Sagradong Kakahoyan, ni Greg K. Olsen

Enero 4–10

Joseph Smith—Kasaysayan 1:1–26

“Ako Nakakita og usa ka Dako nga Gilis sa Kahayag”

Hinumdumi nga ang imong labing importante nga pagpangandam mao ang pagtuon sa mga kasulatan ug pagsunod sa unsay imong nakat-unan. Ang Espiritu makatabang kanimo nga masayud kon unsa ang tutokan diha sa klase.

Irekord ang Imong mga Impresyon

Dapita ang Pagpaambit

Unsa nga mga ideya ang nakuha sa mga sakop sa klase samtang nagtuon sila sa Joseph Smith—Kasaysayan 1:1–26 niining semanaha? Tingali mahimo ka nga mopakita og litrato ni Joseph Smith o sa Unang Panan-awon ug modapit sa mga sakop sa klase sa pagsulat sa pisara og mga ideya gikan sa ilang pagtuon, uban sa mga bersikulo diin didto nila nakita. Mahimo usab silang mopaambit kon sa unsang paagi ang ilang mga pagpamatuod ni Joseph Smith ug sa iyang misyon mitubo samtang nakat-on sila mahitungod kaniya niining semanaha.

Itudlo ang Doktrina

Joseph Smith—Kasaysayan 1:5–18

Kon mangayo kita uban sa hugot nga pagtuo, ang Dios motubag kanato.

• Ang mga sakop sa imong klase tingali makasabut sa tinguha ni Joseph nga mangita sa kamatuoran sa usa ka kalibutan diin gitudlo ang daghang nagkasukwahi nga mga ideya. Sa unsang paagi ang kalibug sa atong panahon susama sa iyang giatubang? Aron matabangan ang mga sakop sa klase nga makakita kon sa unsang paagi nga makakaplag kita og mga tubag sa atong mga pangutana, mahimo nimo silang dapiton sa paglista diha sa pisara sa lain-laing paagi nga ang mga tawo magtinguha og kamatuoran. Dayon mahimo nilang ribyuhon ang Joseph Smith—Kasaysayan 1:5–18 ug idugang sa lista unsay gibuhat ni Joseph Smith aron makakita og mga tubag sa iyang mga pangutana.

• Ang mga sakop sa klase mahimong mopaambit kon giunsa nila pagsunod ang ehemplo ni Joseph Smith sa ilang pagpangita sa kamatuoran ug sa unsang paagi nga gitubag sila sa Dios. Ang pamahayag ni Presidente Russell M. Nelson diha sa “Dugang nga mga Kapanguhaan” nagsugyot og pipila ka paagi nga magtinguha kita og kamatuoran gikan sa Dios.

  

  Ang pag-ampo nagtugot kanato sa pagpakigsulti sa Dios.

Joseph Smith—Kasaysayan 1:15–20

Nakita ni Joseph Smith ang Dios nga Amahan ug ang Iyang Anak, si Jesukristo.

• Ang Unang Panan-awon mipadayag og pipila ka kamatuoran mahitungod sa Dios nga misupak sa gituohan sa daghang tawo sa panahon ni Joseph. Ang mga sakop sa klase mahimong mobasa sa Joseph Smith—Kasaysayan 1:15–20 ug moila og usa ka butang nga ilang nakat-unan mahitungod sa Dios. Nganong importante man nga mahibalo niini nga mga kamatuoran mahitungod sa Dios?

• Kon mobisita si Joseph Smith sa atong klase, unsa ang atong ipangutana kaniya mahitungod sa iyang kasinatian? Tingali mahimo silang mamalandong kon unsaon nila sa pagkompleto ang kapahayag nga sama niini: “Tungod kay nahitabo ang Unang Panan-awon, nasayud ako nga …” Unsa nga mga panalangin ang miabut sa atong kinabuhi tungod sa Unang Panan-awon?

• Aron makadugang sa diwa sa inyong diskusyon, ang mga sakop sa klase mahimong mobasa o manganta sa “Ang Unang Pag-ampo ni Joseph Smith” (Mga Himno, nu. 21). Unsay natabang niini nga himno nga atong sabton ug bation mahitungod sa Unang Panan-awon? Tingali ang pipila ka mga sakop sa klase mahimong mopaambit kon giunsa nila pagkasayud sa ilang kaugalingon nga si Joseph nakakita gayud sa Dios nga Amahan ug ni Jesukristo diha sa Sagradong Kakahoyan. O mahimo nimong dapiton ang mga misyonaryo (o bag-ong nauli nga misyonaryo) sa pagbisita sa klase ug sa paghisgot kon sa unsang paagi ang Unang Panan-awon nakaimpluwensya sa kinabuhi sa mga tawo nga ilang gitudloan.

Joseph Smith—Kasaysayan 1:21–26

Mahimo kitang magpabilin nga matinuoron sa unsay atong nahibaloan, bisan kon ang uban mosalikway kanato.

• Ang mga sakop sa klase mahimong makasabut sa pipila sa mga butang nga nasinati ni Joseph Smith sa dihang misugod siya sa pagsulti sa ubang mga tawo mahitungod sa iyang panan-awon (tan-awa sa Joseph Smith—Kasaysayan 1:21–26). Tingali mahimo silang mopaambit og mga tudling nga nakadasig kanila sa dihang ang uban mihagit sa ilang mga gituohan.

• Kon nakaila kamo og mga miyembro sa ward kinsa nakasinati og oposisyon tungod kay mga miyembro sila sa Simbahan, ikonsiderar ang paghangyo kanila sa pag-anha sa klase nga andam mopaambit kon giunsa nila nga magpabiling lig-on ang ilang pagtuo. Unsa ang atong makat-unan gikan sa ehemplo ni Joseph Smith diha sa Joseph Smith—Kasaysayan 1:21–26?

Dugang nga mga Kapanguhaan

Sunda ang ehemplo ni Joseph.

Si Presidente Russell M. Nelson mitudlo:

“Si Propeta Joseph Smith mipahiluna og sumbanan nga atong sundon sa pagtubag sa atong mga pangutana. Naaghat sa panaad ni Santiago nga kon kita nakulangan og kaalam kita makapangayo sa Dios [tan-awa ang Santiago 1:5], ang batang si Joseph midala sa iyang pangutana direkta ngadto sa Langitnong Amahan. Nangayo siya og personal nga pagpadayag, ug ang iyang pagpangita miabli niining katapusang dispensasyon.

“Sa sama nga paagi, unsa ang maabli diha kaninyo sa inyong pagpangita? Unsa nga kaalam ang kulang kaninyo? Unsa ang inyong gibati nga maoy dinaliang panginahanglan nga mahibaloan o masabtan? Sunda ang ehemplo ni Propeta Joseph. Pangita ug mingaw nga lugar diin kamo kanunay makaadto. Ipaubos ang inyong kaugalingon atubangan sa Dios. Ibubo ang inyong kasingkasing ngadto sa inyong Langitnong Amahan. Dangop Kaniya alang sa mga tubag ug alang sa kahupayan” (“Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 95).

Unang Panan-awon ni Joseph Smith.

Aron mobasa og deskripsyon sa Unang Panan-awon nga kinuha gikan sa pipila ka mga asoy ni Joseph Smith, tan-awa ang Mga Santos, 1:15–18.

Pagpalambo sa Atong Pagtudlo

Pagtinguha og imong kaugalingon nga inspirasyon. Ayaw og hunahunaa kini nga mga outline isip mga instruksyon nga kinahanglan gayud nimong sundon samtang magtudlo ka. Hinoon, gamita kini aron sa pagsugod og mga ideya ug pag-ugmad og inspirasyon samtang mamalandong ka sa doktrina diha sa mga kasulatan ug sa mga panginahanglan sa mga tawo nga imong gitudloan.