Si Kristo ug ang Batan-ong Magmamando, ni Heinrich Hofmann

Hulyo 19–25

Doktrina ug mga Pakigsaad 81–83

Diin “Daghan ang Gihatag Daghan ang Gikinahanglan”

Hinumdumi nga ang mga sakop sa imong klase adunay espiritwal nga mga kasinatian samtang magtuon sila sa mga kasulatan diha sa panimalay. Mainampoong ikonsiderar kon sa unsang paagi ka makaawhag kanila sa pagpaambit sa ilang mga kasinatian aron sa pagbayaw sa usag usa.

Irekord ang Imong mga Impresyon

Dapita ang Pagpaambit

Dapita ang mga sakop sa klase sa pagpili og hugpong sa mga pulong gikan sa matag usa sa mosunod nga mga seksyon nga mahimong maayo nga ulohan alang sa seksyon: Doktrina ug mga Pakigsaad 81, 82, ug 83. Nganong gipili man nila kini nga mga ulohan?

Itudlo ang Doktrina

Doktrina ug mga Pakigsaad 81:5; 82:18–19

Kinahanglang magtinguha kita “sa kaayohan sa [atong] silingan.”

• Ang outline niini nga semana diha sa Dali, Sunod Kanako—Alang sa mga Indibidwal ug mga Pamilya nagsugyot og mga pangutana nga pamalandungan kalabut sa Doktrina ug mga Pakigsaad 81:5. Mahimo usab kini nga maayong mga pangutana alang sa diskusyon diha sa imong klase. Ikonsiderar usab ang pagpaambit og personal nga kasinatian sa dihang mibati ka nga “maluyahon” sa usa ka paagi ug ang pagserbisyo sa usa ka tawo mibayaw o milig-on kanimo. Ang mga sakop sa klase tingali adunay ilang kaugalingong susama nga mga kasinatian nga mapaambit. Mahimo usab nimong ipaambit ang pamahayag ni Presidente M. Russell Ballard diha sa “Dugang nga mga Kapanguhaan.”

• Ikonsiderar ang paghangyo sa mga sakop sa klase nga magtuon sa Doktrina ug mga Pakigsaad 82:18–19, nga mangita og mga baruganan nga makatabang kanila nga makasabut sa mga katuyoan ug mga panalangin sa pagserbisyo sa uban. Dayon ipaambit nila ang unsay ilang nakat-unan.

Doktrina ug mga Pakigsaad 82:8–10

“Ako, ang Ginoo, mapugos sa pagtuman kon kamo mobuhat sa unsa nga Ako misulti.”

• Aron matabangan ang mga sakop sa klase nga makasabut sa relasyon tali sa atong andam nga pagkamasulundon ug sa gisaad sa Dios nga mga panalangin, mahimo ninyong basahon ang Doktrina ug mga Pakigsaad 1:37–38; 82:10; 130:20–21 nga magdungan o sa ginagmayng mga grupo. Unsa ang gitudlo kanato niini nga mga kasulatan mahitungod sa Ginoo? Tingali ang mga sakop sa klase mahimong molista og mga pulong nga naghulagway sa Iyang kinaiya, gibase niini nga mga bersikulo.

• Human mabasa ang bersikulo 10, ang mga sakop sa klase mahimong maghisgot kon unsay gisaad sa Ginoo kanato ug sa unsang paagi ang Ginoo mituman sa Iyang mga saad. Ang istorya ni Sister Virginia H. Pearce nga makita diha sa “Dugang nga mga Kapanguhaan” makatabang sa mga sakop sa klase nga makakita nga ang Ginoo mopanalangin kanato sumala sa Iyang kaugalingong kaalam, dili kanunay sa paagi nga atong gusto o gipaabut.

• Unsa ang atong makat-unan gikan sa Doktrina ug mga Pakigsaad 82:8–10 kon nganong ang Langitnong Amahan mihatag kanato og mga sugo? Tingali ang mga sakop sa klase makakita og mga panabut niini nga mga bersikulo nga magamit sa pagtabang sa usa ka higala o usa ka bata nga naghunahuna nga ang mga sugo mapig-uton. O mahimo silang mopaambit og mga kasinatian nga nakatudlo kanila sa pagtan-aw sa mga sugo isip mga panalangin.

Dugang nga mga Kapanguhaan

Lunsay nga relihiyon.

Si Presidente M. Russell Ballard mitudlo:

“Sa atong pagkadisipulo, mahimong aduna kitay mga panginahanglan, mga kabalaka, ug mga buluhaton. Hinoon, ang ubang mga kalihokan kinahanglang anaa gayud sa sentro sa atong pagkamiyembro sa Simbahan. ‘Busa,’ ang Ginoo mimando, ‘pagmatinud-anon; barug diha sa buhatan nga Ako mitudlo nganha kanimo; tabang sa maluyahon, ipataas ang mga kamot sa nawad-an og paglaum, ug lig-una ang mga tuhod nga mahuyang’ [Doktrina ug mga Pakigsaad 81:5].

“Mao kini ang Simbahan nga naglihok! Mao kini ang lunsay nga relihiyon! Mao kini ang ebanghelyo sa tinuod niining kahulugan samtang kita motabang, mopataas, ug molig-on niadtong anaa sa espiritwal ug temporal nga panginahanglan! Ang pagbuhat sa ingon nagkinahanglan nga mobisita kita kanila ug motabang kanila [tan-awa sa Santiago 1:27], nga ang ilang mga pagpamatuod sa hugot nga pagtuo diha sa Langitnong Amahan ug kang Jesukristo ug sa Iyang Pag-ula lig-on nga maestablisar diha sa ilang kasingkasing” (“Bililhong mga Gasa gikan sa Dios,” Liahona, Mayo 2018, 11).

Ang Ginoo mopanalangin kanato sa Iyang kaugalingong talagsaon nga mga paagi.

Si Sister Virginia H. Pearce, kanhi sakop sa Kinatibuk-ang Kapangulohan sa Young Women, misaysay mahitungod sa usa ka babaye kinsa nabalaka sa iyang badlungon nga mga anak. Mihimo siya og ambisyusong tumong nga mas kadaghan motambong sa templo ug mibati og kasiguroan nga ang Ginoo mopasidungog niining mahinungdanong sakripisyo pinaagi sa pag-usab sa kasingkasing sa iyang mga anak. Ang babaye mi-report:

“Human sa napulo ka tuig nga kadaghan motambong sa templo ug kanunay nga pag-ampo, masulub-on akong mosulti nga wala mausab ang mga pagpili sa akong mga anak. …

“Apan ako ang nausab. Lahi na ako nga babaye. … Giundangan nako ang akong mga limitasyon sa panahon ug nakahimo nga maghulat sa Ginoo. … Nausab ang akong mga gilauman. Imbis nga maglaum nga mausab ang akong mga anak, naglaum ako niining kanunay nga malumong mga kalooy ug napuno ko sa pasalamat alang niini. … Ang Ginoo maglihok sa talagsaong mga paagi, ug tinud-anay akong napuno sa kalinaw nga lapaw sa tanang panabut” (sa “Prayer: A Small and Simple Thing,” At the Pulpit [2017], 288–89).

Pagpalambo sa Atong Pagtudlo

Dapita ang mga batan-on nga mahimong kabahin sa imong leksyon. Hatagi og mga oportunidad ang mga batan-on sa pagtudlo sa usag usa. Ang pagkadungog sa mga pagpamatuod o mga kasinatian sa usag usa mahimong makaimpluwensya kaayo. Kon gikinahanglan, tabangi ang kabatan-onan nga mangandam sa pagtudlo, ug ipakita kanila kon unsay gipasabut sa pagtudlo sumala sa pamaagi sa Manluluwas (tan-awa sa Pagtudlo sumala sa Pamaagi sa Manluluwas, 27–28).