Independence, Missouri, ni Al Rounds

Mayo 24–30

Doktrina ug mga Pakigsaad 58–59

“Matinguhaon nga Moapil diha sa usa ka Maayo nga Katuyoan”

Human mabasa ang Doktrina ug mga Pakigsaad 58–59, ikonsiderar ang mosunod nga mga pangutana: Unsay imong gibati nga nadasig ka nga ipaambit sa imong klase? Unsay imong gilauman nga ilang madiskubrihan? Unsaon nimo pagtabang nila nga makadiskubre niini?

Irekord ang Imong mga Impresyon

Dapita ang Pagpaambit

Aron maaghat ang mga sakop sa klase sa pagpaambit sa unsay ilang nakat-unan sa ilang pagtuon sa kasulatan, mahimo nimong isulat ang mosunod nga mga pangutana diha sa pisara: Unsay atong nakat-unan? Unsaon nato pagsunod sa atong mga nakat-unan? Ang mga sakop sa klase mahimong molista ubos sa unang pangutana og mga kamatuoran nga ilang nakita diha sa Doktrina ug mga Pakigsaad 58–59. Dayon mahimo silang mogahin og pipila ka minuto sa paghisgot og mga ideya sa pagsunod niana nga mga kamatuoran ug sa pagsulat sa ilang mga ideya ubos sa ikaduhang pangutana.

Itudlo ang Doktrina

Doktrina ug mga Pakigsaad 58:1–5, 26–33

Ang mga panalangin moabut sumala sa panahon sa Dios ug sa atong kakugi.

• Ang Doktrina ug mga Pakigsaad 58 nagtudlo og mga kamatuoran nga makahatag og kalinaw panahon sa pagsulay. Ang mga sakop sa klase mahimong nakadiskubre og pipila niini nga mga kamatuoran atol sa ilang pagtuon niini nga seksyon; dapita sila sa pagpaambit sa unsay ilang nakit-an. O mahimo silang mosiksik sa mga bersikulo 1–5, 26–33 diha sa klase, sa tinagsa o sa mga grupo, alang sa usa ka butang nga pwedeng makatabang sa usa ka tawo kinsa nag-antus og kalisud o kinsa naghulat sa gisaad nga panalangin. Human mapaambit ang unsay ilang nakit-an, tingali pipila ka sakop sa klase mahimong mopaambit og mga kasinatian o ubang mga kasulatan nga mimatuod sa mga kamatuoran niini nga mga bersikulo.

• Ang gisulti ni Sister Linda S. Reeves diha sa “Dugang nga mga Kapanguhaan” mahimong makatabang. Sa unsang paagi ang mga pulong ni Sister Reeves makaapekto sa paagi sa atong pagtan-aw sa atong mga pagsulay?

Doktrina ug mga Pakigsaad 58:26–29

Mahimo kitang “magpahinabo sa daghan nga pagkamatarung” sa atong “kaugalingon nga gawasnon nga kabubut-on.”

• Unsa ang nakat-unan sa mga sakop sa klase gikan sa ilang pagtuon sa Doktrina ug mga Pakigsaad 58:26–29 niining semanaha? Tingali pwede nimong bahinon ang klase ngadto sa mga grupo ug dapiton ang mga sakop sa klase sa paghisgot diha sa ilang mga grupo sa hugpong sa mga pulong nga ilang nakita nga makahuluganon niini nga mga bersikulo. Sa unsang paagi kini nga mga bersikulo makadasig kanato nga “magpahinabo sa daghan nga pagkamatarung”? (bersikulo 27). Nganong gusto man sa Ginoo nga kita wala “gipugos diha sa tanan nga mga butang”? (bersikulo 26). Unsa ang gisugyot niini nga mga bersikulo mahitungod sa gusto sa Ginoo nga kita mamahimo?

Doktrina ug mga Pakigsaad 59:9–19

Ang Igpapahulay mao ang adlaw sa Ginoo.

• Aron matabangan ang mga sakop sa klase pagsuhid kon unsa ang gitudlo sa Ginoo sa unang mga Santos sa Missouri mahitungod sa Igpapahulay, mahimo nimo silang dapiton sa pagsiksik sa Doktrina ug mga Pakigsaad 59:9–19 ug paghimo og lista diha sa pisara sa unsay gitudlo kanato sa matag bersikulo mahitungod sa Igpapahulay. Ang mga sakop sa klase mahimo usab nga mopaambit kon sa unsang paagi ang ilang pagpamatuod sa adlaw nga Igpapahulay milambo samtang gibalaan nila ang adlaw nga Igpapahulay

• Sa Doktrina ug mga Pakigsaad 59, ang Ginoo mitudlo mahitungod sa adlaw nga Igpapahulay gamit ang mga pulong nga sama sa “paglipay,” “malipayon,” ug “kamaya” (mga bersikulo 14–15). Ang mga sakop sa klase mahimong mangita og mga pulong nga sama niini diha sa mga bersikulo 9–19. Ang mga sakop sa klase mahimo dayon nga mopaambit sa unsay ilang buhaton aron mahimong malipayon ang Igpapahulay. Unsaon nato paggamit niini nga mga bersikulo aron sa pagtudlo sa uban kon nganong atong gitahud ang adlaw nga Igpapahulay?

• Kini nga diskusyon mahimo usab nga oportunidad alang sa mga sakop sa klase sa pagpaambit og mga ideya kon giunsa nila ug sa ilang mga pamilya sa paggamit sa Igpapahulay aron sa paghimo sa ilang mga panimalay nga sentro sa ilang pagkat-on sa ebanghelyo. Dapita sila sa pagpaambit kon sa unsang paagi ang ilang mga paningkamot nakatabang nila nga magpabiling “labaw nga … walay buling gikan sa kalibutan”(bersikulo 9).

  

  Ang sakramento usa ka mahinungdanong bahin sa pagtahud sa Igpapahulay.

Dugang nga mga Kapanguhaan

Ang atong kalisdanan makagiya kanato ngadto sa Manluluwas.

Si Linda S. Reeves, kanhi sakop sa Kinatibuk-ang Kapangulohan sa Relief Society, mitudlo:

“Ang Ginoo mitugot nga kita pagasulayan, usahay hangtud sa atong kinadak-an nga kapasidad. Atong nakita ang mga kinabuhi sa mga minahal—ug tingali ang atua—nga naguba ug naghunahuna ngano nga ang usa ka mahigugmaon ug mabinationg Langitnong Amahan motugot nga mahitabo ang maong mga butang. Apan dili Siya mobiya kanato nga maugdaw; nagbarug Siya nga bukas ang mga bukton, madasigong nagdapit nato sa pagduol ngadto Kaniya. …

“… Andam Siyang motabang nato, mohupay nato, ug motambal sa atong kasakit kon kita mosalig sa gahum sa Pag-ula ug motahud sa atong mga pakigsaad. Ang mga pagsulay ug kalisdanan nga atong masinati tingali mao ang butang nga mogiya nato sa pagduol ngadto Kaniya ug pagtuman sa atong mga pakigsaad aron nga kita makabalik sa Iyang presensya ug makadawat sa tanan nga iya sa Amahan” (“Kuhaa ang mga Panalangin sa Inyong mga Pakigsaad,” Liahona, Nob. 2013, 119–20).

Pagpalambo sa Atong Pagtudlo

Siguroa nga nagtudlo ka sa tinuod nga doktrina. “Pangutan-a ang imong kaugalingon kanunay, ‘Sa unsang paagi ang akong gitudlo makatabang sa mga sakop sa akong klase nga makapalambo og hugot nga pagtuo diha kang Kristo, maghinulsol, maghimo ug motuman og mga pakigsaad uban sa Dios, ug modawat sa Espiritu Santo?’” (Pagtudlo sumala sa Pamaagi sa Manluluwas, 20).