revelation manuscript book in display case

Hunyo 21–27

Doktrina ug mga Pakigsaad 67–70

Bililhon kay … sa Katigayunan sa Tibuok Kalibutan

Ang pagpangandam sa pagtudlo nagpasabut og labaw pa kay sa paghunahuna kon unsay imong isulti ug buhaton isip magtutudlo. Kinahanglang maglakip usab kini sa pagkonsiderar unsa ang mahimo sa mga tigkat-on sa pagtudlo sa usag usa. Unsaon nimo pagdapit ang mga sakop sa klase sa pagpaambit og mga kasinatian o mga panabut nga ilang naangkon sa pagbasa niini nga mga kasulatan?

Irekord ang Imong mga Impresyon

pagpaambit nga icon

Dapita ang Pagpaambit

Mahimo nimong isulat sa pisara ang Karong semanaha ang Ginoo mitudlo kanako … ug dapita ang mga sakop sa klase sa pagkompleto sa kapahayag gamit ang unsay ilang nakat-unan.

icon sa pagtudlo

Itudlo ang Doktrina

Doktrina ug mga Pakigsaad 67:1–9

Ang mga pinadayag nga gihatag pinaagi ni Joseph Smith tinuod ug gikan sa Dios.

• Ang pagsabut sa background sa kasaysayan sa Doktrina ug mga Pakigsaad 67 mahimong makatabang sa usa ka diskusyon bahin niini nga seksyon. Tingali ang usa ka sakop sa klase mahimong mo-summarize sa mga sirkumstansya nga misangput niini nga pagpadayag (tan-awa sa Doktrina ug mga Pakigsaad 67, ulohan sa seksyon; Mga Santos, 1:160–63). Kon nakatambong kita sa miting diin gihisgutan ang pagmantala sa mga pinadayag, unsa nga mga rason ang atong mahatag nga mopabor sa ideya? Unsay atong masulti sa mga tawo kinsa nabalaka sa mga kasaypanan sa pinulongan ni Joseph Smith? Unsa ang gitudlo kanato sa bersikulo 67 mahitungod sa mga propeta ug pagpadayag? Ang mga sakop sa klase mahimo usab nga mopaambit kon giunsa nila sa pagkasayud alang sa ilang kaugalingon nga kini nga mga pagpadayag tinuod.

Doktrina ug mga Pakigsaad 68:1–6

Ang dinasig nga mga pulong sa mga sulugoon sa Ginoo mao ang mga pulong sa Ginoo.

• Aron matabangan ang mga sakop sa klase sa paghisgot sa Doktrina ug mga Pakigsaad 68:1–6, mahimo nimo silang dapiton sa pagbasa niini nga mga bersikulo sa ginagmayng mga grupo ug sa pagpaambit sa usag usa sa mga kamatuoran nga ilang nakat-unan mahitungod sa mga pagtulun-an sa mga sulugoon sa Ginoo. Dapita ang mga grupo sa pagpaambit sa usag usa kon giunsa nila pagkahibalo nga tinuod ang mga baruganan nga gitudlo diha sa bersikulo 4. Ang mga sakop sa klase mahimong mopaambit og mga kasinatian kon sila mamulong o motudlo ingon nga “nadasig pinaagi sa Espiritu Santo” (bersikulo 3) ug sa unsang paagi ang Ginoo miuban kanila ug misuporta kanila (tan-awa sa bersikulo 6).

• Kon gusto nimong hisgutan kon sa unsang paagi kini nga mga bersikulo magamit ngadto sa mga pagtulun-an sa mga sulugoon sa Ginoo sa kinatibuk-ang komperensya, ang pamahayag ni Elder Jeffrey R. Holland diha sa “Dugang nga mga Kapanguhaan” mahimong makatabang. Ang mga sakop sa klase mahimo usab nga mopaambit og mga mensahe sa bag-ong komperensya nga nakapalig-on sa ilang pagtuo sa doktrina nga makita dinhi niini nga mga bersikulo.

Doktrina ug mga Pakigsaad 68:25–31

Ang mga ginikanan adunay responsibilidad sa pagtudlo sa ilang mga anak.

• Aduna bay mga ginikanan sa imong klase —o umaabut nga mga ginikanan? Tingali makabenepisyo sila sa paghisgot mahitungod sa tambag sa Ginoo ngadto sa mga ginikanan diha sa seksyon 68. Sama pananglit, tingali ang pipila ka mga ginikanan sa klase makapili og usa ka baruganan gikan sa bersikulo 25–28 ug hisgutan kon giunsa nila sa pagtudlo niini nga mga butang ngadto sa ilang mga anak (ang mga bersikulo 29–31 adunay pipila usab ka importante nga mga baruganan). O ang mga sakop sa klase mahimong maghisgot kon sa unsang paagi ang ilang mga ginikanan mitudlo kanila sa mga baruganan sa ebanghelyo.

  Nganong ang panimalay mao man ang labing maayo nga dapit alang sa mga bata sa pagkat-on sa ebanghelyo? Unsay atong isulti sa mga ginikanan kinsa mobati og kakulang o nabug-atan sa katungdanan sa pagtudlo sa ilang mga anak?

  pamilya nga nagtuon sa mga kasulatan

  Ang Dios mihatag sa mga ginikanan sa responsibilidad sa pagtudlo sa ilang mga anak.

Doktrina ug mga Pakigsaad 70:1–4

Aduna kitay tulubagon sa mga pinadayag nga gihatag sa Ginoo kanato.

• Ang Ginoo mihatag sa piho nga mga kaigsoonan og pagkatinugyanan sa mga pinadayag aron dad-on kini ngadto sa Missouri ug idumala ang pagmantala niini. Sa unsang paagi nga atong makita ang atong kaugalingon isip mga tinugyanan sa mga pinadayag? Unsa pa nga mga pagtulun-an niini nga seksyon mahitungod sa pagkatinugyanan nga magamit kanato?

icon sa dugang nga mga kapanguhaan

Dugang nga mga Kapanguhaan

Ang Dios namulong kanato karon.

Si Elder Jeffrey R. Holland mipaambit kon sa unsang paagi ang baruganan nga gitudlo diha sa Doktrina ug mga Pakigsaad 68:4 magamit sa kinatibuk-ang komperensya: “Hangyoon ko kamo sa pagpamalandong sa umaabut nga mga adlaw, dili lamang sa mga mensahe nga inyong nadungog apan ang ka talagsaon usab sa kalihokan sa kinatibuk-ang komperensya mismo—unsa ang atong gituohan isip mga Santos sa Ulahing mga Adlaw sa ingon nga mga komperensya ug unsa ang atong gidapit nga madunggan ug maobserbahan sa kalibutan mahitungod niini. Kita mopamatuod ngadto sa tanan nga mga kanasuran, mga kaliwatan, mga pinulongan, ug mga katawhan nga dili lang kay ang Dios buhi apan usab nga Siya namulong, nga alang sa atong panahon ug niining atong adlaw ang tambag nga inyong nadungog, ubos sa direksyon sa Espiritu Santo, ‘ang kabubut-on sa Ginoo, … ang pulong sa Ginoo, … ang tingog sa Ginoo, ug ang gahum sa Dios ngadto sa kaluwasan’ [Doktrina ug mga Pakigsaad 68:4]” (“Bandila ngadto sa mga Nasud,” Liahona, Mayo 2011, 111).

Pagpalambo sa Atong Pagtudlo

Tabangi ang mga tigkat-on sa pagbayaw sa usag usa. “Ang matag indibidwal sa imong klase usa ka abunda nga tinubdan sa pagpamatuod, mga panabut, ug mga kasinatian sa pagsunod sa ebanghelyo. Dapita sila sa pagpakigbahin ug pagbayaw sa usag usa” (Pagtudlo sumala sa Pamaagi sa Manluluwas, 5).