Jesukristo

Abril 19–25

Doktrina ug mga Pakigsaad 41–44

“Akong Balaod sa Pagdumala sa Akong Simbahan”

Dili nimo mahisgutan sa tibuok klase ang matag baruganan nga gitudlo diha sa Doktrina ug mga Pakigsaad 41–44. Pagtinguha og inspirasyon sa pagtabang kanimo sa pagpili og mga baruganan nga labing makahuluganon sa imong klase.

Irekord ang Imong mga Impresyon

icon sa pagpaambit

Dapita ang Pagpaambit

Sa dihang ang mga pinadayag sa seksyon 42 gimantala, misulat si Joseph Smith nga ang mga Santos “malipayong midawat niini” (“Letter to Martin Harris,” Feb. 22, 1831, josephsmithpapers.org). Awhaga ang mga sakop sa klase nga mopaambit og bisan unsa gikan sa ilang personal o tibuok pamilya nga pagtuon karong semanaha nga malipayon nilang gidawat.

icon sa pagtudlo

Itudlo ang Doktrina

Doktrina ug mga Pakigsaad 41–42

Ang mga balaod sa Dios nagdumala sa Iyang Simbahan ug makadumala sa atong kinabuhi.

• Sa Doktrina ug mga Pakigsaad 41, ang Ginoo mitabang sa mga Santos nga mangandam sa pagdawat sa Iyang balaod, nga Iyang ipadayag paglabay sa pipila lang ka adlaw (tan-awa sa seksyon 42). Sa unsang paagi ang pinadayag diha sa seksyon 41 nakatabang sa mga Santos sa pagdawat sa balaod sa Dios? Aron matabangan ang mga sakop sa klase sa pagtubag niining pangutana, mahimo nimo silang dapiton sa pagbasa sa Doktrina ug mga Pakigsaad 41:1–6 ug sa pagpangita og mga baruganan nga makatabang kanato sa pagdawat sa balaod sa Dios. Sa unsang paagi nato magamit kini nga mga baruganan kon aduna kitay mga oportunidad sa pagdawat og instruksyon gikan sa Ginoo?

• Ang outline niini nga semana sa Dali, Sunod Kanako—Alang sa mga Indibidwal ug mga Pamilya nagsugyot sa pagbahin sa seksyon 42 ngadto sa lima ka grupo sa mga bersikulo, nga ang matag usa nagpresentar og usa ka importanting baruganan sa ebanghelyo. Kini nga mga paggrupo makapasayon alang kanimo sa paghisgot niini nga seksyon isip klase. Sama pananglit, mahimo nimong isulat ang mga pakisayran sa pisara ug dapiton ang matag sakop sa klase sa pagpili og usa ka grupo. Hangyoa ang mga sakop sa klase sa pagbasa sa ilang mga bersikulo ug sa pagpangita og usa ka butang nga gibati nilang importante alang kanato sa atong panahon. Dayon mahimo silang mopaambit og mga ehemplo gikan sa ilang kaugalingong kinabuhi nga naghulagway kon sa unsang paagi kita mapanalanginan kon modumala kita sa atong kinabuhi sumala niini nga mga balaod.

Doktrina ug mga Pakigsaad 41:9–11

Ang Ginoo mihangyo sa Iyang mga sulugoon sa pagsakripisyo.

• Si Edward Partridge, ang unang bishop sa gipahiuli nga Simbahan, gisugo sa pagbiya sa iyang propesyon ug “mogugol sa iyang tanan nga panahon” sa pagserbisyo diha sa iyang calling. Bisan tuod wala kini kinahanglana kanato, unsa ang atong nakita niini nga mga bersikulo nga magamit sa atong pagserbisyo sa Dios?

Doktrina ug mga Pakigsaad 42:61, 65–68; 43:1–7

Ang pagpadayag nagdala og kalinaw, kalipay, ug kinabuhing dayon.

• Sama sa unang mga lider sa Simbahan, ang mga sakop sa imong klase tingali adunay mga pangutana nga daw “mga misteryo” tungod kay nagkinahanglan kini og giya gikan sa Ginoo. Mahimo nimo silang awhagon sa pagsulat sa usa nila ka pangutana o problema diin nagkinahanglan sila og personal nga pagpadayag. Unsay atong makit-an sa Doktrina ug mga Pakigsaad 42:61, 65–68 nga makatabang kanato samtang magtinguha kita og pagpadayag?

• Aron matabangan ang mga miyembro nga makasabut kon sa unsang paagi ang Dios mohatag og pagpadayag sa paggiya sa Iyang Simbahan, mahimo nimo silang dapiton sa pagbasa sa Doktrina ug mga Pakigsaad 43:1–7.

Doktrina ug mga Pakigsaad 43:8–10

Magpundok kita aron “magtudlo ug maghatag og kaayohan sa usag usa.”

• Unsaon nato paggamit ang Doktrina ug mga Pakigsaad 43:8–10 sa pagtudlo og tawo kinsa mibati nga dili na kinahanglang motambong sa mga miting sa Simbahan? Ang lista sa “Dugang nga mga Kapanguhaan” makatabang sa pagpatutok niini nga diskusyon sa balaanon nga mga katuyoan sa mga korum sa pagkapari ug sa Relief Society (ang lista magamit usab ngadto sa mga klase sa Young Women). Ang mga sakop sa klase mahimong mopaambit kon sa unsang paagi ang ilang pag-apil sa mga korum, Relief Society, ug mga klase sa Simbahan mipanalangin kanila. Unsay gipasabut sa mga bersikulo 8–10 kon unsay kinahanglan natong buhaton aron mangandam ug moapil sa atong mga miting?

  Klase sa Sunday School sa kabatan-onan

  Ang pagpundok diha sa simbahan maoy usa ka paagi nga kita “magtudlo ug maghatag og kaayohan sa usag usa.”

icon sa dugang nga mga kapanguhaan

Dugang nga mga Kapanguhaan

Nganong giorganisar kita ngadto sa mga korum ug mga Relief Society.

Si Sister Julie B. Beck, kanhi Kinatibuk-ang Presidente sa Relief Society, mipasabut nganong ang Dios miorganisar kanato ngadto sa mga korum sa pagkapari ug mga Relief Society:

1. “Aron sa pag-organisar kanato ubos sa pagkapari ug subay sa sumbanan sa pagkapari.”

2. “Aron mapatutok ang mga anak sa Langitnong Amahan diha sa buhat sa kaluwasan ug mapaapil sila niini. Ang mga korum ug mga Relief Society maoy naorganisar nga pagkadisipulo nga adunay responsibilidad sa pagtabang sa buhat sa atong Amahan sa pagpahinabo sa kinabuhing dayon sa Iyang mga anak.”

3. “Aron sa pagtabang sa bishop nga maalamong modumala sa balay tipiganan sa Ginoo. Ang balay tipiganan sa Ginoo naglakip sa ‘panahon, mga talento, kalooy, mga materyal, ug pinansyal nga mga kapanguhaan’ sa mga miyembro sa Simbahan [Handbook 2: Administering the Church, 6.1.3, ChurchofJesusChrist.org]. Ang mga talento sa mga Santos gamiton sa pagtabang sa pag-amuma sa mga kabus ug timawa ug sa pagtukod sa gingharian sa Ginoo.”

4. “Aron sa paghatag og depensa ug dangpanan alang sa mga anak sa Langitnong Amahan ug sa ilang mga pamilya sa ulahing mga adlaw.”

5. “Aron sa paglig-on ug pagsuporta kanato sa atong mga tahas ug mga responsibilidad sa pamilya isip mga anak sa Dios.” (“Why We Are Organized into Quorums and Relief Societies” [Debosyonal sa Brigham Young University, Ene. 17, 2012], speeches.byu.edu.)

Pagpalambo sa Atong Pagtudlo

Pag-imbitar. “Imbis nga kanunay nga mohatag og mga pagdapit sa pagbuhat og piho nga butang, ikonsiderar ang pagdapit sa mga tigkat-on sa paghunahuna og ilang kaugalingong mga paagi sa paggamit sa unsay ilang nakat-unan” (Pagtudlo sumala sa Pamaagi sa Manluluwas, 35).