mag-uuma uban sa mga baka

Unang Agi sa Daro, ni James Taylor Harwood

Mayo 17–23

Doktrina ug mga Pakigsaad 51–57

“Matinud-anon, Makiangayon, ug usa ka Maalamon nga Tinugyanan”

Usahay ang inspirasyon sa unsay itudlo mahimong moabut samtang maghisgot ka sa mga kasulatan ngadto sa usa ka sakop sa pamilya o higala.

Irekord ang Imong mga Impresyon

pagpaambit nga icon

Dapita ang Pagpaambit

Ikonsiderar ang pagpaambit niini nga mga pulong gikan ni Elder Quentin L. Cook: “Ang akong paglaum mao nga ang matag usa kanato mo-ribyu tagsa-tagsa ug isip mga pamilya sa mga pagkatinugyanan diin kita adunay responsibilidad ug pagkamay-tulubagon” (“Pagkatinugyanan—usa ka Sagrado nga Pagsalig,” Liahona, Nob. 2009, 94). Mahimo dayon nimong pangutan-on ang mga sakop sa klase unsay ilang nakat-unan gikan sa mga seksyon 51–57 mahitungod sa ilang mga pagkatinugyanan.

icon sa pagtudlo

Itudlo ang Doktrina

Doktrina ug mga Pakigsaad 51:9, 15–20

Gusto sa Ginoo nga mahimo kitang matinud-anon, makiangayon, ug maalamon nga mga tinugyanan.

• Unsaon nimo pagtabang ang mga sakop sa klase sa pagkonsiderar kon sa unsang paagi ang mga pulong sa Ginoo diha sa seksyon 51 magamit ngadto kanila? Mahimo nimong isulat sa pisara ang Unsay gisalig sa Ginoo kanako? ug dapita ang mga sakop sa klase sa paglista sa ilang mga tubag (tan-awa ang “Dugang nga mga Kapanguhaan” alang sa mga ideya). Dayon mahimo silang mosiksik og mga baruganan diha sa mga bersikulo 9, 15–20 nga nagtudlo kanila kon unsaon nga mahimong mas maayo nga mga tinugyanan sa mga butang diha sa ilang lista. O mahimo nimong tutukan ang mga pulong nga “matinud-anon,” “makiangayon,” ug “maalamon” diha sa bersikulo 19, hisgutan kon sa unsang paagi ang matag usa niini nga mga pulong makagiya kanato sa pagtuman sa atong pagkatinugyanan. Kon gikinahanglan, ribyuhon og dungan ang kahulugan sa “Pagkatinugyanan, Tinugyanan” diha sa Giya ngadto sa mga Kasulatan (scriptures.ChurchofJesusChrist.org).

lunhaw nga umahan

Ang mga miyembro nga nagsunod sa balaod sa pagpahinungod midonar sa tanan nga anaa kanila ngadto sa Simbahan.

Doktrina ug mga Pakigsaad 52:10; 53:3; 55:1–3

Ang gasa sa Espiritu Santo madawat pinaagi sa pagpatong sa mga kamot.

• Daghang bersikulo niini nga mga pinadayag naghisgot sa pagdawat sa Espiritu Santo pinaagi sa pagpatong sa mga kamot. Kon ang usa ka diskusyon mahitungod niini nga hilisgutan bililhon ngadto sa imong klase, mahimo nimong pangutan-on ang mga sakop sa klase unsay ilang nakat-unan gikan sa Doktrina ug mga Pakigsaad 52:10; 53:3; 55:1–3 mahitungod sa gasa sa Espiritu Santo. Alang sa dugang impormasyon niini nga hilisgutan, tan-awa ang Mga Buhat 8:14–17; 19:1–6. Tingali ang mga sakop sa klase mahimong maghisgot mahitungod sa ilang kasinatian sa pagdawat sa gasa sa Espiritu Santo o sa unsay ilang mahimo aron padayon nga modawat sa Iyang impluwensya diha sa ilang kinabuhi.

Doktrina ug mga Pakigsaad 52:9–11, 22–27

Mahimo natong mapaambit ang ebanghelyo bisan asa man kita.

• Sa dihang ang Ginoo mipadala og pipila ka mga lider sa Simbahan ngadto sa Missouri, misulti siya kanila sa paggamit sa panahon nga gigahin sa pagbiyahe ug “magsangyaw sa pulong diha sa agianan” (bersikulo 25–27). Ang pagbasa sa Doktrina ug mga Pakigsaad 52:9–11, 22–27 mahimong mosangput sa usa ka pagsultihanay kon unsaon nato sa pagpaambit sa ebanghelyo “diha sa agianan,” o panahon sa normal nga dagan sa atong kinabuhi. Ang mga sakop sa klase mahimong maghisgot kon giunsa nila nga ang pagpaambit sa ebanghelyo nahimong natural nga bahin sa ilang kinabuhi.

Doktrina ug mga Pakigsaad 52:14–19

Ang Dios mihatag og sumbanan sa paglikay sa pagpanglimbong.

• Aron mapaila ang sumbanan nga gipadayag sa Ginoo diha sa Doktrina ug mga Pakigsaad 52:14–19, mahimo ka nga mopaambit og mga ehemplo sa ubang sumbanan nga tingali pamilyar sa mga sakop sa klase, sama sa mga sumbanan sa pagtukod og mga butang o mga sumbanan sa kinaiya. Ang mga sakop sa klase tingali adunay ilang kaugalingong mga ehemplo nga mapaambit. Nganong bililhon man ang mga sumbanan? Unsaon nato sa paggamit sa sumbanan diha sa mga bersikulo 14–19 aron makalikay sa pagpanglimbong nga atong makita sa kalibutan karon?

Doktrina ug mga Pakigsaad 54

Makadangup ako sa Ginoo kon masakitan ako sa mga pagpili sa uban.

• Daghan kanato ang nakasinati og kasagmuyo sa dihang ang usa ka tawo nga atong gisaligan wala motuman sa iyang mga pasalig. Nahitabo kini ngadto sa mga Santos sa Colesville, New York, kinsa naglaum nga manimuyo sa yuta ni Leman Copley diha sa Ohio. Aron makat-on gikan niini nga kasinatian, ang mga sakop sa klase mahimong moribyu sa ulohan sa seksyon 54 (tan-awa usab ang Mga Santos, 1:143–46). Mahimo silang maghanduraw nga aduna silay higala diha sa mga Santos sa Colesville ug dayon mangita og tambag diha sa seksyon 54 nga mahimo nilang mapaambit sa ilang higala. O mahimo nilang siksikon ang pinadayag alang sa usa ka butang nga tingali makatabang sa usa ka tawo kinsa nag-antus tungod sa mga pagpili sa laing tawo. (Mahimo nimong itudlo ang saad diha sa bersikulo 6 ngadto niadtong motuman sa ilang mga pakigsaad.)

• Ang Doktrina ug mga Pakigsaad 54:10 adunay pipila ka hugpong sa mga pulong nga mahimong makita nga makahuluganon sa mga sakop sa imong klase, sama sa “pagpailub diha sa kalisdanan,” “nagtinguha kanako sa makugihon,” ug “kapahulayan sa ilang mga kalag.” Ang mga sakop sa klase mahimong mopili og hugpong sa mga pulong aron pamalandungan ug tun-an, mogamit sa mga footnote o ubang kapanguhaan sa pagsuhid og konektado nga mga kasulatan. Dayon mahimo silang mopaambit sa ilang mga hunahuna.

icon sa dugang nga mga kapanguhaan

Dugang nga mga Kapanguhaan

Atong pagkatinugyanan.

Si Presidente Spencer W. Kimball mipasabut: “Sa Simbahan ang pagkatinugyanan usa ka sagradong espiritwal o temporal nga pagsalig nga adunay tulubagon. Tungod kay ang tanan iya sa Ginoo, kita mga tinugyanan sa atong mga lawas, mga salabutan, mga pamilya, ug mga kabtangan. (Tan-awa sa Doktrina ug mga Pakigsaad 104:11–15.) Ang matinud-anong tinugyanan mao ang usa ka tawo kinsa migamit og matarung nga pagmando, nag-amuma sa iyang kaugalingong pamilya, ug nag-atiman sa mga kabus ug timawa’ [Welfare Services: The Gospel in Action,” Ensign, Nob. 1977, 78).

Pagpalambo sa Atong Pagtudlo

Tabangi ang mga tigkat-on sa pagsuporta sa usag usa. Pagmugna og kahimtang sa klase diin ang mga tigkat-on nagsuporta ug nag-awhag sa usag usa. Dapita sila sa pagpaambit og mga ideya ug mga estratehiya nga makapalambo sa ilang pagtuon sa personal ug uban sa pamilya. (Tan-awa sa Pagtudlo sumala sa Pamaagi sa Manluluwas, 36.)