Abril 26–Mayo 2

Doktrina ug mga Pakigsaad 45

“Ang mga Saad … Matuman”

Samtang magtuon ka sa Doktrina ug mga Pakigsaad 45, paghunahuna kon unsa nga mga bersikulo, mga kinutlo gikan sa mga lider sa Simbahan, mga kasinatian, mga pangutana, ug uban pang kapanguhaan ang mahimo nimong gamiton sa pagtudlo sa doktrina. Samtang magtudlo ka, dapita ang mga sakop sa klase sa pagrekord sa mga pag-aghat nga ilang madawat ug sa paghimo og plano sa pagsunod niini.

Irekord ang Imong mga Impresyon

Dapita ang Pagpaambit

Ang mga sakop sa klase mahimong mosulat sa usa ka pirasong papel sa numero sa bersikulo gikan sa Doktrina ug mga Pakigsaad 45 nga nakadasig kanila. Dayon mahimo nimong kolektahon ang mga papel, mopili og pipila nga pinasulagma, ug modapit sa mga sakop sa klase nga misulat niini sa pagbasa sa ilang mga bersikulo ngadto sa klase ug sa pagpaambit nganong mipili sila niini. Awhaga ang uban sa pagpaambit usab sa ilang mga panabut.

Itudlo ang Doktrina

Doktrina ug mga Pakigsaad 45:1–5

Si Jesukristo mao ang atong Manlalaban ngadto sa Amahan.

• Aduna bay usa sa inyong klase nga makahulagway kon unsa ang buhaton sa usa ka manlalaban? Tingali makatabang ang pagtan-aw sa kahulugan sa manlalaban diha sa diksyonaryo. Uban niini nga pagsabut, ang mga sakop sa klase mahimong mobasa sa Doktrina ug mga Pakigsaad 45:3–5 nga magparis. Mahimo silang mopaambit sa usag usa og bisan unsa nga mga pulong o hugpong sa mga pulong gikan niini nga mga bersikulo nga makatabang nila sa pagsabut sa tahas ni Jesukristo isip atong Manlalaban ngadto sa Amahan. (Tan-awa usab sa 2 Nephi 2:8–9; Mosiah 15:7–9; Moroni 7:27–28; Doktrina ug mga Pakigsaad 29:5; 62:1.) Ikonsiderar ang paghangyo sa mga sakop sa klase sa pagpaambit sa ilang mga pagbati mahitungod sa Manluluwas isip ilang Manlalaban.

Doktrina ug mga Pakigsaad 45:11–75

Dili kita angay nga mahadlok sa Ikaduhang Pag-anhi.

• Unsaon nimo pagtabang ang mga sakop sa klase nga makakita sa seryuso nga mga pasidaan ug malaumon nga mga saad diha sa seksyon 45? Sama pananglit, mahimo nimong isulat sa pisara ang mga ulohan nga Mga Panagna ug Gisaad nga mga Panalangin, ug ang mga sakop sa klase mahimong mosulat ubos niini nga mga ulohan sa mga pagtulun-an nga ilang makit-an diha sa Doktrina ug mga Pakigsaad 45:11–75. Nganong gusto man sa Ginoo nga masayud kitang daan mahitungod niini nga mga butang? Unsa ang atong mabuhat aron makadawat sa gisaad nga mga panalangin?

• Tingali ang mga sakop sa klase mahimong mopaambit og tambag ngadto sa usag usa kon unsaon nga mahimong positibo ug malaumon samtang mag-atubang kita sa mga kalamidad nga gipanagna alang sa atong panahon (sama niadtong gihulagway diha sa Doktrina ug mga Pakigsaad 45:11–75). Unsa nga tambag ang bag-o lang ninyong nadunggan o nabasahan gikan sa mga lider sa Simbahan nga makatabang nato sa pag-atubang sa makahahadlok nga mga sitwasyon nga may kalinaw?

Doktrina ug mga Pakigsaad 45:31–32

“Barug sa balaan nga mga dapit”, ug ayaw pagkatarug.

• Ang mga sakop sa klase mahimong andam sa pagpaambit sa ilang mga panabut kon sa unsang paagi sila naningkamot nga “magbarug sa balaan nga mga dapit,” sama sa gitambag sa Ginoo diha sa Doktrina ug mga Pakigsaad 45:31–32. Unsaon nato sa pagmugna og balaang mga dapit sa atong kinabuhi? Ang pamahayag diha sa “Dugang nga mga Kapanguhaan” makadugang og panabut niini nga diskusyon.

  

  Sambingay sa Napulo ka mga Birhen, ni Dan Burr

Dugang nga mga Kapanguhaan

“Magbarug sa balaan nga mga dapit.”

Si Sister Ann M. Dibb, kanhi sakop sa Kinatibuk-ang Kapangulohan sa Young Women, mitudlo nga ang instruksyon nga mobarug sa balaang mga dapit ug dili matarug “nagpasabut kini kon unsaon nato pagkadawat og proteksyon, kalig-on, ug kalinaw sa lisud nga panahon.” Human mipasabut nga kining balaan nga mga dapit maglakip sa atong mga templo, chapel, ug mga panimalay, siya miingon nga “makakita pa kita og daghang balaan nga dapit.” Mipadayon siya:

“Ang una natong hunahunaon mao ang pulong nga dapit isip palibut o geograpikanhong dapit. Apan ang usa ka dapit pwede sab nga ‘lahi nga kondisyon, posisyon, o panghunahuna’ [Merriam-Webster.com Dictionary, “place,” merriam-webster.com]. Nagpasabut kini nga ang balaan nga mga dapit maglakip usab sa mga gutlo sa panahon—mga gutlo nga ang Espiritu Santo mopamatuod kanato, mga gutlo nga mobati kita sa gugma sa Langitnong Amahan, o mga gutlo nga gitubag ang atong mga pag-ampo. Dugang pa, nagtuo ako nga bisan kanus-a nga may kaisug kamo sa pagbarug sa husto, ilabi na sa mga sitwasyon nga walay gustong mohimo niini, nagahimo kamo og balaan nga dapit” (“Inyong Balaan nga mga Dapit,” Liahona, Mayo 2013, 115).

Pagpalambo sa Atong Pagtudlo

Pagmahimo nga buhing pagpamatuod. Samtang magsunod ka sa doktrina nga imong gitudlo, makahimo ka sa paghatag sa imong gamhanan, personal nga saksi nga kini tinuod. Ang Espiritu Santo manghimatuod sa imong pagpamatuod ngadto sa kasingkasing sa mga sakop sa imong klase. Ikonsiderar ang mga baruganan nga imong itudlo niining semanaha ug sa umaabut nga mga semana. Unsaon nimo nga mas hingpit kining masunod? (Tan-awa sa Pagtudlo sumala sa Pamaagi sa Manluluwas, 13–14.)