Manuskrito sa Basahon ni Mormon

Hulad sa orihinal nga manuskrito sa Basahon ni Mormon.

Pebrero 1–7

Doktrina ug mga Pakigsaad 10–11

“Aron Ikaw Mahimo nga Magmadaugon”

Unsa nga mga impresyon ang imong naangkon samtang nagbasa ka sa Doktrina ug mga Pakigsaad 10–11? Unsa nga mga hunahuna ang miabut kanimo mahitungod sa mga panginahanglan sa mga tawo nga imong gitudloan?

Irekord ang Imong mga Impresyon

icon sa pagpaambit

Dapita ang Pagpaambit

Aron mahatagan ang mga sakop sa klase og oportunidad sa paghisgot sa unsay ilang nakat-unan sa ilang pagtuon sa kasulatan sa personal ug pamilya, mahimo nimong isulat sa pisara ang Doktrina ug mga Pakigsaad 10 ug Doktrina ug mga Pakigsaad 11. Pipila ka mga sakop sa klase mahimong mosulat, ubos sa bisan asa sa mga ulohan, sa numero sa bersikulo diin nakakaplag sila og importante nga kamatuoran. Pagpili og pipila sa mga bersikulo, ug dapita ang mga sakop sa klase sa pagpaambit sa mga kamatuoran nga ilang nakit-an diha niini.

icon sa pagtudlo

Itudlo ang Doktrina

Doktrina ug mga Pakigsaad 10:1–33

Si Satanas nagtinguha sa paglaglag sa buhat sa Dios.

• Ang Doktrina ug mga Pakigsaad 10 makatabang sa mga sakop sa klase sa pag-ila ug pakigbatok sa mga paningkamot ni Satanas sa paglaglag sa ilang pagtuo. Aron makahatag og pipila ka makasaysayanong konteksto alang niini nga seksyon, mahimo nimong dapiton ang usa ka sakop sa klase sa pagpaambit sa istorya ni Martin Harris nga nawad-an sa 116 ka pahina sa hubad sa Basahon ni Mormon (tan-awa ang ulohan sa seksyon sa Doktrina ug mga Pakigsaad 3 ug Mga Santos, 1:57–59). Ang mga sakop sa klase mahimo dayong magsiksik sa Doktrina ug mga Pakigsaad 10:1–33 sa pagpangita sa plano ni Satanas alang sa nawala nga mga pahina. Unsay atong makat-unan gikan niini nga mga bersikulo mahitungod sa mga paagi sa paglihok ni Satanas ug nganong gihimo niya kining mga butanga? (tan-awa usab sa bersikulo 63). Sa unsang paagi nga susama ang iyang gipangbuhat sa atong panahon? Sa unsang paagi nga ang Ginoo mitabang kanato sa pagbuntog ni Satanas sa atong kinabuhi?

Doktrina ug mga Pakigsaad 10:34–52

Ang “kaalam [sa Ginoo] labaw pa ka gamhanan kay sa kaigmat sa yawa.”

• Kon mawad-an kitag kadasig tungod sa atong mga sala, makakaplag kita og paglaum sa pagkasayud kon giunsa sa Ginoo paghulip ang sala nga nabuhat ni Joseph Smith ug Martin Harris sa dihang misupak sila sa Ginoo ug nawad-an sa 116 ka pahina sa hubad sa Basahon ni Mormon. Ikonsiderar kon unsaon nimo pagtabang ang mga sakop sa klase nga makakaplag og paglaum niini nga istorya. Sama pananglit, mahimo nimo silang dapiton sa pagpaambit og usa ka butang nga ilang nakat-unan mahitungod sa Ginoo gikan sa Doktrina ug mga Pakigsaad 10:34–52 (tan-awa usab ang Doktrina ug mga Pakigsaad 3:1–3). Ang mga sakop sa klase mahimong mopaambit kon sa unsang paagi nila nakita nga ang “kaalam [sa Ginoo] labaw pa ka gamhanan kay sa kaigmat sa yawa” (Doktrina ug mga Pakigsaad 10:43). Sa unsang paagi kini nga kahibalo makalig-on sa atong pagtuo diha Kaniya?

  Si Mormon nagpamubo sa bulawang mga palid

  Si Mormon Nagpamubo sa mga Palid, ni Tom Lovell

Doktrina ug mga Pakigsaad 11

Kon mangayo kita sa Dios, makadawat kita.

• Ang outline niini nga semana sa Dali, Sunod Kanako—Alang sa mga Indibidwal ug mga Pamilya nagdapit kanato sa pagbasa sa Doktrina ug mga Pakigsaad 11 nga daw gisulat kini alang kanato. Tingali ang mga sakop sa klase andam nga mopaambit og usa ka butang gikan sa seksyon nga makahuluganon kaayo kanila. Giunsa nila pagplano sa paggamit sa unsay ilang nakat-unan?

• Usa ka paagi sa pag-awhag og diskusyon mahitungod sa Doktrina ug mga Pakigsaad 11 mao ang pagdapit sa mga sakop sa klase sa pagpangita og usa ka baruganan diha sa seksyon ug dayon mosulat og pangutana mahitungod niini. Ang ingon nga mga pangutana mahimong maglakip sa “Unsay gipasabut sa pagmatinud-anon ngadto kang Kristo sa inyong tibuok nga kasingkasing?” (bersikulo 19) o “Unsaon nato sa pagkaangkon sa pulong sa Dios?” (bersikulo 21). Ang mga sakop sa klase mahimong mobutang sa ilang mga pangutana sa ibabaw sa usa ka piraso nga papel ug ipasa-pasa ang ilang mga papel libut sa kwarto, modugang og mga hunahuna ug posibleng mga tubag sa mga pangutana sa matag usa. (Makatabang tingali nga unahon pagbahin ang klase ngadto sa gagmay nga mga grupo.) Ang mga sakop sa klase mahimo dayong mopaambit sa klase og pipila ka mga ideya nga gisulat sa uban mahitungod sa ilang pangutana.

Doktrina ug mga Pakigsaad 11:8–26

Ang Dios mohatag kanato sa Iyang Espiritu samtang atong andamon ang atong kaugalingon sa Iyang paagi.

• Makabenepisyo ba ang mga sakop sa imong klase sa paghisgot kon unsaon sa pag-ila og personal nga pagpadayag pinaagi sa Espiritu? Kon mao, mahimo nimong sugdan ang diskusyon pinaagi sa pagdapit kanila sa paghunahuna nga gihangyo sila sa pagsulat og pipila ka kamatuoran kon unsaon sa pagdawat og personal nga pagpadayag. Unsa ang ilang iapil nga gikan sa Doktrina ug mga Pakigsaad 11:8–26? Sama pananglit, unsay ilang isulat mahitungod sa pagpangandam sa pagdawat og giya alang sa atong kinabuhi ug mga tubag sa atong mga pangutana? Unsay ilang isulti kon unsaon sa pag-ila og mga tubag kon kini moabut? Dapita ang mga sakop sa klase sa pagpamalandong kon unsaon nila sa paggamit sa ilang nakat-unan samtang maningkamot sila sa pagtinguha og personal nga pagpadayag.

  Isip parte niini nga kalihokan, mahimo nimong ipaambit kini nga pamahayag ni Sister Julie B. Beck, kanhi Kinatibuk-ang Presidente sa Relief Society: “Ang abilidad nga mahimong sarang, makadawat, ug makalihok sa personal nga pinadayag mao lamang ang labing importante nga kahanas nga mahimong maangkon niining kinabuhia” (“Ug Ibabaw sa mga Sulugoong Babaye Niadtong mga Adlawa Igabu-bu Ko ang Akong Espiritu,” Liahona, Mayo 2010, 11).

Pagpalambo sa Atong Pagtudlo

Apila kadtong nanglimbasug. Unsay imong mabuhat kon ang usa ka sakop sa klase daw dili konektado sa tibuok klase? Usahay gikinahanglan lang siya nga iapil. Ikonsiderar ang paghangyo niining tawhana sa pag-apil sa umaabut nga leksyon. Kon dili siya mosanong sa imong unang mga paningkamot, padayon sa pagpakita og gugma ug pagpakabana. (Tan-awa sa Pagtudlo sumala sa Pamaagi sa Manluluwas, 8–9.)