Si Joseph Smith nga nagdawat sa Melchizedek nga Pagkapari

Pagpahiuli, ni Liz Lemon Swindle

Hulyo 26–Agosto 1

Doktrina ug mga Pakigsaad 84

“Ang Gahum sa Pagkadiosnon”

Unsay imong buhaton aron sa pagdapit sa mga sakop sa klase sa pagpaambit sa unsay ilang nakat-unan samtang nagtuon sila sa Doktrina ug mga Pakigsaad 84?

Irekord ang Imong mga Impresyon

pagpaambit nga icon

Dapita ang Pagpaambit

Dapita ang mga sakop sa klase sa pagpaambit ngadto sa laing sakop sa klase og usa ka kamatuoran nga ilang nakit-an diha sa seksyon 84 nga nakadasig kanila o nakatabang kanila nga mas makasabut sa pagkapari sa Dios. Dayon dapita ang pipila sa pagpaambit ngadto sa klase.

icon sa pagtudlo

Itudlo ang Doktrina

Doktrina ug mga Pakigsaad 84:1–5, 17–28, 31–42

Kitang tanan mahimong makaangkon sa gahum ug mga panalangin sa pagkapari sa Dios.

• Ang Ginoo misugod niini nga “pagpadayag sa pagkapari” (Doktrina ug mga Pakigsaad 84, ulohan sa seksyon) pinaagi sa pagtudlo nga usa ka templo ang pagatukuron diha sa Zion (tan-awa sa mga bersikulo 1–5). Unsaon nimo pagtabang ang mga sakop sa klase nga makasabut sa relasyon tali sa sagrado nga mga katuyoan sa templo ug sa pagkapari? Mahimo nimong sugdan pinaagi sa pagsulat og usa ka pangutana diha sa pisara sama sa Unsa ang mga katuyoan sa pagkapari? ug dayon sa pagdapit sa mga sakop sa klase sa pagpangita og mga tubag diha sa Doktrina ug mga Pakigsaad 84:17–28, 31–42. Sa unsang paagi ang mga templo ug mga ordinansa sa templo makatabang sa pagtuman niini nga mga katuyoan?

• Aron matabangan ang mga sakop sa klase nga makasabut sa gahum sa pagkapari nga maanaa sa ilang kinabuhi, mahimo nimo silang dapiton sa pagbasa sa Doktrina ug mga Pakigsaad 84:17–28 ug sa pagkonsiderar kon sa unsang paagi ang ilang kinabuhi mahimong lahi kon wala ang pagkapari sa Dios. Awhaga sila sa pagpaambit nganong mapasalamaton sila alang sa pagkapari, lakip ang ilang mga kasinatian sa gahum sa pagkapari—diha sa ilang mga pamilya, mga calling, o personal nga kinabuhi. Unsaon nato pagkaangkon og access sa gahum sa pagkapari?

• Ang panumpa ug pakigsaad sa pagkapari (tan-awa sa Doktrina ug mga Pakigsaad 84:31–42) adunay espesyal nga kagamitan alang niadtong gi-orden ngadto sa usa ka katungdanan sa pagkapari. Apan daghan sa mga panalangin nga gisaad niini nga mga bersikulo mahimong maangkon sa tanan. Aron matabangan ang mga sakop sa klase nga makakita kon sa unsang paagi kini nga mga saad magamit ngadto kanila, mahimo nimo silang dapiton sa pagbasa sa mga bersikulo 33–42 ug maghisgot mahitungod sa mga paagi nga mahimo kitang “modawat” sa pagkapari (bersikulo 35), sa mga sulugoon sa Ginoo, ug sa Ginoo. Mahimo usab silang mobasa sa mga pamahayag diha sa “Dugang nga mga Kapanguhaan” aron mahibalo kon unsay kinahanglan natong buhaton aron makadawat sa mga panalangin sa pagkapari. Pwede nimong tabangan ang mga sakop sa klase sa paghunahuna kon unsay malakip diha sa “tanan nga iya sa … Amahan” (bersikulo 38), sama sa Iyang mga hiyas ug sa matang sa kinabuhi nga Iyang gitagamtam. Unsa pa ang atong nakita nga makahuluganon niini nga mga bersikulo ug mga pamahayag?

  babaye nga nag-ambit sa sakramento

  Ang mga ordinansa sa pagkapari mopanalangin sa tanang anak sa Dios.

Doktrina ug mga Pakigsaad 84:61–88

Ang Ginoo mosuporta niadtong moserbisyo Kaniya.

• Samtang kini nga mga bersikulo gitumong ngadto niadtong “molakaw ug mosangyaw niini nga ebanghelyo sa gingharian” (bersikulo 80), daghan sa mga baruganan nga anaa niini mahimong magamit ngadto ni bisan kinsa nga nagserbisyo sa Dios. Mahimo nimong hatagan ang matag sakop sa klase og usa ka bahin nga basahon diha sa Doktrina ug mga Pakigsaad 84:61–88 ug hangyoa sila sa pagpaambit ngadto sa laing sakop sa klase sa unsay ilang nakat-unan nga magamit ni bisan kinsa nga nagserbisyo sa Ginoo. Ang mga sakop sa klase mahimong mopili og usa ka paborito nga bersikulo o grupo sa mga bersikulo aron sag-ulohon o iplastar diin ila kining makita kada adlaw. Unsa ang mga saad nga labi silang mahinamon? Unsa ang atong mapaambit gikan niini nga mga bersikulo sa pagdasig sa kasamtangang full-time nga mga misyonaryo o niadtong nangandam sa pagserbisyo?

icon sa dugang nga mga kapanguhaan

Dugang nga mga Kapanguhaan

Ang tanan makadawat sa tanan nga anaa sa Amahan.

Si Presidente M. Russell Ballard mitudlo: “Ang tanan nga mihimo og sagradong mga pakigsaad sa Ginoo ug kadtong mitahud sa mga pakigsaad mahimong makadawat og personal nga pagpadayag, nga mapanalanginan pinaagi sa pagpangalagad sa mga anghel, nga makigsulti sa Dios, nga makadawat sa kahingpitan sa ebanghelyo, ug, sa katapusan, mahimong mga manununod kauban ni Jesukristo sa tanan nga anaa sa atong Amahan” (“Mga Lalaki ug mga Babaye ug ang Gahum sa Priesthood,” Liahona, Sept. 2014, 32).

Ang unang kapangulohan sa Relief Society sa Stake sa Salt Lake misulat niadtong 1878: “Mapasalamaton kaayo kami nga pinaagi sa panalangin sa atong Langitnong Amahan, kami, Iyang mga sulugoong babaye gitawag aron mahimong isig ka mamumuo sa atong kaigsoonang lalaki sa pagtukod sa gingharian sa Dios dinhi sa yuta, sa pagtabang sa pagtukod og mga Templo, diin makadawat kita og mga panalangin alang sa karon ug sa kahangturan. Sa tanang mga ordinansa nga nadawat diha sa Balay sa Ginoo, ang babaye mobarug tupad sa lalaki, alang sa mga buhi ug mga patay, nagpakita nga ang lalaki dili mahimong wala ang babaye ni ang babaye mahimong wala ang lalaki diha sa Ginoo” (Mary Isabella Horne, Elmina S. Taylor, ug Serepta M. Heywood, “To the Presidents and Members of the Relief Society of Salt Lake Stake of Zion, Greeting!” Woman’s Exponent, Ene. 15, 1878, 123).

Pagpalambo sa Atong Pagtudlo

Itutok ang imong pagtudlo diha sa doktrina. Siguroa nga ang inyong mga diskusyon sa klase nakatutok sa pundasyon nga doktrina diha sa mga kasulatan. Mabuhat nimo kini pinaagi sa paghangyo sa mga sakop sa klase sa pagbasa sa mga kasulatan ug dayon sa pagpaambit sa mga kamatuoran nga ilang nakit-an, ingon man usab sa ilang mga kasinatian sa pagsunod niadtong mga kamatuoran. (Tan-awa sa Pagtudlo sumala sa Pamaagi sa Manluluwas, 20–21.)