Gitawag Ko Niya pinaagi sa Akong Ngalan, ni Michael Malm

Enero 11–17

Doktrina ug mga Pakigsaad 2; Joseph Smith—Kasaysayan 1:27–65

“Ang Kasingkasing sa mga Anak Mobati ngadto sa Ilang mga Amahan”

Sa dili pa nimo basahon ang mga ideya niini nga outline, tun-i ang Doktrina ug mga Pakigsaad 2 ug Joseph Smith—Kasaysayan 1:27–65, ug irekord ang imong espiritwal nga mga impresyon.

Irekord ang Imong mga Impresyon

Dapita ang Pagpaambit

Aron maawhag ang mga sakop sa klase sa pagpaambit sa ilang mga ideya ug mga kasinatian samtang nagtuon sila niini nga mga kasulatan, mahimo nimo silang hangyuon sa pagpaambit og usa ka bersikulo nga nakapahimo nila sa pagpamalandong nga mas lawom kay sa naandan. Unsay nakapadani nila mahitungod niana nga bersikulo?

Itudlo ang Doktrina

Joseph Smith—Kasaysayan 1:27–65

Si Joseph Smith gitawag sa Dios sa paghimo sa Iyang buhat.

• Makabenepisyo ba ang imong klase sa pagribyu sa istorya diha sa Joseph Smith—Kasaysayan 1:27–65? Mahimo ka nga modapit og usa ka sakop sa klase sa pag-summarize niini, o ang mga sakop sa klase mahimong mosaysay sa istorya ngadto sa usag usa nga magparis o diha sa ginagmay nga mga grupo. Awhaga sila sa paglakip sa labing daghang detalye nga ilang mahinumduman. Sa unsang paagi kini nga istorya makalig-on sa atong mga pagpamatuod sa balaang tawag ni Joseph Smith? Unsa nga mga leksyon ang atong makat-unan gikan niini nga istorya kon unsaon sa Dios sa pagbuhat ang Iyang buhat?

• Ikonsiderar ang pagpakita og mga butang o mga litrato nga may kalabutan sa trabaho nga gipabuhat kang Joseph Smith, sama sa Basahon ni Mormon o litrato sa usa ka templo. Ang mga sakop sa klase mahimong makakita og mga bersikulo diha sa Joseph Smith—Kasaysayan 1:33–42 nga nagtudlo mahitungod niini nga mga aspeto sa misyon sa Propeta. Unsay kalabutan sa buhat sa Dios alang ni Joseph Smith ngadto sa buhat sa Dios alang kanato? Unsa ang gitudlo kanato sa atong buhi nga mga propeta mahitungod niini nga buhat?

Doktrina ug mga Pakigsaad 2

Si Elijah mianhi aron sa pagpabalik sa atong mga kasingkasing ngadto sa atong katigulangan.

• Makabenepisyo ba ang imong klase sa usa ka diskusyon kon kinsa si Elias ug sa gahum sa pagsilyo nga iyang gipahiuli? Ang mga sakop sa klase mahimong mobasa mahitungod ni Elijah diha sa Giya ngadto sa mga Kasulatan o moribyu og istorya gikan sa iyang kinabuhi (tan-awa sa 1 Mga Hari 17–18). Unsay nadugang niini nga impormasyon sa atong pagsabut sa Doktrina ug mga Pakigsaad 2? Mahimo usab nga maghisgot ka kon unsay gipasabut sa pagsilyo og usa ka butang. Tingali makatabang ang pipila ka butang, sama sa delata nga pagkaon, tipiganan nga plastik bag nga dunay zipper lock, o usa ka silyo nga nanghimatuod sa usa ka dokumento. Sa unsang paagi kini nga mga butang makatabang kanato sa pagsabut kon unsay gipasabut sa pagsilyo sa mga pamilya aron mahiusa? Sa unsang paagi kini nga gahum makatabang sa pagtuman sa katuyoan sa paglalang sa kalibutan? (tan-awa ang Doktrina ug mga Pakigsaad 138:47–48 ug ang pamahayag ni Presidente Russell M. Nelson diha sa “Dugang nga mga Kapanguhaan”). Aron matabangan ang mga sakop sa klase nga makakita kon sa unsang paagi ang panagna diha sa Doktrina ug mga Pakigsaad 2 natuman, mahimo nimong hisgutan ang Doktrina ug mga Pakigsaad 110:13–16.

• Tingali ang pagkat-on mahitungod sa “mga saad nga gihimo ngadto sa mga amahan” (Doktrina ug mga Pakigsaad 2:2) makatabang niadtong imong gitudloan nga mas makasabut sa gahum sa pagkapari diin gipadala si Elijah aron ipahiuli. Kinsa ang “mga amahan”? (tan-awa sa Doktrina ug mga Pakigsaad 27:9–10). Unsa ang mga saad nga gihimo sa Ginoo ngadto ni Abraham, Isaac, ug Jacob? (tan-awa sa Genesis 17:1–8; 22:16–18; 26:1–5, 24; 28:11–15; Abraham 2:8–11). Unsay gipasabut sa “[pag]tanom” niini nga mga saad sa atong mga kasingkasing? Sa unsang paagi ang pagbuhat niini makatabang kanato nga mobati ang atong mga kasingkasing ngadto sa atong katigulangan?

Palmyra New York Temple

• Aron madasig ang mga sakop sa klase nga mobati ang ilang mga kasingkasing ngadto sa ilang katigulangan, mahimo ka nga modapit og pipila ka miyembro nga mangulo og diskusyon kabahin sa hilisgutan. Ikonsiderar ang pagpaapil sa ward temple ug family history consultant. Mahimo nimong sugdan pinaagi sa pagbasa sa Doktrina ug mga Pakigsaad 2:2–3 ug sa pagdapit sa mga lider sa diskusyon sa pagpaambit og mga kasinatian diin ang ilang mga kasingkasing mibati ngadto sa ilang katigulangan. Unsay nahitabo sa ilang kinabuhi nga nakatabang nila nga gustong magkat-on mahitungod sa kasaysayan sa ilang pamilya? Unsa nga mga sugyot ang ilang mahatag sa pagtabang sa ubang mga sakop sa klase nga malambigit sa kasaysayan sa pamilya ug serbisyo sa templo? Ang pamahayag ni Presidente Dallin H. Oaks diha sa “Dugang nga mga Kapanguhaan” makadasig usab sa mga sakop sa klase. Mahimo usab nimong itudlo ang mga sakop ngadto sa FamilySearch.org alang sa mga ideya.

Dugang nga mga Kapanguhaan

Ang katuyoan sa Paglalang.

Si Presidente Russell M. Nelson mitudlo:

“Ang kinabuhing dayon, nga nahimong posible pinaagi sa Pag-ula, mao ang labing taas nga katuyoan sa Paglalang. Sa paghan-ay niana nga pamahayag sa negatibong porma niini, kon ang mga pamilya dili masilyo sa balaang mga templo, ang tibuok kalibutan hingpit nga malaglag.

“Ang mga katuyoan sa Paglalang, ang Pagkapukan, ug ang Pag-ula tanan mahiusa diha sa sagradong buhat nga gihimo sa mga templo sa Ang Simbahan ni Jesukristo sa mga Santos sa Ulahing mga Adlaw” (“The Atonement,” Ensign, Nob. 1996, 35). Tan-awa usab ang Moises 1:39.

Ang tanan adunay mabuhat.

Si Presidente Dallin H. Oaks mitudlo: “Sa buhat sa pagtubos sa mga patay daghang mga buluhaton ang kinahanglang ipahigayon. … Ang atong paningkamot dili ang pagpugos sa tanan nga buhaton ang tanan, apan sa pag-awhag sa tanan nga adunay buhaton” (“Family History: ‘In Wisdom and in Order,’” Ensign, Hunyo 1989, 6).

Pagpalambo sa Atong Pagtudlo

Ilakip ang mga tigkat-on nga wala magtuon sa mga kasulatan diha sa panimalay. Siguroa nga ang tanang sakop sa klase mobati nga komportable sa pag-apil ug pagtampo ngadto sa diskusyon, bisan kadtong tingali wala makabasa sa ilang balay.