Pebrero 8–14

Doktrina ug mga Pakigsaad 12–13; Joseph Smith—Kasaysayan 1:66–75

“Diha Kaninyo nga Akong Kauban nga mga Sulugoon”

Sama nga ang Espiritu Santo milamdag sa hunahuna ni Joseph Smith ug Oliver Cowdery mahitungod sa mga kasulatan, makadasig Siya nimo samtang mainampuon ka nga magtuon sa Doktrina ug mga Pakigsaad 12–13 ug Joseph Smith—Kasaysayan 1: 66–75.

Irekord ang Imong mga Impresyon

Dapita ang Pagpaambit

Usa ka paagi sa pag-awhag og pagpaambit mao ang pagpangutana sa mga sakop sa klase unsaon nila sa pagtuon sa mga kasulatan. Unsay ilang gibuhat aron makakita og mga ideya sa mga kasulatan karong semanaha?

Itudlo ang Doktrina

Doktrina ug mga Pakigsaad 13

Ang Aaronic nga Pagkapari gipahiuli pinaagi ni Juan Bautista.

• Usa ka paagi sa paghisgot sa mga kamatuoran diha sa Doktrina ug mga Pakigsaad 13 mao nga ang mga sakop sa klase maghisgut kon sa unsang paagi kini nga seksyon makatabang sa kabatan-onan nga mas makasabut sa Aaronic nga Pagkapari. Unsa ang gitudlo sa seksyon 13 mahitungod sa Aaronic nga Pagkapari nga kinahanglang masabtan sa batan-ong mga lalaki ug mga babaye? Aron mahatagan ang tanan og oportunidad nga makaapil, mahimo nimong hangyoon ang mga sakop sa klase sa paghisgut niini nga pangutana nga magpares ug dayon ipaambit kon unsay ilang nakat-unan gikan sa usag usa diha sa klase.

• Ang outline niini nga semana sa Dali, Sunod Kanako—Alang sa mga Indibidwal ug mga Pamilya nagsugyot og mga kapanguhaan nga makatabang sa pagpasabut sa pipila sa hugpong sa mga pulong diha sa Doktrina ug mga Pakigsaad 13. Mahimo nimong hangyuon ang mga sakop sa klase sa pagpaambit sa unsay ilang nakat-unan gikan sa pagtuon niini nga mga kapanguhaan. Aron makaaghat og diskusyon mahitungod sa mga yawe nga gihisgutan niini nga seksyon, mahimo ka nga mopakita og hugpong sa mga yawe ug dapiton ang mga sakop sa klase sa paghisgut kon unsa ang gitugot sa mga yawe nga atong mabuhat. Ang pagpasabut ni Sister Ruth ug Elder Dale G. Renlund diha sa “Dugang nga mga Kapanguhaan” makatabang usab. Unsa nga mga panalangin ang gitugot sa mga yawe sa Aaronic nga Pagkapari nga maanaa kanato? Sa unsang paagi nga mahimong lahi ang atong kinabuhi kon wala kini nga mga panalangin?

• Parte sa kaanindot sa gipahiuli nga ebanghelyo mao nga nagpaapil kini kanato sa samang buhat sa mga lalaki ug mga babaye diha sa mga kasulatan: pagtukod sa gingharian sa Dios dinhi sa yuta. Nakahimo kini kanato, maingon ta, nga “kauban nga mga sulugoon” kanila. Unsay gipasabut nga mahimong kauban nga sulugoon diha sa buhat sa Ginoo? Ang Mateo 3:13–17; Lucas 1:13–17; 3:2–20 makatabang sa mga sakop sa klase nga mas makasabut sa buhat nga gihimo ni Juan Bautista.

  

  Si Joseph Smith Mibunyag ni Oliver Cowdery, ni Del Parson

Joseph Smith—Kasaysayan 1:66–75

Ang mga ordinansa naghatag kanato og koneksyon ngadto sa gahum sa Dios.

• Aron mahatagan ang mga sakop sa klase og kahigayunan sa pagpamatuod ngadto sa usag usa mahitungod sa mga panalangin nga nagagikan sa pagdawat sa mga ordinansa sa pagkapari, mahimo nimo silang dapiton sa pagribyu sa Joseph Smith—Kasaysayan 1: 66–75, lakip ang mubong sulat sa bersikulo 71, nga mangita sa mga panalangin nga nadawat ni Joseph ug Oliver human sa ilang bunyag ug ordinasyon sa pagkapari. Sa unsang paagi ang mga ordinansa naghatag og espirituhanong gahum? Ang mga sakop sa klase mahimo dayong mopaambit sa ilang kaugalingong mga kasinatian dihang gibati nila ang gahum sa Dios nga nagagikan sa pagdawat sa mga ordinansa sa pagkapari sama sa bunyag, ang sakramento, o mga ordinansa sa templo.

• Ang mga sakop sa klase makabenipisyo sa paghimo og tsart nga nagpakita sa mga panalangin nga nagagikan sa mga ordinansa sa pagkapari. Sama pananglit, mahimo nimong isulat sa pisara ang mga ulohan nga Mga Ordinansa ug Mga Panalangin. Ang mga sakop sa klase mahimong mosiksik sa mga kasulatan sama sa mosunod aron masulatan ang tsart: Juan 14:26; Mga Buhat 2:38; Doktrina ug mga Pakigsaad 84:19–22; 131:1–4; Joseph Smith—Kasaysayan 1:73–74. Mahimo usab nilang ilakip ang ubang mga panalangin nga ilang nadawat tungod niini nga mga ordinansa. Tingali mahimo silang mopaambit og mga kasinatian sa dihang mibati sila nga ang mga ordinansa nga ilang nadawat nakadala sa gahum sa Manluluwas diha sa ilang kinabuhi.

Dugang nga mga Kapanguhaan

Unsa ang mga yawe sa pagkapari?

Si Elder Dale G. Renlund ug ang iyang asawa, si Ruth, mihatag niini nga pagpasabut mahitungod sa mga yawe sa pagkapari.

“Ang termino nga mga yawe sa pagkapari gigamit sa duha ka managlahing paagi. Ang una nagpasabut sa piho nga katungod o pribilehiyo nga gitugyan ngadto sa tanang modawat sa Aaronic o Melchizedek nga Pagkapari. … Sama pananglit, ang mga naghupot sa Aaronic nga Pagkapari nakadawat sa mga yawe sa pagpangalagad sa mga anghel ug sa mga yawe sa pagpangandam nga ebanghelyo sa bunyag pinaagi sa pagpaunlod alang sa kapasayloan sa mga sala (tan-awa sa Doktrina ug mga Pakigsaad 13:1; 84:26–27). Ang mga naghupot sa Melchizedek nga Pagkapari nakadawat sa yawe sa mga misteryo sa gingharian, sa yawe sa kahibalo sa Dios, ug sa mga yawe sa tanang espirituhanong mga panalangin sa Simbahan (tan-awa sa Doktrina ug mga Pakigsaad 84:19; 107:18). …

“Ang ikaduhang paagi nga gigamit ang termino nga mga yawe sa pagkapari nagpasabut sa pagpangulo. Ang mga lider sa pagkapari nakadawat og dugang nga mga yawe sa pagkapari, ang katungod sa pagdumala sa usa ka organisasyon nga bahin sa Simbahan o usa ka korum. Kalabut niini, ang mga yawe sa pagkapari mao ang awtoridad ug gahum sa pagdirekta, paggiya, ug pagdumala sa Simbahan” (The Melchizedek Priesthood: Understanding the Doctrine, Living the Principles [2018], 26).

Pagpalambo sa Atong Pagtudlo

Ihatag ang imong pagpamatuod kanunay. “Ang imong yano, kinasingkasing nga saksi sa espirituhanong kamatuoran mahimong adunay gamhanang impluwensya sa imong mga gitudloan. … Dili kinahanglan nga larino ang pagkasulti o taas” (Pagtudlo sumala sa Pamaagi sa Manluluwas, 10–11). Ikonsiderar ang pagpaambit sa imong personal nga pagsaksi bahin sa Aaronic nga Pagkapari samtang maghisgot ka sa Doktrina ug mga Pakigsaad 13.