Distrito sa Daviess, Missouri

Hunyo 14–20

Doktrina ug mga Pakigsaad 64–66

“Ang Ginoo Nagkinahanglan sa Kasingkasing ug sa usa ka Andam nga Hunahuna”

Sa imong pagtuon niining semanaha, pagmainampuon sa pagkonsiderar unsa nga mga baruganan gikan sa Doktrina ug mga Pakigsaad 64–66 ang makapalambo sa pagtuo ug kahibalo sa mga sakop sa imong klase.

Irekord ang Imong mga Impresyon

Dapita ang Pagpaambit

Aron maawhag ang mga sakop sa klase sa pagpaambit og butang nga ilang nakita nga makahuluganon sa ilang pagtuon sa kasulatan niining semanaha, mahimo nimo silang hangyuon sa pagpamalandong sa mga hagit nga atong giatubang karon. Dayon dapita sila sa pagpaambit og usa ka bersikulo gikan sa Doktrina ug mga Pakigsaad 64–66 nga ilang gibati nga makatabang kalabut sa usa niadto nga mga hagit.

Itudlo ang Doktrina

Doktrina ug mga Pakigsaad 64:1–11

Gikinahanglan kanato nga mopasaylo sa tanan.

• Tingali ang mga sakop sa klase makabenepisyo sa paghisgot kon nganong ang pagpasaylo sa uban mahimong lisud kaayo—ug giunsa nila sa pagbuntog niadto nga mga kalisdanan. Mahimo silang mosiksik sa Doktrina ug mga Pakigsaad 64:1–11 alang sa mga baruganan ug mga kamatuoran nga makadasig kanila nga mahimong mas mapasayloon. Unsay imong nakat-unan mahitungod sa Manluluwas gikan niini nga mga bersikulo? Aron makatabang sa paghulagway sa mga panalangin sa pagpasaylo, mahimo nimong ipaambit ang istorya ni Morrell Bowen gikan sa mensahe ni Elder Jeffrey R. Holland “Ang Pangalagad sa Pagpasig-uli” (Liahona, Nob. 2018, 77–79). O ang usa ka sakop sa klase mahimong andam sa pagpaambit og personal nga istorya sa paghatag o pagdawat og pagpasaylo. Sa unsang paagi ang mga tawo niini nga mga ehemplo napanalanginan sa gahum sa pagpasaylo?

Doktrina ug mga Pakigsaad 64:31–34

Ang Ginoo nangayo sa atong “kasingkasing ug sa usa ka andam nga hunahuna.”

• Dili gusto sa Ginoo nga kita “[mag]luya”; hinoon, natural lang sa mga tawo kinsa naningkamot sa ilang labing maayo—lakip na, tingali, ang pipila sa imong klase—nga “[mag]luya diha sa maayo nga buhat.” Nganong mahitabo man kini nga pagkaluya? Unsa nga tambag ang atong makita diha sa Doktrina ug mga Pakigsaad 64:31–34 nga makatabang kanato kon manlimbasug kita sa ingon nga mga pagbati?

• Aron mapalambo ang inyong diskusyon, mahimo ka nga mopakita og mga hulagway sa usa ka butang nga dako ug impresibo nga gihimo sulod sa taas nga panahon gikan sa “gagmay nga mga butang”—sama sa mosaic o gambalay nga hinimo sa tisa. Unsa ang pipila ka mga ehemplo sa “mahinungdanon nga buhat” nga gihatag sa Ginoo kanato? Unsa nga gagmay nga mga butang ang atong mahimo karon aron sa pagpahimutang sa pundasyon niana nga buhat?

• Aron matabangan ang mga sakop sa klase nga mamalandong og mas lawom mahitungod sa Doktrina ug mga Pakigsaad 64:34, mahimo nimong isulat ang Kasingkasing ug Andam nga Hunahuna diha sa pisara. Ang mga sakop sa klase mahimong molista ubos niini nga mga ulohan unsay ilang gibati nga maoy gipasabut sa paghatag sa atong kasingkasing ug andam nga hunahuna ngadto sa Ginoo. Alang sa pagpasabut niini nga mga termino, tan-awa ang mga pulong ni Elder Donald L. Hallstrom diha sa “Dugang nga mga Kapanguhaan.” Ang mga kasulatan nga sama sa mosunod makahatag usab og pipila ka mga panabut: Mosiah 7:33; Ether 4:15; Doktrina ug mga Pakigsaad 43:34; Moises 7:18; Joseph Smith—Kasaysayan 1:19.

Doktrina ug mga Pakigsaad 65

Ang gingharian sa Dios dinhi sa yuta nag-andam sa kalibutan alang sa pagbalik sa Manluluwas.

• Ang Doktrina ug mga Pakigsaad 65 naghatag og makadasig nga deskripsyon sa misyon sa Simbahan sa Ginoo sa ulahing mga adlaw. Aron matabangan ang mga sakop sa klase nga makakita sa ilang bahin niini nga misyon, mahimo nimo silang dapiton sa pagsiksik sa seksyon 65 nga mangita og mga tubag sa mga pangutana nga sama niini: Unsa ang gusto sa Ginoo nga mabuhat sa Iyang gingharian dinhi sa yuta? Unsa ang gusto Niya nga akong buhaton aron makatabang? Mahimo usab nimong hisgutan ang mensahe ni Presidente Dallin H. Oaks diha sa “Dugang nga mga Kapanguhaan.” Ang mga sakop sa klase mahimong mopaambit kon unsaon nila pagtubag ang mga pangutana ni Presidente Oaks.

Dugang nga mga Kapanguhaan

“Ang kasingkasing ug usa ka andam nga hunahuna.”

Si Elder Donald L. Hallstrom misugyot niining posible nga kahulugan sa hugpong sa mga pulong nga “kasingkasing ug usa ka andam nga hunahuna”:

“Ang kasingkasing nagsimbolo sa gugma ug pasalig. Mohimo kita og mga sakripisyo ug mopas-an sa palas-anon alang sa atong mga minahal nga dili nato malahutay sa bisan unsang laing rason. Kon wala ang gugma, mominos ang atong pasalig. …

“Ang pagbaton og ‘usa ka andam nga hunahuna’ nagpasabut sa paghatag sa atong labing maayong paningkamot ug labing maayong panghunahuna ug sa pagtinguha sa kaalam sa Dios. Nagsugyot kini nga ang atong labing mainitong tibuok kinabuhi nga pagtuon kinahanglang mahitungod sa mga butang nga mahangturon og kinaiyahan. Nagpasabut kini nga kinahanglan gayud nga adunay dili magkabulag nga relasyon tali sa pagpamati sa pulong sa Dios ug sa pagsunod niini” (“The Heart and a Willing Mind,” Ensign, Hunyo 2011, 31–32).

Pagpangandam alang sa Ikaduhang Pag-anhi.

“Unsa kaha kon ang adlaw sa pag-abut [ni Jesukristo] ugma na? Kon kita nahibalo nga makigkita kita sa Ginoo ugma—pinaagi sa atong kamatayon nga wala sa oras o pinaagi sa Iyang kalit nga pag-abut—unsa may atong buhaton karon? Unsa nga mga pagkumpisal ang atong buhaton? Unsa nga mga binuhatan ang atong undangon? Unsa nga mga problema ang atong husayon? Unsa nga pagpasaylo ang atong ihatag? Unsa nga mga pagpamatuod ang atong ipaambit?” (Dallin H. Oaks, “Pagpangandam alang sa Ikaduhang Pag-anhi,” Liahona, Mayo 2004, 9).

Pagpalambo sa Atong Pagtudlo

Pagkuha og kalig-on gikan sa Manluluwas. “Sa imong mga paningkamot sa pagpakabuhi ug pagtudlo nga mas sama sa Manluluwas, dili kalikayan nga usahay masayop ka. Ayaw pagpakawala sa kadasig; hinoon, himoa ang imong mga sayop ug mga kahuyang nga mopadangup kanimo ngadto sa Langitnong Amahan ug sa Manluluwas” (Pagtudlo sumala sa Pamaagi sa Manluluwas, 14).