Springhill, Daviess County, Missouri, ni Garth Robinson Oborn

Hunyo 7–13

Doktrina ug mga Pakigsaad 63

“Kana nga Moabut gikan sa Kahitas-an Sagrado”

I-rekord ang mga impresyon nga imong madawat samtang magtuon ka sa Doktrina ug mga Pakigsaad 63. Ang usa ka impresyon mahimong daw gamay lang, apan sama sa liso, motubo kini ngadto sa mas makahuluganon ug mabungahong butang kon magpadayon ka sa pagpangita ug pagpamalandong.

Irekord ang Imong mga Impresyon

Dapita ang Pagpaambit

Aron sa pagtabang nga makatutok ang inyong diskusyon sa mga tudling nga nakita sa mga sakop sa klase nga labing makahuluganon, mahimo nimo silang dapiton sa pagsulat sa mga piraso sa papel sa pipila ka mga bersikulo gikan sa seksyon 63 nga gusto nilang hisgutan. Dayon mahimo nimong pundukon ang mga papel ug sugdan sa paghisgot ang mga bersikulo nga gisugyot sa daghang mga sakop sa klase. Hangyoa sila sa pagpaambit kon nganong gipili nila kadto nga mga bersikulo.

Itudlo ang Doktrina

Doktrina ug mga Pakigsaad 63:7–12

Ang mga timailhan moabut pinaagi sa hugot nga pagtuo ug sa kabubut-on sa Dios.

• Aron makasugod og usa ka diskusyon sa mga baruganan nga gitudlo diha sa Doktrina ug mga Pakigsaad 63:7–12, makatabang ang pagribyu og pipila ka mga ehemplo diha sa mga kasulatan sa mga tawo kinsa nakasaksi og mga timailhan o mga milagro. Tingali ang mga sakop sa klase mahimong maghunahuna og mga ehemplo sa mga tawo kansang pagtuo napalig-on sa usa ka timailhan (tan-awa, sama pananglit, sa Lucas 1:5–20, 59–64) o sa mga tawo nga nagduhaduha bisan human makasaksi og timailhan (tan-awa, sama pananglit, sa 1 Nephi 3:27–31; Alma 30:43–56). Ang mga sakop sa klase makagamit dayon sa unsay ilang nakat-unan sa Doktrina ug mga Pakigsaad 63:7–12 sa pagpasabut niining managlahi nga mga reaksyon sa mga timailhan. O mahimo nimong ribyuhon ang ubang mga tudling sa kasulatan mahitungod sa mga timailhan, sama niadtong gilista sa ubos sa “Timailhan” diha sa Giya ngadto sa mga Kasulatan (scriptures.ChurchofJesusChrist.org). Unsaon nato sa pagsiguro nga wala kita magtinguha o magsalig sa mga timailhan isip pundasyon sa atong hugot nga pagtuo?

Doktrina ug mga Pakigsaad 63:13–16

Ang kaputli nagpasabut sa pagpabiling putli sa atong mga hunahuna ug mga binuhatan.

• Bisan tuod ang kadaghanan sa Doktrina ug mga Pakigsaad 63:13–16 pihong naghisgot sa pagpanapaw, ang mga baruganan nga gitudlo mahimong magamit sa bisan unsang kalapasan sa balaod sa kaputli. Ikonsiderar ang pagdapit sa mga sakop sa klase sa pag-ila sa mga sangputanan nga gihulagway diha sa Doktrina ug mga Pakigsaad 63:13–16. Pwede pa gani silang maghimo og “magbantay” (bersikulo 15) o pasidaan nga mga timailhan nga mopasidaan mahitungod niini nga mga sangputanan. Mahimo usab silang maghisgot kon unsa sa ilang hunahuna ang gipasabut niini nga mga sangputanan. Sama pananglit, nganong ang pagsupak sa balaod sa kaputli moresulta man sa paghukom nga moabut sa usa ka tawo “ingon sa usa ka lit-ag” (bersikulo 15)? Nganong ang Ginoo mitambag man kanato nga “maghinulsol sa labing madali” (bersikulo 15) sa sekswal nga sala? (tan-awa ang pamahayag ni Sister Linda S. Reeves diha sa “Dugang nga mga Kapanguhaan”).

• Ang pagbasa sa Doktrina ug mga Pakigsaad 63:16 mahimong mosangput sa diskusyon mahitungod sa naglabi nga impluwensya sa pornograpiya sa atong katilingban. Sa unsang paagi ang mga pasidaan diha sa bersikulo 16 adunay kalabutan niini nga problema? (Bisan og kini nga pinadayag pihong naghisgot sa mga lalaki nga mibati og kahigal ngadto sa mga babaye, kini nga mga pasidaan magamit ngadto sa tanan.) Unsay atong mabuhat sa pagpanalipod sa atong kaugalingon ug sa atong mga minahal gikan sa pornograpiya? Ang mga sakop sa klase mahimong andam sa paghatag og tambag sa usag usa.

  

  Mapanalanginan kita kon motuman kita sa balaod sa kaputli.

Doktrina ug mga Pakigsaad 63:58–64

Ang sagrado nga mga butang kinahanglang tagdon nga may balaang pagtahud.

• Ikaw ug ang imong klase mahimong maghisgot sa Doktrina ug mga Pakigsaad 63:58–64 isip usa ka pasidaan batok sa pagpasipala sa ngalan sa Ginoo, ug ang pipila sa mga kasulatan ubos sa “Pagpanamastamas” diha sa Giya ngadto sa mga Kasulatan (scriptures.ChurchofJesusChrist.org) makapalambo sa ingon nga diskusyon. Mahimo usab nimong matabangan ang mga sakop sa klase nga mas malukpanong magamit kini nga mga bersikulo. Sama pananglit, mahimo ninyong hisgutan kon unsa ang nadugang sa hugpong sa mga pulong nga “nga walay pagtugot” (bersikulo 62) sa atong pagsabut sa tudling. Ang mga sakop sa klase mahimo usab nga molista og ubang sagradong mga butang nga moabut “gikan sa kahitas-an,” o gikan sa Dios. Unsa ang gipasabut nga mamulong niining mga butanga “uban sa pag-amping”? (bersikulo 64).

Dugang nga mga Kapanguhaan

Ang kaputli makapasarang kanato alang sa pakig-uban sa Espiritu Santo.

Si Sister Linda S. Reeves, kanhi sakop sa Kinatibuk-ang Kapangulohan sa Relief Society, mitudlo:

“Wala koy laing nahibaloan nga mopasarang kanato alang sa kanunay nga pakig-uban sa Espiritu Santo kay sa hiyas. …

“Kon malambigit kita sa pagtan-aw, pagbasa, o pagsinati og butang nga ubos sa mga sumbanan sa atong Langitnong Amahan, makapahuyang kini kanato. Bisan unsa pa ang atong edad, kon ang atong gitan-aw, gibasa, gipaminaw, o gipili nga buhaton wala mahisubay sa mga sumbanan sa Ginoo sa Alang sa Kalig-on sa Kabatan-onan, palunga kini, gisi-a kini, ilabay kini, ug ayaw kini panumbalinga. …

“… Ako nagtuo nga kon kada adlaw mahinumdom ug maila nato ang kadako sa gugma sa atong Langitnong Amahan ug sa atong Manluluwas alang kanato, andam kitang mobuhat sa bisan unsa aron mahibalik og usab sa Ilang presensya, gilibutan sa Ilang gugma sa kahangturan” (“Angayan sa Gisaad Kanato nga mga Panalangin,” Liahona, Nob. 2015, 10–11).

Pagpalambo sa Atong Pagtudlo

Paggamit og sagradong musika. Ang mga mensahe diha sa mga himno ug mga awit gikan sa Songbook sa mga Bata makapalig-on sa doktrina nga imong gitun-an diha sa mga kasulatan. Sama pananglit, ang pagkanta og usa ka awit mahitungod sa pagdayeg sa ngalan sa Dios, sama sa “Himaya sa Dios sa Kahitas-an” (Mga Himno, nu. 24), makapalig-on sa mensahe diha sa Doktrina ug mga Pakigsaad 63:58–64.