mga tawo nga nagtrabaho sa umahan

Ting-ani sa France, ni James Taylor Harwood

Enero 18–24

Doktrina ug mga Pakigsaad 3–5

“Ang Akong Buhat Magpadayon”

Ang pagtuon sa Doktrina ug mga Pakigsaad 3–5 sa dili pa ka moribyu sa mga ideya niini nga outline makatabang nimo sa pagdawat og giya gikan sa Espiritu Santo. Ang outline niini nga semana gikan sa Dali, Sunod Kanako—Alang sa mga Indibidwal ug mga Pamilya makatabang kanimo nga makasabut sa kasaysayan nga miresulta sa mga pinadayag nga narekord niini nga mga seksyon.

Irekord ang Imong mga Impresyon

icon sa pagpaambit

Dapita ang Pagpaambit

Hatagi ang mga sakop sa klase og pipila ka minuto sa pagribyu sa mga kasulatan nga ilang nabasa sa panimalay ug sa pagpangita og usa ka tudling nga makahuluganon kanila. Dayon dapita sila sa pagpaambit sa ilang nakat-unan ngadto sa usa ka tawo diha sa klase.

icon sa pagtudlo

Itudlo ang Doktrina

Doktrina ug mga Pakigsaad 3:1–15

Kinahanglang mosalig kita sa Dios kay sa mahadlok sa tawo.

• Sama ni Joseph Smith, kitang tanan adunay mga kasinatian diin mibati kita nga gipugos sa laing mga tawo sa pagbuhat og butang nga atong nahibaloan nga sayop. Unsa nga mga kamatuoran ang atong makat-unan gikan sa Doktrina ug mga Pakigsaad 3:1–15 nga makatabang kanato nga magpabiling matinud-anon ngadto sa Dios sa ingon nga mga sitwasyon?

• Si Joseph Smith kinahanglang mapanton tungod kay nahadlok sa tawo labaw pa kay sa Dios, apan kinahanglan usab siyang madasig. Dapita ang mga sakop sa klase sa pagpangita diha sa seksyon 3 kon sa unsang paagi ang Ginoo mipanton ug miawhag ni Joseph. Sama pananglit, mahimo silang molista diha sa pisara og mga pulong gikan sa mga bersikulo 1–15 nga naglakip sa pagbadlong sa Ginoo ug ubang hugpong sa mga pulong nga naglakip sa Iyang pag-awhag nga maghinulsol ug magpabiling matinud-anon. Unsa ang gitudlo kanato sa kasinatian ni Joseph kon sa unsang paagi ang Manluluwas motabang kanato sa pagbuntog sa atong mga sayop?

Doktrina ug mga Pakigsaad 4

Ang Ginoo mihangyo kanato sa pagserbisyo Kaniya sa tibuok natong kasingkasing.

• Ang mga kinaiya nga naghulagway sa mga sulugoon sa Ginoo nga gilista diha sa Doktrina ug mga Pakigsaad 4:5–6 mao usab ang mga kinaiya ni Jesukristo. Aron matabangan ang mga sakop sa klase nga makat-on pa og dugang, mahimo nimo silang dapiton sa pagpili og usa sa mga kinaiya ug sa pagpangita sa mga kahulugan o dugang nga mga kasulatan nga makatabang kanila nga mas makasabut sa kinaiya (tan-awa, sama pananglit, sa pamahayag ni Sister Elaine S. Dalton diha sa “Dugang nga mga Kapanguhaan”). Mahimo ka nga modapit og pipila ka tawo sa pagpaambit sa ilang nakit-an. Mahimo usab silang mopaambit kon ngano nga ang kinaiya nga ilang gipili gikinahanglan alang sa pagserbisyo sa gingharian sa Dios. Sa unsang paagi nga mas mapalambo nato kini nga mga kinaiya? (tan-awa sa bersikulo 7).

• Ang Doktrina ug mga Pakigsaad 4 gitumong ngadto ni Joseph Smith Sr., kinsa gustong masayud kon unsaon niya sa pagtabang sa buhat sa Ginoo. Kini nga seksyon makatabang usab ni bisan kinsa kanato nga nagtinguha sa pagserbisyo sa Ginoo. Ania ang usa ka paagi sa pagtuon niini nga seksyon: ang mga sakop sa klase mahimong magtrabaho sa ginagmayng mga grupo aron mosulat og deskripsyon sa trabaho sa mga sulugoon sa Dios, gamit ang seksyon 4 isip giya. Sa unsang paagi kini nga mga kwalipikasyon lahi kay sa ubang mga deskripsyon sa trabaho? Nganong mahinungdanon man kini nga mga kinaiya sa pagbuhat sa buhat sa Dios? Ang pamahayag ni Elder David A. Bednar diha sa “Dugang nga mga Kapanguhaan” makatabang sa mga sakop sa klase nga makasabut sa kaimportante sa pagpalambo niini nga mga kinaiya.

Doktrina ug mga Pakigsaad 5

Usa ka saksi sa kamatuoran moabut niadtong kinsa mapainubsanon ug matinuohon.

• Kon ang bulawang mga palid iplastar aron makita sa tibuok kalibutan, makakombinser ba kana sa tanan nga ang Basahon ni Mormon tinuod? Ngano man o nganong dili? (tan-awa ang Doktrina ug mga Pakigsaad 5:7). Tingali ang mga sakop sa klase mahimong mosiksik sa seksyon 5 alang sa mga ideya nga makatabang nila sa pagtubag sa usa ka tawo kinsa mangayo og ebidensya nga ang Basahon ni Mormon tinuod. Unsa ang gitudlo sa Ginoo kang Joseph Smith ug Martin Harris nga makatabang kanato nga makaangkon og atong kaugalingong saksi sa mga kamatuoran sa ebanghelyo?

  Martin Harris

  Martin Harris, ni Lewis A. Ramsey

icon sa dugang nga mga kapanguhaan

Dugang nga mga Kapanguhaan

Ang hiyas nagpasabut og kalig-on.

Si Sister Elaine S. Dalton mihatag niini nga pagpasabut sa hiyas: “Ang hiyas mao ang usa ka pulong nga dili nato madungog kanunay sa katilingban karon, apan ang Latin nga gamotpulong [root word] nga virtus nagpasabut nga kalig-on. Ang hiyasnon nga mga babaye ug mga lalaki nagbaton og hilum nga dignidad ug kalig-on sa sulod. Masaligon sila tungod kay takus silang modawat ug magiyahan sa Espiritu Santo” (“Usa ka Pagbalik sa Pagkahiyasnon,” Liahona, Nob. 2008, 79).

Pagkahimong usa ka misyonaryo.

Si Elder David A. Bednar miingon: “Ang proseso sa pagkahimo nga misyonaryo wala magkinahanglan nga ang batan-ong lalaki magsul-ob og puti nga polo ug kurbata [o ang batan-ong babaye magsul-ob og sinina] kada adlaw sa tulunghaan o mosunod sa mga giya sa misyonaryo sa dayong katulog ug pagbangon. … Apan mahimo nimong palamboon ang imong tinguha sa pag-alagad sa Dios [tan-awa sa Doktrina ug mga Pakigsaad 4:3], ug mahimo nimong sugdan sa paghunahuna ingon sa hunahuna sa mga misyonaryo, sa pagbasa sa gitun-an sa mga misyonaryo, sa pag-ampo sama sa inampoan sa mga misyonaryo, ug nga mobati sama sa bation sa mga misyonaryo. Likayan ninyo ang mga butang nga kalibutananon nga maoy makahimo sa Espiritu Santo sa pagbiya, ug makabaton ka’g pagsalig sa pag-ila ug pagtubag sa mga espirituhanong awhag.” (“Pagkahimong Usa ka Misyonaryo,” Liahona, Nob. 2005, 45).

Pagpalambo sa Atong Pagtudlo

Pangutana og mga pangutana nga makaawhag og makahuluganong diskusyon. Ang mga pangutana nga adunay sobra sa usa ka saktong tubag makadapit sa mga tigkat-on sa pagtubag base sa ilang personal nga mga hunahuna, mga pagbati, ug mga kasinatian. Sama pananglit, mahimo ka nga mangutana, “Unsaon ninyo pagkasayud nga ang Dios namulong kaninyo?” (Tan-awa sa Pagtudlo sumala sa Pamaagi sa Manluluwas, 33.)