miingon: “Hunahunaon nato ang kantidad sa bililhong gugma sa Dios. … Ang Iyang pag-antus sa Getsemani ug dayon sa krus mas labaw kay sa maantus sa tawo. Bisan pa, tungod sa Iyang gugma sa Iyang Amahan ug kanato, Siya milahutay, ug isip sangputanan, makatanyag Siya kanato sa pagka-imortal ug kinabuhing dayon” (“Magpabilin Kamo sa Akong Gugma,” Liahona, Nob. 2016, 50).

Pagpalambo sa Atong Pagtudlo

Pagmugna og palibut nga nagdapit sa Espiritu. Adunay daghang paagi nga imong madapit ang Espiritu nganha sa imong klase. Ang pasiuna nga musika makaawhag og balaanong pagtahud. Ang mga pagpadayag og gugma ug pagpamatuod makamugna og mainiton, espirituhanong kahimtang. (Tan-awa sa Pagtudlo sumala sa Pamaagi sa Manluluwas, 15.)