Campfire sa Missouri, ni Bryan Mark Taylor

Mayo 31–Hunyo 6

Doktrina ug mga Pakigsaad 60–62

“Ang Tanan nga mga Tawo Ania sa Akong Kamot”

Si Elder Ronald A. Rasband miingon: “Matag usa kanato kinahanglan unang mopalig-on sa atong mga kaugalingon sa espirituhanong paagi ug dayon mopalig-on niadtong anaa sa atong palibut. Pamalandong kanunay sa mga kasulatan, ug hinumdumi ang mga hunahuna ug mga pagbati nga inyong masinati samtang magbasa kamo niini” (“Kay Tingali Lamang Unya Mahakalimot Ka,” Liahona, Nob. 2016, 114).

Irekord ang Imong mga Impresyon

Dapita ang Pagpaambit

Makadasig ka og makahuluganong diskusyon pinaagi sa pagdapit sa mga sakop sa klase sa pagtubag sa usa ka piho nga pangutana o ideya nga may kalabutan sa mga kasulatan nga ilang gibasa diha sa panimalay. Pananglitan, mahimo nimo silang dapiton sa pagpaambit og butang nga ilang nakat-unan karong semanaha mahitungod sa Langitnong Amahan o ni Jesukristo.

Itudlo ang Doktrina

Doktrina ug mga Pakigsaad 60:2–3, 7, 13–14; 62:3, 9

Ang Ginoo mahimuot kon atong ibuka ang atong mga baba sa pagpaambit sa ebanghelyo.

• Isip mga miyembro sa Simbahan, nasayud kita nga ang gipahiuli nga ebanghelyo maoy usa ka dako nga bahandi nga makapanalangin sa kinabuhi sa mga anak sa Dios. Busa nganong usahay magpanagana man kita sa pagpaambit sa atong pagpamatuod ngadto sa uban? Ikonsiderar ang pagdapit sa mga sakop sa klase sa paglista diha sa pisara sa pipila ka mga rason nganong dili kita mobuka sa atong mga baba aron mopaambit sa ebanghelyo. Dayon ang mga sakop sa klase mahimong mobasa sa Doktrina ug mga Pakigsaad 60:2–3, 7, 13–14; 62:3, 9, nga mangita sa mga pulong o hugpong sa mga pulong nga makadasig kanila sa pagpaambit sa ebanghelyo. Mahimo nilang ilista ang unsay ilang nakit-an diha sa pisara. Tingali ang pipila ka mga sakop sa klase makapaambit og kasinatian sa dihang nabuntog nila ang ilang mga kahadlok ug mipaambit sa ebanghelyo ngadto sa usa ka tawo.

• Sa tibuok Doktrina ug mga Pakigsaad 60–62, adunay mga pagtulun-an, gisulti ug gipasabut, mahitungod sa pagpaambit sa ebanghelyo. Aron matabangan ang mga sakop sa klase nga madiskubrihan kini nga mga pagtulun-an, mahimo nimong hangyoon ang matag tawo sa pagribyu og usa niini nga mga seksyon ug sa pagpaambit og bisan unsa nga ilang makit-an nga nagtudlo kanila mahitungod sa pagpaambit sa ebanghelyo. Mahimong makapalambo sa diskusyon ang pagbasa mahitungod sa sulundon nga mga misyonaryo sa laing dapit sa mga kasulatan (tan-awa, sama pananglit, ang Mga Buhat 8:27–40; Alma 19:16–17) ug sa paghisgot unsay atong makat-unan gikan niini. Unsa nga mga ehemplo ang atong mapaambit gikan sa atong kaugalingong kinabuhi? Aduna bay mga sakop sa klase nga makapaambit kon sa unsang paagi napaila ang ebanghelyo kanila ug unsay ilang gibati sa mga tawo nga mitudlo kanila? Ang imong klase mahimong makabenepisyo sa pagdrama-drama og mga paagi diin kita “mobuka sa [atong] mga baba” ug mopaambit sa ebanghelyo.

  

  Gusto sa Dios nga atong ipaambit ang ebanghelyo sa uban.

Doktrina ug mga Pakigsaad 60:2–4; 61:1–2, 20, 36–38; 62:1, 6

Ang mga kasulatan nagtudlo kanato mahitungod ni Jesukristo.

• Dapita ang mga sakop sa klase sa pagsulat sa pisara og bisan unsa nga ilang nakat-unan mahitungod sa Manluluwas karong semanaha gikan sa pagtuon sa seksyon 60–62, uban ang konektado nga mga bersikulo. O mahimo silang mosiksik sa Doktrina ug mga Pakigsaad 60:2–4; 61:1–2, 20, 36–38; 62:1, 6 sa pagpangita og mga butang nga gitudlo mahitungod sa Manluluwas. Unsa nga mga istorya gikan sa mga kasulatan o sa atong kinabuhi ang naghulagway sa mga tahas ug mga kinaiya sa Manluluwas nga atong nakat-unan? (sama pananglit, Juan 8:1–11; Ether 2:14–15). Mahimo nimong dapiton ang mga sakop sa klase sa pagpaambit sa ilang mga pagpamatuod ni Jesukristo o personal nga mamalandong kon unsay importansya Niya ngadto kanila.

Doktrina ug mga Pakigsaad 60:5; 61:22; 62:5–8

Gusto sa Ginoo nga mohimo kita og mga desisyon “ingon sa makapaayo [kanato].”

• Ikonsiderar ang pagdapit sa mga sakop sa klase sa pagbasa sa Doktrina ug mga Pakigsaad 60:5; 61:22; 62:5–8 nga magpares o sa ginagmayng mga grupo ug sa pagpaambit sa unsay ilang gibati nga maoy mensahe sa Ginoo kanato. Kanus-a sila mibati nga kinahanglan silang mogamit sa ilang kaugalingong paghukom sa paghimo og desisyon? Ikonsiderar ang pagpaambit sa pamahayag ni Presidente Dallin H. Oaks diha sa “Dugang nga mga Kapanguhaan” isip kabahin sa inyong diskusyon. Sa unsang paagi ang mga ginikanan makatabang sa ilang mga anak nga makat-on niining importante nga baruganan?

Dugang nga mga Kapanguhaan

Molihok base sa atong labing maayong paghukom.

Si Presidente Dallin H. Oaks nagtudlo:

“Ang tinguha nga magiyahan sa Ginoo usa ka kalig-on, apan kinahanglan kining pagaubanan og pagsabut nga itugyan ra sa atong Langitnong Amahan ang daghang mga desisyon diha sa atong personal nga mga pagpili. Ang personal nga paghimo og desisyon maoy usa sa mga tinubdan sa paglambo nga gituyo nga atong masinati sa mortalidad. Ang mga tawo nga mosulay sa pagtugyan sa tanang paghimo og desisyon ngadto sa Ginoo ug mangamuyo og pinadayag alang sa matag pagpili sa dili madugay makakaplag og mga kahimtang diin mag-ampo sila alang sa giya apan dili makadawat niini. Sama pananglit, malagmit nga mahitabo kini niadtong daghan nga mga sirkumstansya diin ang mga pagpili dili kaayo importante o ang bisan hain nga kapilian madawat ra.

“Kinahanglang tun-an nato diha sa atong mga hunahuna ang mga butang, gamiton ang gahum sa pangatarungan nga gibutang sulod kanato sa atong Tiglalang. Dayon kinahanglan kitang mag-ampo alang sa giya ug lihukon kini kon madawat nato kini. Kon dili kita makadawat og giya, kinahanglan kitang molihok base sa atong labing maayong paghukom” (“Our Strengths Can Become Our Downfall,” Ensign, Okt. 1994, 13–14).

Pagpalambo sa Atong Pagtudlo

Hibaloi kadtong nanlimbasug. Ang mga panlimbasug niadtong imong gitudloan mahimong lisud mamatikdan. Apan uban sa tabang sa Espiritu ug sa inyong mga lider, mahimo ka nga masayud sa labing maayong paagi sa pagtabang niini nga mga indibidwal. (Tan-awa sa Pagtudlo sumala sa Pamaagi sa Manluluwas, 8–9.)