Gimahal sa Magbalantay, ni Simon Dewey

Hunyo 28–Hulyo 4

Doktrina ug mga Pakigsaad 71–75

“Walay Hinagiban Nga Gihimo batok Kaninyo Nga Mouswag”

Samtang magbasa ka sa Doktrina ug mga Pakigsaad 71–75, hunahunaa ang mga tawo nga imong gitudloan. Unsa ang imong nahibaloan mahitungod kanila? Unsa ang ilang gikinahanglan?

Irekord ang Imong mga Impresyon

Dapita ang Pagpaambit

Dapita ang mga sakop sa klase sa pagpaambit og pipila ka kamatuoran nga ilang nakit-an panahon sa ilang pagtuon sa Doktrina ug mga Pakigsaad 71–75. Unsa ang ilang mga kasinatian nga may kalabutan niining mga kamatuoran?

Itudlo ang Doktrina

Doktrina ug mga Pakigsaad 71

Makasunod kita sa giya sa Espiritu Santo samtang atong panalipdan ang atong mga gituohan.

• Mibati ba kita sukad og kahadlok o kabalaka kalabut sa pagdepensa sa atong mga gituohan? Tingali mahimo nimong dapiton ang mga sakop sa klase sa pagsulat sa pisara og mga pulong o hugpong sa mga pulong nga ilang nakita diha sa Doktrina ug mga Pakigsaad 71 nga naghulagway kon sa unsang paagi ang Ginoo mihangyo ni Joseph ug Sidney sa pagtubag sa mga pagpanaway ni Ezra Booth ug sa uban. Ang mga sakop sa klase mahimo dayong maghisgot sa ginagmay nga mga grupo kon unsa ang kahulugan niini nga mga instruksyon kanato karon. Nganong importante man nga molihok kita “sumala niana nga bahin sa Espiritu” nga gihatag sa Ginoo kanato? (bersikulo 1).

Doktrina ug mga Pakigsaad 72:8–16

Ang mga bishop maoy mga tinugyanan sa espiritwal ug temporal nga mga kalihokan sa gingharian sa Ginoo.

• Sa unsang paagi ang mga instruksyon sa Ginoo ngadto ni Newel K. Whitney, sa dihang gitawag siya nga mahimong bishop sa Kirtland, makatabang niadtong imong gitudloan nga magmapasalamaton sa mga bishop kinsa gitawag sa pagserbisyo kanila? Mahimo nimong hangyuon ang mga sakop sa klase sa pagsiksik sa Doktrina ug mga Pakigsaad 72:8–16, nga mangita og pipila ka mga responsibilidad ni Bishop Whitney ug dayon sa pagtandi niini ngadto sa mga responsibilidad sa mga bishop karon (tan-awa ang deskripsyon ni Presidente Gordon B. Hinckley sa mga responsibilidad sa bishop diha sa “Dugang nga mga Kapanguhaan”). Tingali ang mga sakop sa klase mahimong mopaambit kon sa unsang paagi sila napanalanginan sa pag-alagad sa usa ka bishop. Unsay atong mabuhat aron mas hingpit nga mapaluyohan ang atong bishop?

  

  Ang mga bishop motabang sa mga miyembro nga matubag ang ilang temporal nga mga panginahanglan.

Doktrina ug mga Pakigsaad 73

Mahimo kitang magtinguha og mga oportunidad sa pagpaambit sa ebanghelyo.

• Ang Ginoo misulti kang Joseph Smith ug Sidney Rigdon sa pagsangyaw sa ebanghelyo “tungod kay kini mahimo” (Doktrina ug mga Pakigsaad 73:4) samtang nagtrabaho usab sa paghubad sa Biblia. Tingali ang mga sakop sa klase mahimong mopaambit og pipila ka paagi nga ilang nakita nga “mahimo”—o makab-ot—sa pagpaambit sa ebanghelyo lakip sa uban nilang mga responsibilidad. Mahimong makakita sila og makatabang nga tambag sa mensahe ni Dieter F. Uchtdorf nga “Misyonaryo nga Buhat: Pagpakigbahin sa Unsay Anaa sa Inyong Kasingkasing” (Liahona, Mayo 2019, 15–18).

Doktrina ug mga Pakigsaad 75:2–16

Gusto sa Dios nga kita “maghago uban sa [atong] gahum.”

• Ang mga instruksyon sa Ginoo ngadto sa pipila ka mga elder kon unsaon sa pagpaambit sa ebanghelyo mahimong makadasig sa mga sakop sa klase nga mas makugihong mopaambit sa ebanghelyo. Mahimo nimong isulat sa pisara ang Maghago uban sa inyong gahum ug hangyoa ang mga sakop sa klase sa paglista sa mga pulong ug hugpong sa mga pulong nga mahunahunaan kon maghunahuna sila og tawo kinsa naghago kutob sa mahimo sa pagpaambit sa ebanghelyo. Mahimo usab nilang hisgutan kon unsay gipasabut sa “magpabilin” o “magtinapulan” sa pagpaambit sa ebanghelyo. Unsa ang gitudlo kanato sa Doktrina ug mga Pakigsaad 75:2–16 kon sa unsang paagi ang Manluluwas mosuporta niadtong matinud-anong nagserbisyo Kaniya?

Dugang nga mga Kapanguhaan

Mga responsibilidad sa usa ka bishop.

Si Presidente Gordon B. Hinckley nagtudlo:

“Nagbaton ko sa akong kasingkasing og lawom nga pasalamat alang sa atong mga bishop. Hilabihan akong mapasalamaton alang sa pagpadayag sa Labawng Makagagahum diin namugna kini nga katungdanan ug naglihok. …

“… Gilauman namo nga mobarug kamo isip tigdumalang high priest sa ward, magtatambag sa mga tawo, tigpanalipod ug tigtabang niadtong anaa sa kalisud, kahupayan ngadto sa anaa sa kasubo, tigsangkap niadtong mga nanginahanglan. Gilauman namo nga mobarug kamo isip magbalantay ug tigpanalipod sa doktrina nga gitudlo diha sa inyong ward, sa kalidad sa pagtudlo, sa pagsangon sa daghang katungdanan nga gikinahanglan. …

“… Kinahanglang siguroon ninyo nga walay usa nga nagutman o walay sinina o pinuy-anan. Kinahanglang masayud kamo sa mga kahimtang sa tanan nga inyong gidumala.

“Kinahanglang usa kamo ka maghuhupay ug giya sa inyong katawhan. Ang inyong pultahan kinahanglang kanunay nga bukas ngadto sa bisan unsang pagpangayo og tabang. Kinahanglang lig-on ang inyong bukobuko aron makaambit sa ilang palas-anon. Kinahanglang motabang kamo inubanan sa gugma bisan ngadto sa mga nakasala” (“The Shepherds of the Flock,” Ensign, Mayo 1999, 52–53).

Pagpalambo sa Atong Pagtudlo

Mahimong mas Kristohanon nga magtutudlo. Ikonsiderar ang paggamit sa mga pangutana sa personal nga pagtimbang-timbang diha sa pahina 37 sa Pagtudlo sumala sa Pamaagi sa Manluluwas aron makatabang nimo sa pagkat-on unsaon nimo sa pagtudlo nga mas sama sa Manluluwas.