Nakita Ko ang Anak sa Tawo nga Nagtindog sa Tuo nga Kilid sa Dios, ni Walter Rane

Agosto 23–29

Doktrina ug mga Pakigsaad 93

“Makadawat sa Iyang Kahingpitan”

Ang mga tawo nga imong tudloan bililhon nga mga anak sa Langitnong mga Ginikanan ug adunay balaanong potensyal. Human makatuon sa Doktrina ug mga Pakigsaad 93, unsa ang imong gibati nga nadasig ka nga buhaton sa pagtabang kanila nga molambo diha sa “kahayag ug kamatuoran”? (bersikulo 36).

Irekord ang Imong mga Impresyon

Dapita ang Pagpaambit

Isulat sa pisara ang Sa Doktrina ug mga Pakigsaad 93, si Jesukristo midapit kanato sa … Dapita ang mga sakop sa klase sa pagsugyot og mga paagi nga makompleto nila ang kapahayag.

Itudlo ang Doktrina

Doktrina ug mga Pakigsaad 93

Gisimba nato ang Dios nga Amahan ug ang Iyang Anak, si Jesukristo.

• Sa ilang pagtuon sa Doktrina ug mga Pakigsaad 93, ang mga sakop sa klase tingali nakakaplag og daghang kamatuoran mahitungod sa Langitnong Amahan ug ni Jesukristo. Dapita ang mga sakop sa klase sa pagpaambit kon unsay ilang nakit-an. Mahimo usab nimong igrupo-grupo ang klase ug hatagan ang matag grupo og pipila ka bersikulo nga dungan nilang tun-an. Ang matag grupo mahimo dayong mopaambit sa klase sa unsay ilang nakat-unan mahitungod sa “unsaon sa pagsimba, ug … unsa ang [atong] gisimba” (bersikulo 19).

Doktrina ug mga Pakigsaad 93:1–39

Kita mahimong “makadawat sa … kahingpitan [sa Dios], ug mahimaya.”

Makadawat kita sa kahayag sa Dios samtang mosunod kita sa Iyang mga sugo ug magkat-on gikan Kaniya.

• Ang Doktrina ug mga Pakigsaad 93 naglangkob og daghang kamatuoran mahitungod sa atong mahangturong kinaiya ug potensyal isip mga anak sa Dios. Ang uban nga sakop sa klase tingali nakadiskobre niini nga mga kamatuoran panahon sa ilang pagtuon sa seksyon 93 diha sa panimalay (tan-awa ang outline niini nga semana sa Dali, Sunod Kanako—Alang sa mga Indibidwal ug mga Pamilya). Kadtong nakadiskobre mahimong mopaambit sa ilang nakaplagan, ug mahimo kamong makadiskobre og ubang kamatuoran isip klase. Sa unsang paagi kini nga mga kamatuoran makaapekto sa paagi sa atong pagtratar sa mga tawo libut kanato—o sa atong kaugalingon?

• Aniay laing paagi sa pagkat-on mahitungod sa atong mahangturong kinaiya ug potensyal: ang mga sakop sa klase mahimong mobasa og dungan sa bersikulo 24 ug isulat sa pisara ang tulo ka ulohan Kon unsa kita karon, Kon unsa kita kaniadto, ug Kon unsa kita sa umaabot. Mahimo dayon nimong bahinon ang klase ngadto sa tulo ka grupo ug hangyoa ang matag grupo sa pagsiksik sa Doktrina ug mga Pakigsaad 93:6–39, nga mangita og mga kamatuoran mahitungod sa atong karon, kaniadto, ug umaabot nga mahangturong pagkatawo. Ang matag grupo mahimong mosulat ubos sa mga ulohan sa unsay ilang nakit-an. Sa unsang paagi kini nga mga kamatuoran makaimpluwensya sa mga pagpili nga atong himoon?

Doktrina ug mga Pakigsaad 93:40–50

Gisugo kita nga “mopahimutang diha sa kahusay sa [atong] kaugalingon nga balay.”

• Ang sugo nga “mopahimutang diha sa kahusay sa imong kaugalingon nga balay” (bersikulo 43) dili mahitungod sa pag-organisar sa mga kabinet ug aparador apan mahitungod sa pagtudlo—ug pagkat-on—sa “kahayag ug kamatuoran” (bersikulo 42). Tingali ang mga sakop sa klase mahimong mopaambit kon sa unsang paagi sila naningkamot sa pagsunod niini nga tambag. Unsa ang pipila ka mga hagit nga ilang giatubang? Unsa nga mga kamatuoran o mga baruganan diha sa Doktrina ug mga Pakigsaad 93 ang makatabang?

• Isip kabahin sa inyong diskusyon niini nga mga bersikulo, ang mga sakop sa klase mahimong mobasa og mga parte sa mensahe ni Presidente Henry B. Eyring “Usa ka Panimalay Diin ang Espiritu sa Ginoo Mopuyo” (Liahona, Mayo 2019, 22–25) ug mopaambit og bisan unsang mga panabut kalabut sa mga kamatuoran diha sa Doktrina ug mga Pakigsaad 93:40–50. (Tan-awa usab ang pamahayag diha sa “Dugang nga mga Kapanguhaan.”)

Dugang nga mga Kapanguhaan

“Tan-awa nga sila labaw nga makugihon ug mabuhaton diha sa panimalay.”

Si Elder David A. Bednar mitudlo:

“Sa akong opisina anaa ang matahum nga painting sa usa ka umahan sa trigo. Ang painting usa ka daghan kaayong tinagsa-tagsa nga binadlis sa brush—walay bisan usa niini nga badlis kon mao rang usa ang makapaikag o makadani. Sa pagkatinuod, kon padul-an nimo og maayo ang hulagway, ang tanan nimong makita mao ang daghan kaayong maingon og wala magkasinabut nga mga badlis-badlis ug dili madanihong mga linya sa yellow ug gold ug brown nga pintal. Hinoon, kon ikaw anam-anam nga modistansya sa hulagway, ang tanang tinagsa nga badlis sa brush magkatipon ug makamugna og talagsaon nga tupong kaayong pagkatubo nga trigo diha sa umahan. Daghang mga ordinaryo, tinagsa nga badlis sa brush nagkatambayayong sa pagmugna og usa ka makadani ug matahum nga painting.

“Ang matag pamilya nga pag-ampo, ang matag hitabo sa pamilya nga pagtuon sa kasulatan, ug ang matag family home evening usa ka badlis diha sa hulagway sa atong mga kalag. Walay usa ka panghitabo nga makita nga madanihon kaayo o halandumon. Apan sama sa yellow ug sa gold ug brown nga mga linya sa pintal nagtinabangay sa usag usa ug mimugna og usa ka makadani kaayo nga buhat sa kahanas, mao nga ang atong pagkamakanunayon sa paghimo og daw gagmayng mga butang modala ngadto sa mahinungdanong mga espirituhanong sangputanan. ‘Busa, ayaw pagluya diha sa maayo nga buhat, kay kamo nagpahimutang sa tukuranan sa usa ka mahinungdanon nga buhat. Ug gikan sa gagmay nga mga butang magagikan ang mga dagko’ (D&P 64:33). Ang pagkamakanunayon mao ang baruganan nga yawe samtang atong ipahimutang ang pundasyon sa mahinungdanon nga buhat sa atong tinagsa ka kinabuhi ug kon kita mahimong labaw nga makugihon ug pagkamabuhaton diha sa atong kaugalingong mga panimalay” (“Labaw nga Makugihon ug Mabuhaton diha sa Panimalay,” Liahona, Nob. 2009, 19–20).

Pagpalambo sa Atong Pagtudlo

Ipahayag ang gugma. “Depende sa inyong mga kahimtang, ang pagpahayag og gugma ngadto niadtong imong gitudloan mahimong magpasabut sa paghatag kanila og tinuoray nga mga pagdayeg, paghatag og interes sa ilang mga kinabuhi, pagpaminaw og maayo ngadto kanila, pagpaapil kanila diha sa leksyon, paghimo og mga buhat sa pagserbisyo alang kanila, o mainitong pagtimbaya kanila kon imo silang makit-an” (Pagtudlo sa Pamaagi sa Manluluwas, 6).