Disyembre 28–Enero 3

Doktrina ug mga Pakigsaad 1

“Patalinghug, O Kamo nga mga Katawhan”

Samtang magbasa ka sa Doktrina ug mga Pakigsaad 1, hunahunaa kon unsa nga mga bersikulo ang imong tutokan diha sa klase ug unsaon nimo pagtabang ang mga sakop sa klase nga makat-on gikan niini nga mga bersikulo.

Irekord ang Imong mga Impresyon

Dapita ang Pagpaambit

Mahimo nimong sugdan ang imong klase sa pagtuon sa Doktrina ug mga Pakigsaad pinaagi sa pagpangutana sa mga sakop sa klase kon unsay ilang gibati mahitungod sa pagtuon niini nga basahon sa kasulatan karong tuiga. Unsa nga mga tudling gikan sa seksyon 1 ang nakatabang kanila nga mobati og kahinam sa pagbasa sa Doktrina ug mga Pakigsaad? Tingali mahimo nimo silang hangyuon sa pagsiksik sa seksyon 1 alang sa usa ka bersikulo nga ilang mapaambit kon mosulay sila sa pagdani sa usa ka tawo sa pagbasa niining sagrado nga basahon.

Itudlo ang Doktrina

Doktrina ug mga Pakigsaad 1

Ang Ginoo nagdapit kanato nga “siksika kini nga mga sugo.”

• Samtang imong hisgutan ang “pasiuna” sa Ginoo sa Doktrina ug mga Pakigsaad (bersikulo 6), mahimong makatabang sa usa ka tawo diha sa klase sa pagpasabut kon unsa ang pasiuna ug ang katuyoan niini diha sa basahon. Dayon ang klase mahimong maghisgot kon sa unsang paagi ang seksyon 1 nakatuman niana nga katuyoan sa Doktrina ug mga Pakigsaad. Sama pananglit, unsa nga mga tema sa basahon ang gipaila diha sa seksyon 1? Unsa ang mga katuyoan sa basahon? Unsay atong makita niini nga seksyon nga makaimpluwensya sa paagi sa atong pagbasa sa Doktrina ug mga Pakigsaad niining tuiga?

• Ang outline niini nga semana sa Dali, Sunod Kanako—Alang sa mga Indibidwal ug mga Pamilya nagdapit kanato sa pagkonsiderar kon unsaon nato pagbuhat ang sugo sa Ginoo nga “siksik[on] kini nga mga sugo” (bersikulo 37). Tingali ang mga sakop sa klase mahimong mopaambit kon unsay plano nilang buhaton karong tuiga aron mahimong makahuluganon ang ilang pagtuon sa Doktrina ug mga Pakigsaad. Unsa ang ilang siksikon? Sa unsang paagi ang pagsiksik lahi kay sa pagbasa lamang? Unsa nga mga pamaagi sa pagtuon ang ilang nakita nga labing makatabang?

Doktrina ug mga Pakigsaad 1:1–6, 23–24, 37–39

Ang Dios mamulong pinaagi sa Iyang mga sulugoon, ug ang Iyang mga pulong matuman.

• Daghan kanato adunay mga sakop sa pamilya, mga higala, ug mga kaila kinsa dili sama kanato og mga gituohan mahitungod sa buhing mga propeta. Tingali ang mga sakop sa klase mahimong mopaambit og mga kamatuoran nga ilang nakit-an diha sa seksyon 1 nga mahimo nilang gamiton sa pagtubag sa usa ka tawo kinsa mosukna sa ilang mga gituohan mahitungod sa mga propeta. Mahimo nimong isugyot nga diha nila pangitaon sa mga bersikulo 1–6 ug 37–39. Unsa ang gitudlo niini nga mga bersikulo mahitungod sa Ginoo ug sa Iyang mga propeta?

• Ang mga sakop sa klase mahimong interesado nga makat-on nga sa dihang ang usa ka konseho nga gipatawag ni Joseph Smith naghisgot sa pagmantala sa mga pinadayag sa Propeta, ang ubang mga sakop sa konseho misupak sa ideya. Naulaw sila sa dili kaayo hanas nga pagsulat ni Joseph, ug nabalaka sila nga ang pagmantala sa mga pinadayag mahimong makahatag og dugang nga mga problema sa mga Santos (tan-awa sa Mga Santos, 1:160–63). Sa unsang paagi nga ang seksyon 1 mitubag niini nga mga kabalaka? (tan-awa, pananglitan, sa mga bersikulo 6, 24, 38).

• 

  Ang Dios mamulong kanato pinaagi sa Iyang mga sulugoon.

Doktrina ug mga Pakigsaad 1:12–30, 35–36

Ang Ginoo mipahiuli sa Iyang ebanghelyo aron sa pagtabang kanato sa pag-atubang sa mga hagit sa ulahing mga adlaw.

• Unsa ang mga hunahuna sa mga sakop sa klase samtang nagbasa sila sa deskripsyon sa katapusang mga adlaw diha sa mga bersikulo 13–16? Unsa ang nagpanghitabo sa kalibutan karon nga nagtuman niining gipanagna nga mga deskripsyon? Awhaga ang mga sakop sa klase sa pagpaambit og bisan unsa nga ilang nakit-an diha sa seksyon 1 nga nakatabang nila nga mobati og kalinaw ug pagsalig bisan pa sa mga hagit sa atong panahon.

• Aron sa pagtabang sa mga sakop sa klase sa pagpamalandong sa mga panalangin nga anaa kanato tungod kay napahiuli na ang ebanghelyo, mahimo nimong isulat sa pisara ang Unsay gitudlo sa mga bersikulo 17–23 kon nganong gipahiuli sa Ginoo ang Iyang ebanghelyo? Ang mga sakop sa klase mahimong mosiksik niini nga mga bersikulo ug mopaambit sa ilang mga hunahuna sa usag usa. Sama pananglit, sa unsang paagi ang mga kamatuoran nga gipahiuli pinaagi ni Joseph Smith nakatabang kanato nga mapalambo ang atong pagtuo? (tan-awa sa bersikulo 21).

Doktrina ug mga Pakigsaad 1:19–28

Ang Ginoo mogamit sa “mahuyang ug yano” aron sa pagtuman sa Iyang buhat.

• Usa ka importante nga tema sa Doktrina ug mga Pakigsaad 1 mao ang tahas sa “mahuyang ug yano” diha sa dakong buhat sa Ginoo sa ulahing mga adlaw (bersikulo 23). Dapita ang mga sakop sa klase sa pagsiksik sa mga bersikulo 19–28 aron makat-on kon sa unsang paagi ang mga pulong nga “mahuyang” ug “yano” magamit kanato isip mga sulugoon sa Ginoo. Samtang mopaambit sila sa unsay ilang nakit-an, mahimo nimong hisgutan ang mga pangutana nga sama niini: Unsa nga mga kinaiya ang gusto sa Ginoo nga maanaa sa Iyang mga sulugoon? Unsa ang mabuhat sa Ginoo pinaagi sa Iyang mga sulugoon sa ulahing mga adlaw? Sa unsang paagi ang mga panagna niini nga mga bersikulo natuman sa tibuok kalibutan ug sa atong kaugalingon nga kinabuhi?

Pagpalambo sa Atong Pagtudlo

Tabangi ang mga tigkat-on nga ipahisama ang mga kasulatan ngadto sa ilang kaugalingon. Ang samang mga kamatuoran nga midasig sa unang mga Santos makatabang kanato sa pag-atubang sa atong mga hagit karon. Samtang magtudlo ka sa Doktrina ug mga Pakigsaad, tabangi ang mga sakop sa klase nga makahimo og koneksyon tali sa mga mensahe sa Ginoo ngadto ni Joseph Smith ug unsa ang mahimong isulti sa Ginoo kanila sa personal nga paagi. (Tan-awa sa Pagtudlo sumala sa Pamaagi sa Manluluwas, 21.)