Abril 5–Abril 11

Doktrina ug mga Pakigsaad 30–36

“Ikaw Gitawag sa Pagsangyaw sa Akong Ebanghelyo”

Samtang imong basahon ang Doktrina ug mga Pakigsaad 30–36, unsa nga mga mensahe ang gibati nimo nga makahuluganon sa imong mga gitudloan? Unsa ang makatabang sa pagdasig kanila sa pagpaambit sa ebanghelyo ngadto sa uban?

Irekord ang Imong mga Impresyon

Dapita ang Pagpaambit

Tingali ang mga sakop sa klase mahimong mopaambit og usa ka butang nga ilang nabasa sa Doktrina ug mga Pakigsaad 30–36 nga nagdasig kanila sa pagpaambit sa ebanghelyo.

Itudlo ang Doktrina

Doktrina ug mga Pakigsaad 30–36

Gitawag kita sa pagsangyaw sa ebanghelyo ni Jesukristo.

• Ang outline niini nga semana sa Dali, Sunod Kanako—Alang sa mga Indibidwal ug mga Pamilya nagsugyot sa pagsiksik sa Doktrina ug mga Pakigsaad 30–36 sa unsay gipabuhat sa Ginoo sa Iyang mga misyonaryo ug unsa ang gisaad Niya kanila. Ang mga sakop sa klase mahimong mopaambit sa unsay ilang nakit-an. (Tan-awa, sama pananglit, ang Doktrina ug mga Pakigsaad 30:8; 31:3–5; 32:1, 5; 35:24.) Tingali mahimo nimo silang dapiton sa pagsulat ngadto sa usa ka tawo nga nagserbisyo karon o nangandam sa pagserbisyo og misyon ug molakip sa pipila sa mga instruksyon ug mga saad sa Ginoo.

• Nagtudlo ka ba og mga batan-on kinsa nangandam nga moserbisyo isip mga misyonaryo? Kon mao, mahimo nimong dapiton ang matag sakop sa klase sa pagsiksik og usa ka seksyon gikan sa Doktrina ug mga Pakigsaad 30–36 ug sa pagpangita og usa ka butang nga makadasig kanila sa pagserbisyo. Mahimo nimong ipasabut nga ang mga misyonaryo nga gihisgutan niini nga mga seksyon bag-o ug walay kasinatian diha sa Simbahan. Unsa ang nakahimo nilang kwalipikado sa pagpaambit sa ebanghelyo?

• Dili tanan ang dunay oportunidad nga makaserbisyo og full-time nga misyon, apan makadapit kitang tanan sa uban sa pagduol kang Kristo ug sa pagpaminaw sa mensahe sa Pagpahiuli. Ang mga sakop sa klase pwedeng mohimo og lista sa lain-laing paagi nga ilang “abli[han] ang [ilang] mga baba” (Doktrina ug mga Pakigsaad 33:8–10). Unsa ang pipila ka natural nga mga oportunidad nga aduna kita sa pagpaambit sa atong mga gituohan ngadto sa uban? Unsa nga tambag diha sa Doktrina ug mga Pakigsaad 30–36 ang magamit sa pagpaambit sa ebanghelyo niini nga mga paagi? Ikonsiderar ang paghangyo sa pipila ka sakop sa klase kinsa adunay positibong mga kasinatian sa pagpaambit sa ebanghelyo nga mopaambit sa ilang mga ideya ug motubag sa mga pangutana sa klase.

• Ang Ginoo misaad kang Ezra Thayer ug Northrop Sweet nga kon ilang ablihan ang ilang mga baba sa pagpaambit sa ebanghelyo, sila “mahimo nga sama kang Nephi sa karaan” (Doktrina ug mga Pakigsaad 33:8). Unsa ang mga kinaiya ni Nephi nga may kalabutan sa pagpaambit sa ebanghelyo? (tan-awa, sama pananglit, ang 1 Nephi 3:7; 4:6; 10:17; 17:15; 2 Nephi 1:27–28). Sa unsang paagi nga makatabang kanato kini nga mga kinaiya sa atong mga paningkamot sa pagpaambit sa ebanghelyo?

  

  Ang Ginoo mihangyo kanato sa pagsangyaw sa ebanghelyo sa atong panahon sama sa sayong bahin sa Simbahan.

Doktrina ug mga Pakigsaad 32–33; 35

Ang Ginoo nag-andam kanato alang sa buhat nga gusto Niya nga atong buhaton.

• Sa unsang paagi ang Ginoo mitabang kanato sa pagbuhat sa Iyang buhat? Usa ka diskusyon mahitungod sa kinabuhi sa mga tawo nga gihulagway diha sa Doktrina ug mga Pakigsaad 32–33, 35 mahimong maayo nga sinugdanan sa pagpamalandong niini nga mga kasinatian. Sama pananglit, mahimo nimong ipaambit sa klase ang istorya ni Ezra Thayer sa iyang panan-awon diha sa “Dugang nga mga Kapanguhaan” ug dayon dapita ang mga sakop sa klase sa pagbasa sa Doktrina ug mga Pakigsaad 33:1–13, nga parte sa usa ka pinadayag ngadto ni Ezra Thayer. Giunsa pag-andam sa Ginoo si Ezra alang sa buhat nga gustong ipabuhat sa Ginoo kaniya? (tan-awa sa Doktrina ug mga Pakigsaad 33:2). Mahimo usab nimong hangyoon ang usa ka sakop sa klase sa pagpaambit og background nga impormasyon mahitungod sa relasyon tali ni Parley P. Pratt ug Sidney Rigdon (tan-awa ang “Mga Tingog sa Pagpahiuli: Mga Pagpamatuod sa Unang mga Kinabig” diha sa Dali, Sunod Kanako—Alang sa mga Indibidwal ug mga Pamilya). Sa unsang paagi kini nga relasyon mipanalangin sa Simbahan? Unsa nga ebidensya ang atong makita nga ang impluwensya sa Ginoo anaa sa kinabuhi niining mga tawhana? Tingali ang mga sakop sa klase mahimong mopaambit og mga kasinatian nga nakatabang kanila nga makakita nga ang Ginoo nahibalo kanila sa susamang paagi.

Dugang nga mga Kapanguhaan

Ang panan-awon ni Ezra Thayer.

Si Ezra Thayer misulat nga sa wala pa siya mabunyagi, aduna siyay panan-awon diin “dunay miabut nga tawo ug midala kanako og linukot nga papel ug mipresentar niini kanako, ug usa usab ka trumpeta ug misulti nako sa [pagtugtog] niini. Giingnan nako siya nga wala pa gyud ko [makatugtog] og trumpeta sukad. Miingon siya nga [makatugtog] ka niini, sulayi lang. … Mihimo kini sa labing nindot nga tunog nga akong nadungog sukad” (“Revelation, October 1830–B, Revelation Book 1,” pasiunang kasaysayan, josephsmithpapers.org). Sa dihang si Joseph Smith sa wala madugay nakadawat og pinadayag alang ni Ezra Thayer ug Northrop Sweet, nga karon narekord diha sa Doktrina ug mga Pakigsaad 33, gisabut ni Ezra ang pinadayag nga mao ang linukot nga papel sa iyang panan-awon.

Pagpalambo sa Atong Pagtudlo

Awhaga ang pag-establisar og matinahurong palibut. “Tabangi ang imong mga sakop sa klase nga makasabut nga ang matag usa kanila makaapekto kon unsay bation sa klase. Awhaga sila nga motabang kanimo sa pag-establisar og usa ka bukas, mahigugmaon, ug matinahurong palibut aron ang tanan mobati nga luwas sa pagpaambit sa ilang mga kasinatian, mga pangutana, ug mga pagpamatuod” (Pagtudlo sumala sa Pamaagi sa Manluluwas, 15).