tigsulat nga nagsulat sa papel

Enero 25–31

Doktrina ug mga Pakigsaad 6–9

“Kini Mao ang Espiritu sa Pagpadayag”

Ang Doktrina ug mga Pakigsaad 6–9 nagtudlo og bililhong mga baruganan mahitungod sa pagdawat og pagpadayag. Gamita kini nga mga baruganan pinaagi sa pagtinguha og pagpadayag kon unsaon sa pagtabang sa mga sakop sa klase nga makakat-on gikan niini nga mga seksyon.

Irekord ang Imong mga Impresyon

icon sa pagpaambit

Dapita ang Pagpaambit

Aron sa pag-awhag sa mga sakop sa klase nga mopaambit sa ilang mga kasinatian sa pagtuon sa Doktrina ug mga Pakigsaad 6–9, mahimo nimo silang dapiton sa paghisgot, kon angay, sa bisan unsang espirituhanong mga impresyon nga ilang nadawat panahon sa ilang pagtuon. Unsa ang mga mensahe sa Ginoo alang kanila?

icon sa pagtudlo

Itudlo ang Doktrina

Doktrina ug mga Pakigsaad 6; 8–9

Ang Langitnong Amahan mamulong kanako pinaagi sa “Espiritu sa kamatuoran.”

• Ang Ginoo adunay daghang matudlo kanato mahitungod sa personal nga pagpadayag niini nga mga seksyon, ug posible nga dili ka makahimo sa pagtudlo niining tanan sa usa ka klase. Mahimo nga makatabang ang pagbahin sa klase ngadto sa tulo ka grupo ug hangyoon ang matag grupo sa pagsiksik sa seksyon 6, 8, o 9, nga mangita og mga tubag sa mga pangutanang sama niini: Sa unsang paagi ang Espiritu Santo mamulong kanato? Unsaon nato pag-ila og personal nga pagpadayag? Unsaon nato pag-andam ang atong mga kaugalingon sa pagdawat og pagpadayag? Dayon usa ka tawo gikan sa matag grupo mahimong daklit nga mopaambit diha sa klase kon unsa ang nadiskubrehan sa ilang grupo. Mahimo usab nimong awhagon ang mga sakop sa klase sa pagpaambit sa ilang kaugalingong mga kasinatian sa pag-ila og personal nga pagpadayag. Sama pananglit, duna bay bisan unsa diha sa Doktrina ug mga Pakigsaad 6:22–24 nga nagpahinumdom kanato og mga kasinatian nga atong nasinati?

• Ang paghisgut og personal nga pagpadayag makapawala og kadasig tingali sa mga tawo sa imong klase kinsa nag-ampo alang sa giya apan wala mobati nga aduna silay nadawat. Makatabang kanila nga masayud nga si Oliver Cowdery nanlimbasug og susama nga mga pagbati sa dihang wala siya makahimo sa paghubad nga sama ka sayon sa iyang gilauman. Mahimo nimong dapiton ang mga sakop sa klase sa pagsiksik sa tambag sa Ginoo ngadto ni Oliver diha sa seksyon 9. Unsa nga mga mensahe niini nga seksyon ang makatabang sa usa ka tawo kinsa mibati nga ang Ginoo dili motubag sa ilang mga pag-ampo? Ang mga pamahayag diha sa “Dugang nga mga Kapanguhaan” mahimong makatabang usab.

  Oliver Cowdery

  Oliver Cowdery, ni Lewis A. Ramsey

Doktrina ug mga Pakigsaad 6–7

“Bisan ingon nga ikaw nagtinguha kanako busa kini mahimo.”

• Ang outline niini nga semana diha sa Dali, Sunod Kanako—Alang sa mga Indibidwal ug mga Pamilya nagsugyot sa pagtimaan sa mga pulong nga sama sa tinguha diha sa mga seksyon 6–7. Tingali ang mga sakop sa klase mahimong mopaambit sa unsay ilang nakat-unan gikan niana nga kalihokan, o mahimo ninyong himoon ang kalihokan sa tibuok klase. Unsay gitudlo kanato sa atong inadlaw-adlaw nga mga buhat mahitungod sa atong mga tinguha? Sa unsang paagi ang Ginoo makatabang kanato sa pag-usab sa atong mga tinguha?

Doktrina ug mga Pakigsaad 6:29–37

Kon mosalig kita sa Ginoo, makatabang Siya kanato sa pagbuntog sa pagduha-duha og kahadlok.

• Nganong kita usahay “[ma]hadlok sa pagbuhat og maayo”? (bersikulo 33). Tingali ang mga sakop sa klase makasugyot og pipila ka posibleng mga rason, uban sa mga ideya gikan sa Doktrina ug mga Pakigsaad 6:29–37 nga makahatag kanila og kaisug sa pagbuhat og maayo.

• Aron makasugod og diskusyon kon sa unsang paagi si Jesukristo makatabang kanato nga “[dili m]agduha-duha, [dili m]ahadlok” (bersikulo 36), mahimo nimong hangyoon ang mga sakop sa klase sa pagsulat diha sa mga piraso sa papel sa pipila ka butang nga posibleng kahadlokan sa mga tawo. (Si Elder Ronald A. Rasband mihatag og pipila ka ehemplo diha sa iyang mensahe “Ayaw Kabalaka” [Liahona, Nob. 2018, 18].) Dayon mahimo nimong basahon og kusog ang pipila niini nga mga papel ug hisgutan kon sa unsang paagi ang Manluluwas ug ang Iyang matubsanong gahum makatabang kanato kon mahadlok kita. Ang Doktrina ug mga Pakigsaad 6:29–37 adunay pipila ka mga ideya (tan-awa usab sa 1 Juan 4:18). Unsay gipasabut sa “paghunahuna [kang Kristo] sa matag hunahuna”? (bersikulo 36). Sa unsang paagi kining pagtutok diha sa Manluluwas makatabang kanato kon mag-atubang kita og pagduha-duha o kahadlok?

icon sa dugang nga mga kapanguhaan

Dugang nga mga Kapanguhaan

Pagsabut kon sa unsang paagi ang Langitnong Amahan motubag sa mga pag-ampo.

“Sa akong kinabuhi akong nakat-unan nga usahay dili ko makadawat og tubag sa usa ka pag-ampo kay ang Ginoo nasayud nga dili ko andam. Kon Siya motubag, sa kasagaran ‘diyutay dinhi ug diyutay didto’ [2 Nephi 28: 30] tungod kay mao lamang kana ang akong mahimo o tanan nga andam nakong buhaton” (Robert D. Hales, “Nagahulat sa Ginoo: Matuman ang Imong Kabubut-on,” Liahona, Nob. 2011, 73).

“Unsay inyong buhaton kon kamo nangandam og maayo, tinud-anay nga nag-ampo, naghulat og dugay alang sa tubag, ug gihapon walay gibati nga tubag? Mahimo kamong magpasalamat kon mahitabo man kana, kay timailhan kana sa Iyang pagsalig. Kon kamo nagpuyo nga takus ug ang inyong pagpili uyon kanunay sa pagtulun-an sa Manluluwas ug kamo kinahanglan nga mobuhat, mopadayon uban sa pagsalig. … Kon kamo nagpuyo nga matarung ug nagbuhat uban sa pagsalig, ang Dios dili motugot nga kamo moabut og layo nga walay pahimangno kon nasayop kamo sa inyong desisyon” (Richard G. Scott, “Ang Paggamit sa Langitnong Gasa sa Pag-ampo,” Liahona, Mayo 2007, 10).

Pagpalambo sa Atong Pagtudlo

Pagpakita og pagsalig sa mga abilidad sa mga nagkat-on. Ang ubang tawo sa imong klase tingali dili masaligon sa ilang abilidad sa pagkat-on sa ebanghelyo. Ikonsiderar kon unsaon nimo sila sa pagdasig nga samtang maningkamot sila sa pagkat-on sa ilang kaugalingon, ang Espiritu Santo motudlo kanila. (Tan-awa sa Pagtudlo sumala sa Pamaagi sa Manluluwas, 29.)