Christus statue

Marso 29–Abril 4

Pasko sa Pagkabanhaw

“Ako Mao Siya Kinsa Nabuhi, Ako Mao Siya Kinsa Gipatay”

Walay mas importante pa nga kinahanglan natong masabtan kay sa Pag-ula ni Jesukristo. Hunahunaa ang mga tawo nga motambong sa imong klase; unsay makatabang nila nga mapalambo ang ilang pagtuo kang Jesukristo?

Irekord ang Imong mga Impresyon

icon sa pagpaambit

Dapita ang Pagpaambit

Tungod kay ang mga sakop sa imong klase nakatuon sa Doktrina ug mga Pakigsaad niining tuiga, tingali nakakita sila og mga tudling mahitungod sa Manluluwas nga makahuluganon kanila. Sugdi ang klase pinaagi sa paghatag kanila og mga oportunidad sa pagpaambit niini nga mga tudling. Sa unsang paagi ang atong pagtuon sa Doktrina ug mga Pakigsaad nakapalig-on sa atong pagtuo kang Jesukristo?

icon sa pagtudlo

Itudlo ang Doktrina

Si Jesukristo nakahimo og “hingpit nga pag-ula.”

• Tungod kay ang Pag-ula ni Jesukristo mahinungdanon kaayo nga doktrina, ikonsiderar ang paggahin og igong panahon sa pagsiguro nga ang mga sakop sa klase nakasabut niini. Aron mabuhat kini, mahimo nimong isulat sa pisara ang mga pangutana nga sama niini: Unsa man ang Pag-ula ni Jesukristo? Sa unsang paagi kini makaapekto sa akong inadlaw-adlaw nga kinabuhi? Sa unsang paagi kini makaapekto sa akong kinabuhing dayon? Unsaon nako pagdawat sa matubsanong gahum sa Manluluwas sa akong kinabuhi? Hatagi ang mga sakop sa klase og pipila ka minuto sa pagpamalandong niini nga mga pangutana ug sa pagpangita og mga kasulatan nga makatabang sa pagtubag niini. Ang mga sakop sa klase mahimong mosulat sa ilang mga pakisayran nga kasulatan diha sa pisara, ug mahimo ninyong hisgutan sa tibuok klase ang pipila niini. Ania ang pipila ka ehemplo: Lucas 22:39–44; 1 Juan 1:7; 2 Nephi 2:6–9; Mosiah 3:5–13, 17–18; Alma 7:11–14; Moroni 10:32–33; Doktrina ug mga Pakigsaad 19:16–19; 45:3–5.

• Mahimo nimong dapiton ang mga sakop sa klase sa pagbasa sa kaugalingong mga pulong sa Manluluwas mahitungod sa Iyang pag-antus diha sa Doktrina ug mga Pakigsaad 19:16–19. Sa unsang paagi kini nga mga bersikulo makapalambo sa atong pagsabut sa sakripisyo ni Jesukristo?

  Si Jesus Nag-ampo

  Ginoo sa Pag-ampo, ni Yongsung Kim

Doktrina ug mga Pakigsaad 76:11–14, 20–24; 110:1–10

Si Propeta Joseph Smith mipamatuod nga si Jesukristo buhi.

• Nakita ni Joseph Smith ang nabanhaw nga Manluluwas ug mihatag og gamhanang pagsaksi nga si Jesukristo buhi. Aron matabangan ang mga sakop sa klase sa pagtuon sa pagpamatuod ni Joseph Smith, mahimo nimo silang bahinon ngadto sa duha ka grupo ug sanguni ang matag grupo sa pagbasa sa bisan hain sa Doktrina ug mga Pakigsaad 76:11–14, 20–24 o 110:1–10. Dapita ang matag sakop sa klase sa pagpangita og labing minos usa ka pulong niini nga mga bersikulo nga naghulagway sa Manluluwas. Ang mga sakop sa klase mahimong magpuli-puli sa pagsulat sa mga pulong nga ilang nakit-an diha sa pisara, ug mahimo nimong gamiton kini nga mga pulong sa paggiya og diskusyon mahitungod sa mga kinaiya ug gahum sa Manluluwas. Sa unsang paagi ang pagpamatuod ni Joseph Smith makalig-on sa atong pagtuo sa kabalaan ug misyon ni Jesukristo?

• Ang pipila ka mga sakop sa klase tingali nakakonektar sa mga pagtulun-an diha sa Doktrina ug mga Pakigsaad ngadto sa mga pulong ug mga baruganan diha sa himno nga “Ako Nasayud nga Akong Manunubos Buhi” (Mga Himno, nu. 80; tan-awa ang outline niini nga semana sa Dali, Sunod Kanako—Alang sa mga Indibidwal ug mga Pamilya). Tingali andam sila nga mopaambit sa unsay ilang nadiskubrihan. Mahimo usab ninyong basahon o kantahon sa tibuok klase kini nga himno ug mangita og mga koneksyon sa mosunod nga mga kasulatan: Doktrina ug mga Pakigsaad 6:34; 45:3–5; 84:77; 98:18; 138:23. Sa unsang paagi nato nasayran nga ang atong Manunubos buhi?

Doktrina ug mga Pakigsaad 29:26–27; 42:45–46; 63:49; 88:14–17, 27–31; 93:33–34

Tungod ni Jesukristo, kita mabanhaw.

• Aron matabangan ang mga sakop sa klase sa paghisgot kon unsay gitudlo sa Doktrina ug mga Pakigsaad mahitungod sa pagkabanhaw, mahimo nimo silang dapiton sa paghunahuna nga ang usa ka higala o sakop sa pamilya nangutana kon unsay gipasabut nga mabanhaw. Unsaon nato pagtabang kana nga tawo nga makasabut kon unsa ang pagkabanhaw? Awhaga ang mga sakop sa klase sa pagsiksik sa Doktrina ug mga Pakigsaad 88:14–17, 27–31 alang sa usa ka butang nga makatabang. Ang ubang makatabang nga mga pakisayran sa kasulatan naglakip sa Alma 11:40–45 ug Alma 40:21–23. Unsa ang atong ipaambit sa pagtabang sa atong higala o sakop sa pamilya nga mobati sa kalipay ug paglaum nga naggikan sa doktrina sa pagkabanhaw?

• Unsaon nimo pagtabang ang mga sakop sa klase nga mamalandong sa gasa sa Manluluwas nga pagkabanhaw? Tingali mahimo nimong isulat sa pisara ang Tungod ni Jesukristo … ug dapiton ang mga sakop sa klase sa pagpangita og mga pulong sa mosunod nga mga tudling nga makakompleto niini nga hugpong sa mga pulong: Doktrina ug mga Pakigsaad 29:26–27; 42:45–46; 63:49; 93:33–34. Sa unsang paagi ang mga kamatuoran niini nga mga bersikulo makaapekto sa paagi sa atong pagtan-aw sa kamatayon? Sa unsang paagi kini makaapekto sa atong inadlaw-adlaw nga pagpuyo?

icon sa dugang nga mga kapanguhaan

Dugang nga mga Kapanguhaan

Mga video sa Pasko sa Pagkabanhaw diha sa ChurchofJesusChrist.org.

“Siya Buhi - Sauloga ang Pasko sa Pagkabanhaw Tungod kay si Jesukristo Buhi”

“Tungod Kaniya”

Pagpalambo sa Atong Pagtudlo

Tabangi ang mga sakop sa klase sa pagsiksik sa mga kasulatan. “Pangutana og mga pangutana nga magkinahanglan sa mga tigkat-on sa pagpangita og mga tubag diha sa mga kasulatan. … Tabangi sila nga makakita nga bisan tuod ang mga kasulatan gisulat daghang katuigan na ang milabay, naglangkob kini sa mga tubag sa Ginoo sa mga pangutana ug mga problema nga giatubang natong tanan” (Pagtudlo sumala sa Pamaagi sa Manluluwas, 30).