Si Joseph Smith ug ang Tulo ka mga Saksi nangluhod sa pag-ampo

Pebrero 15–21

Doktrina ug mga Pakigsaad 14–17

“Mobarug ingon nga usa ka Saksi”

Hunahunaa ang doktrina ug mga panghitabo nga gihulagway diha sa Doktrina ug mga Pakigsaad 14–17. Unsaon nimo pagdasig ang mga tawo nga imong gitudloan nga “mobarug ingon nga usa ka saksi [niini nga] mga butang”? (Doktrina ug mga Pakigsaad 14:8).

Irekord ang Imong mga Impresyon

icon sa pagpaambit

Dapita ang Pagpaambit

Unsa ang nakita sa mga sakop sa imong klase nga makahuluganon diha sa ilang personal o pamilya nga pagtuon sa kasulatan? Tingali mahimo nimong dapiton ang klase sa pagpaambit og usa ka ideya mahitungod sa pag-apil sa buhat sa Ginoo gikan sa matag seksyon sa Doktrina ug mga Pakigsaad 14–17.

icon sa pagtudlo

Itudlo ang Doktrina

Doktrina ug mga Pakigsaad 14–16

Ang Ginoo nagdapit kanato sa pag-apil sa Iyang buhat.

• Unsa ang nahibaloan sa mga sakop sa klase mahitungod sa pamilyang Whitmer? (tan-awa sa Mga Santos, 1:75–77). Mahimong makatabang kanila ang paglista diha sa pisara og pipila ka mga detalye mahitungod sa mga Whitmer. Sa unsang paagi kini nga mga detalye makatabang kanato nga mas makasabut sa tambag sa Ginoo ngadto sa mga Whitmer diha sa mga seksyon 14–16? Sama pananglit, ngano kaha nga gitandi sa Ginoo ang Iyang buhat ngadto sa pag-ani sa umahan?

• Aron matugutan ang mga sakop sa klase sa pagpaambit sa ilang mga hunahuna mahitungod sa pag-apil diha sa buhat sa Ginoo, mahimo nimong isulat ang mosunod nga mga pakisayran sa pisara: Doktrina ug mga Pakigsaad 14:1; 14:2–4; 14:5, 8; 14:6–7; 14:9–11; 15:6. Ang mga sakop sa klase mahimong mobasa og usa niini nga mga tudling sa kasulatan nga magpares ug maghisgot sa unsay ilang nakat-unan mahitungod sa buhat sa Ginoo. Pipila sa managpares mahimong mopaambit sa klase sa unsay ilang nahisgutan.

• Dapita ang mga sakop sa klase sa pagpaambit sa ilang mga kasinatian sa pagtabang sa uban nga moduol sa Manluluwas, lakip na isip full-time o pangserbisyo nga mga misyonaryo ug pinaagi sa pagpangalagad. Sa unsang paagi nga ilang nakita ang mga pulong sa Ginoo diha sa Doktrina ug mga Pakigsaad 15:6 ug 16:6 nga natuman sa ilang kinabuhi? Unsa ang atong makat-unan gikan niini nga mga seksyon nga makatabang kanato nga mangandam sa pagpaambit sa ebanghelyo?

  mga trabahante sa umahan nga nangani og trigo

  Paghulagway sa mga trabahante sa umahan sa trigo pinaagi ni Greg Newbold

Doktrina ug mga Pakigsaad 17

Mahimo kitang magpabilin nga matinuoron sa unsay atong nahibaloan, bisan kon ang uban mosalikway kanato.

• Nganong mihatag man ang Ginoo og mga saksi sa Basahon ni Mormon? Ang mga sakop sa klase mahimong mopaambit og mga ideya nga miabut kanila samtang nagbasa sila sa Doktrina ug mga Pakigsaad 17. Ang dugang nga mga ideya makita sa mga kasulatan nga gihisgutan diha sa ulohan sa seksyon 17 o sa “Ang Pagpamatuod sa Tulo ka mga Saksi,” nga makita sa sinugdanan sa Basahon ni Mormon. Sa unsang paagi ang pagpamatuod sa Tulo ka mga Saksi nakaimpluwensya sa atong pagpamatuod sa Basahon ni Mormon?

• Bisan kon wala kita makakita og mga anghel o nakagunit sa mga palid nga bulawan, mahimo gihapon kitang makasaksi sa Basahon ni Mormon. Unsay nakita sa mga sakop sa klase diha sa seksyon 17 (lakip ang ulohan sa seksyon) nga ilang gibati nga magamit kanila? Kon adunay mangutana nganong nagtuo kita nga ang Basahon ni Mormon tinuod, unsay inyong isulti? Tingali ang mga sakop sa klase mahimong mosulat og mubong tubag, ug mahimo nimong dapiton ang pipila sa pagpaambit sa unsay ilang gisulat. Ang kinutlo ni Presidente Ezra Taft Benson diha sa “Dugang nga mga Kapanguhaan” makadasig sa mga miyembro sa paghatag sa ilang pagsaksi sa Basahon ni Mormon ngadto sa uban.

• Mahimong makadasig nga adunay usa ka sakop sa klase nga mopaambit sa mga kasinatian sa ubang mga saksi sa bulawang mga palid (tan-awa ang “Ang Pagpamatuod sa Walo ka mga Saksi” diha sa Basahon ni Mormon ug ang kasinatian ni Mary Whitmer diha sa Mga Santos, 1:77–79). Unsay atong makat-unan gikan sa mga kasinatian niini nga mga saksi?

icon sa dugang nga mga kapanguhaan

Dugang nga mga Kapanguhaan

Pagpaambit sa atong saksi sa Basahon ni Mormon.

Si Presidente Ezra Taft Benson mihatag sa mosunod nga pagdapit ngadto sa mga miyembro sa Simbahan niadtong 1988:

“Ang Basahon ni Mormon mao ang instrumento nga gidisenyo sa Dios nga ‘mosilhig sa yuta ingon sa usa ka lunop, aron pagpundok sa [Iyang] pinili.’ (Moises 7:62.) Kining sagrado nga basahon sa kasulatan kinahanglan nga mahimong mas sentro sa atong pagsangyaw, sa atong pagtudlo, ug sa atong misyonaryo nga buhat.

“… Niini nga panahon sa electronic media ug sa dinaghang pag-apud-apod sa giimprinta nga pulong, ang Dios mohimo kanato nga may tulubagon kon kita karon dili mopalihok sa Basahon ni Mormon sa hilabihan kakusog nga paagi.

Ania kanato ang Basahon ni Mormon, kita adunay mga miyembro, kita adunay mga misyonaryo, kita adunay mga kapanguhaan, ug ang kalibutan adunay panginahanglan. Ang panahon mao karon!

“Akong hinigugmang mga kaigsoonan, hapit dili nato matugkad ang gahum sa Basahon ni Mormon, ni ang balaang tahas nga kinahanglan gayud nga buhaton niini, ni ang lugway diin kini kinahanglan gayud nga ipalihok” (Mga Pagtulun-an sa mga Presidente sa Simbahan: Ezra Taft Benson [2014], 172).

Pagpalambo sa Atong Pagtudlo

Ipangutana ang mga pangutana nga makadapit og pagpamatuod. Ang usa ka dinasig nga pangutana mahimong usa ka gamhanang paagi sa pagdapit sa Espiritu. Sama pananglit, kon magtudlo sa Doktrina ug mga Pakigsaad 14:9, mahimo ka nga mangutana og sama sa “Giunsa nimo sa pagkahibalo nga si Jesukristo mao ang ‘kahayag nga dili matago sa kangitngit’?” (Tan-awa sa Pagtudlo sumala sa Pamaagi sa Manluluwas, 32.)