Mayo 10–16

Doktrina ug mga Pakigsaad 49–50

“Kana nga Gikan sa Dios Mao ang Kahayag”

Aron sa “pagsangyaw sa pulong sa kamatuoran pinaagi sa Maghuhupay” (Doktrina ug mga Pakigsaad 50:17), pagtinguha og balaanong inspirasyon samtang mamalandong ka sa Doktrina ug mga Pakigsaad 49–50. Dayon magpabiling bukas sa direksyon sa Dios samtang magtudlo ka.

Irekord ang Imong mga Impresyon

Dapita ang Pagpaambit

Agig dugang sa pagpaambit og mga panabut nga ilang nadawat samtang nagtuon sa mga kasulatan, ang mga sakop sa klase mahimong makabenepisyo sa paghisgot kon sa unsang paagi nga miabut kadto nga mga panabut. Mahimo nimong dapiton ang mga sakop sa klase sa pagpaambit ngadto sa usag usa og mga panabut mahitungod sa usa ka bersikulo diha sa Doktrina ug mga Pakigsaad 49–50 ug hisgutan unsa ang nakagiya kanila ngadto nga mga panabut.

Itudlo ang Doktrina

Doktrina ug mga Pakigsaad 49; 50:1–36

Ang mga kamatuoran sa ebanghelyo makatabang kanako sa pag-ila sa sayop nga mga pagtulun-an.

• Ang Seksyon 49 gihatag aron momatuod sa tinuod nga doktrina nga mikorihir sa unsay gitudlo sa uban (tan-awa ang outline niini nga semana sa Dali, Sunod Kanako—Alang sa mga Indibidwal ug mga Pamilya alang sa pipila ka makasaysayanong background). Aron matabangan ang mga sakop sa klase sa pagsuhid niini nga seksyon, mahimo nimong bahinon ang mga sakop sa klase ngadto sa mga grupo ug sanguni ang matag grupo og usa sa mga hilisgutan sa doktrina nga gihisgutan (sumala sa nalista diha sa ulohan sa seksyon 49). Ang mga grupo mahimong maghisgot sa mosunod nga mga pangutana: Unsa nga mga kamatuoran ang gitudlo sa Ginoo mahitungod niini nga hilisgutan diha sa seksyon 49? Unsa ang gituohan sa katawhan mahitungod niini nga hilisgutan karon? Unsang dugang nga mga kamatuoran ang gitudlo sa Ginoo mahitungod niini pinaagi sa atong mga propeta sa ulahing mga adlaw? Hatagi ang mga sakop sa klase og oportunidad sa pagpaambit sa ilang pasalamat alang sa mga kamatuoran nga gipadayag sa atong panahon.

• Sama sa mga elder sa Kirtland kinsa “wala makasabut sa mga pagpakita sa nagkalain-lain nga mga espiritu” (Doktrina ug mga Pakigsaad 50, ulohan sa seksyon), usahay maghunahuna kita kon ang usa ka butang nga atong gibati o nakita gikan ba sa Espiritu o gikan sa laing impluwensya. Unsa ang atong makat-unan gikan sa Doktrina ug mga Pakigsaad 50:1–36 nga makatabang nato sa pag-ila sa impluwensya sa Espiritu? Mahimo nimong papilion ang matag sakop sa klase og usa ka hugpong sa mga bersikulo nga ilang tun-an ug dayon hangyoa ang mga sakop sa klase sa pagpaambit sa unsay ilang nakit-an.

Doktrina ug mga Pakigsaad 49:15–17

Ang kaminyoon tali sa lalaki ug babaye mahinungdanon sa plano sa Dios.

• Tungod kay ang kaminyoon mahinungdanon sa plano sa Langitnong Amahan, si Satanas matinguhaon sa paghimo og kalibug mahitungod niini. Mahimong makabenepisyo ang imong klase sa paghimo og lista diha sa pisara sa mga kamatuoran nga gipadayag sa Ginoo mahitungod sa kaminyoon. Sama pananglit, unsa nga mga kamatuoran mahitungod sa kaminyoon ang atong makat-unan gikan sa Doktrina ug mga Pakigsaad 49:15–17? Ang ubang makatabang nga mga kasulatan naglakip sa Genesis 2:20–24; 1 Mga Taga-Corinto 11:11; o sa uban nga makita diha sa “Kaminyoon, Pagminyo” sa Giya ngadto sa mga Kasulatan (scriptures.ChurchofJesusChrist.org). Ang mga sakop sa klase makakaplag usab og mga kamatuoran diha sa “Ang Pamilya: Usa ka Pamahayag ngadto sa Kalibutan.” Base sa unsay atong makat-unan gikan niini nga mga kapanguhaan, nganong ang kaminyoon tali sa lalaki ug babaye mahinungdanon man sa plano sa Dios? (tan-awa ang “Dugang nga mga Kapanguhaan”).

  

  Ang kaminyoon tali sa usa ka lalaki ug usa ka babaye gi-orden sa Dios.

Doktrina ug mga Pakigsaad 50:13–22

Ang mga magtutudlo ug mga tigkat-on dungan nga malig-on pinaagi sa Espiritu.

• Ang instruksyon sa Ginoo mahitungod sa pagsangyaw ug pagdawat sa kamatuoran makahatag og maayong oportunidad sa paghisgot sa inyong giambitan nga tahas isip magtutudlo ug mga sakop sa klase sa pagpalambo og pagkat-on sa ebanghelyo. Ikonsiderar ang paghangyo sa mga sakop sa klase sa pagribyu sa Doktrina ug mga Pakigsaad 50:13–22 nga magpares ug sa paghisgot sa mga tahas sa Espiritu, mga magtutudlo, ug mga tigkat-on. Ang pipila ka managpares mahimong mopaambit sa klase sa unsay ilang nakat-unan. Unsa ang pipila ka “lain nga [mga] paagi” nga atong sulayan usahay sa pagtudlo o pagkat-on sa ebanghelyo? (bersikulo 17). Sa unsang paagi nga mahimo kitang mas maayo sa pagdawat pinaagi sa Espiritu? Unsa ang gidasig kanato nga buhaton sa atong mga panimalay ug sa simbahan aron mas maayong matudlo ug makat-on sa ebanghelyo?

Dugang nga mga Kapanguhaan

Ang kaminyoon mahinungdanon sa plano sa Langitnong Amahan.

Si Elder David A. Bednar mipasabut nganong ang kaminyoon mahinungdanon sa plano sa Dios sa kaluwasan:

“Sa balaanong tuyo, lalaki ug babaye gituyo nga mouswag og dungan ngadto sa pagkahingpit ug kahingpitan sa himaya. Tungod sa ilang kalainan sa mga taras ug mga kapasidad, ang mga lalaki ug babaye tagsa-tagsa nagdala ngadto sa relasyon sa kaminyoon og mga talagsaong panan-aw ug mga kasinatian. Ang lalaki ug ang babaye nagtampo og lahi apan parehas ngadto sa pagkausa ug panaghiusa nga dili mahimo sa laing paagi. Ang lalaki mokompleto ug mohingpit sa babaye ug ang babaye mokompleto ug mohingpit sa lalaki samtang sila nagkat-on ug naglig-on ug nagpanalangin sa usag usa. …

“Ang usa ka panimalay nga adunay mahigugmaon ug maunungon nga bana ug asawa mao ang kinanindotan nga kahimtang nga ang mga bata mapadako diha sa gugma ug katarung ug diin ang espirituhanon ug pisikal nga mga panginahanglan sa mga bata mahatag. Ingon nga ang talagsaong mga kinaiya sa mga lalaki ug mga babaye nakadugang sa kahingpitan sa relasyon sa kaminyoon, mao usab kana nga mga kinaiya importante kaayo sa pagpatubo, pag-amuma, ug pagtudlo sa mga bata.” (“Ang Kaminyoon Mahinungdanon sa Iyang Mahangturong Plano,” Liahona, Hunyo 2006, 83–84).

Pagpalambo sa Atong Pagtudlo

Pangulohi ang dinasig nga mga diskusyon. Ang tanan adunay ikatampo, apan usahay dili tanan ang mahatagan og kahigayunan. Sa pagsunod sa impluwensya sa Espiritu, pangita og mga paagi nga madugangan ang gidaghanon sa mga sakop sa klase nga mopaambit sa ilang mga hunahuna ug mga pagbati.