lawak nga dunay mga lingkuranan ug mga bangko

Agosto 9–15

Doktrina ug mga Pakigsaad 88

“Pagtukod og … usa ka Balay sa Dios”

Isip usa ka magtutudlo sa ebanghelyo, ikaw adunay responsibilidad sa pagtabang sa imong klase nga “motudlo sa usag usa sa doktrina sa gingharian’ ug “mga pulong sa kaalam” (Doktrina ug mga Pakigsaad 88:77, 118). Agig dugang sa pagpaambit sa mga butang nga nadasig ka sa pagtudlo gikan sa Doktrina ug mga Pakigsaad 88, awhaga ang mga sakop sa klase sa pagtudlo sa usag usa sa unsay ilang nakat-unan.

Irekord ang Imong mga Impresyon

pagpaambit nga icon

Dapita ang Pagpaambit

Usahay ang usa ka litrato makaaghat sa pagpaambit. Mahimo ka nga mopakita og hulagway sa usa ka sanga sa oliba (o magdrowing diha sa pisara) ug dapita ang mga sakop sa klase sa pagpaambit og mga bersikulo gikan sa Doktrina ug mga Pakigsaad 88 nga makatabang kanila sa pagsabut nganong si Joseph Smith mitawag niini nga pinadayag nga usa ka “‘dahon sa oliba’ … , ang mensahe sa Ginoo sa kalinaw alang kanato” (ulohan sa seksyon).

icon sa pagtudlo

Itudlo ang Doktrina

Doktrina ug mga Pakigsaad 88:6–50

Ang kahayag ug balaod nagagikan ni Jesukristo.

• Aron matabangan ang imong klase nga makasabut sa Doktrina ug mga Pakigsaad 88:6–50, mahimo nimong isulat ang kahayag ug balaod diha sa pisara ug bahina ang klase ngadto sa duha ka grupo. Ang usa ka grupo mahimong moribyu sa Doktrina ug mga Pakigsaad 88:6–13, 40–50, nga mangita sa mga butang nga ilang nakat-unan mahitungod ni Jesukristo gikan sa mga paghisgot sa kahayag niini nga mga bersikulo. Ang laing grupo mahimong mosiksik sa mga bersikulo 13–26, 34–42, mangita kon unsay ilang nakat-unan mahitungod sa kaimportante sa pagsunod sa Iyang balaod. Unsa ang gitudlo kanato sa mga kamatuoran mahitungod sa kahayag ug balaod diha sa seksyon 88 mahitungod sa Manluluwas? Sa unsang paagi kini nagdasig kanato nga mahimong mas sama Kaniya?

Doktrina ug mga Pakigsaad 88:62–76, 119–26

Mamahimo kitang limpyo pinaagi sa Pag-ula ni Jesukristo.

• Ang sugo sa Ginoo nga “ibalaan ang inyong mga kaugalingon” makita og kaduha diha sa seksyon 88 (mga bersikulo 68, 74). Kon gibati nimong nadasig nga hisgutan unsay gipasabut niana, mahimo nimong sugdan pinaagi sa dungan nga pagsusi sa mga kahulugan sa pulong nga ibalaan o pagribyu sa pipila sa mga tudling nga nalista ubos sa “Pagkabalaan” diha sa Giya ngadto sa mga Kasulatan (scriptures.ChurchofJesusChrist.org). Mahimo usab nimong dapiton ang mga sakop sa klase sa pagbasa sa Doktrina ug mga Pakigsaad 88:62–76, 119–26 ug paghisgot sa mga pangutana nga sama niini kauban sa usa ka paris: Sa unsang paagi kita mahimong balaan? Unsa nga mga saad sa Ginoo ang atong makita dinhi niini nga mga bersikulo? Nganong gusto man sa Manluluwas nga mahimo kitang limpyo? Makakaplag usab sila og mga tubag niini nga mga pangutana diha sa mensahe ni Presidente Dallin H. Oaks “Malimpyo Pinaagi sa Paghinulsol” (Liahona, Mayo 2019, 91–94; tan-awa usab sa “Dugang nga mga Kapanguhaan”).

Doktrina ug mga Pakigsaad 88:77–78, 118–26

Gusto sa Ginoo nga magtinguha kita sa pagkat-on pinaagi sa pagtuon ug pinaagi sa hugot nga pagtuo.

• Ang tambag nga gihatag sa Ginoo sa pagtabang nga maestablisar ang “tulunghaan sa mga propeta” sa Kirtland (bersikulo 137) makatabang sa imong klase sa inyong mga paningkamot nga “motudlo sa usag usa sa doktrina sa gingharian” (bersikulo 77). Tingali mahimo ninyong susihon ang mga bersikulo 77–78 ug 118–26 ug hisgutan kon unsaon sa paghimo sa inyong klase nga usa ka “balay sa pagtulun-an” (bersikulo 119). Ang mga sakop sa klase mahimong mosulat og pipila ka “mga lagda sa klase” o mga baruganan nga gibase niini nga mga bersikulo nga mogiya sa inyong pagkat-on diha sa klase. Mahimo usab nimong hangyoon ang mga sakop sa klase sa pagpaambit kon sa unsang paagi sila naningkamot sa paggamit niini nga mga baruganan samtang sila “[mangita sa] pagtulun-an” (bersikulo 118).

  mga bata nga nagtuon sa mga kasulatan

  Ang atong mga panimalay pwedeng mahimong mga dapit sa espiritwal nga pagkat-on.

Doktrina ug mga Pakigsaad 88:119

Ang templo mao ang balay sa Dios.

• Kon posible, pag-display og litrato sa pinakaduol nga templo diha sa pisara, ug dapita ang klase sa pagsulat tupad niini og mga pulong gikan sa bersikulo 119 nga gigamit sa paghulagway sa balay sa Ginoo. Dapita sila sa pagpaambit og mga kasinatian nga nagpakita kon sa unsang paagi ang templo mitakdo sa matag deskripsyon. Mahimo usab ninyong hisgutan kon sa unsang paagi kini nga bersikulo makagiya sa atong kinabuhi.

icon sa dugang nga mga kapanguhaan

Dugang nga mga Kapanguhaan

Nalimpyo pinaagi sa paghinulsol.

Si Presidente Dallin H. Oaks nagtudlo:

“Ang paghinulsol magsugod pinaagi sa atong Manluluwas, ug usa kini ka kalipay, dili palas-anon. …

“Aron malimpyohan pinaagi sa paghinulsol, kinahanglang biyaan nato ang atong mga sala ug ikumpisal kini ngadto sa Ginoo ug sa Iyang mortal nga maghuhukom kon gikinahanglan (tan-awa sa Doktrina ug mga Pakigsaad 58:43). Si Alma mitudlo nga kita usab kinahanglang ‘[mag]dala sa mga buhat sa pagkamatarung’ (Alma 5:35). Tanan kini kabahin sa kanunayng pagdapit diha sa kasulatan sa pagduol ngadto kang Kristo.

“Atong gikinahanglan ang pag-ambit sa sakramento matag adlawng Igpapahulay. Niana nga ordinansa makigsaad kita ug makadawat sa mga panalangin nga makatabang kanato sa pagbuntog sa tanang buhat ug mga tinguha nga magpugong kanato sa pagkahingpit nga maoy gidapit kanato sa Manluluwas nga kab-uton (tan-awa sa Mateo 5:48; 3 Nephi 12:48). Kon kita ‘molimud [sa atong kaugalingon] sa tanan nga dili diosnon, ug mohigugma sa Dios uban sa tibuok [nato] nga gahum, hunahuna ug kusog,’ niana kita mahimo nga ‘hingpit diha kang Kristo’ ug ‘pagasantoson’ pinaagi sa pagpaagas sa Iyang dugo, aron ‘mahimo nga balaan, nga walay lama’ (Moroni 10:32–33). Pagkaanindot nga saad! Pagkadako nga milagro! Pagkadako nga panalangin!” (“Malimpyo Pinaagi sa Paghinulsol,” Liahona, May 2019, 92).

Pagpalambo sa Atong Pagtudlo

Pangita og mga kapanguhaan nga mosuporta sa mga baruganan. Agig dugang sa mga sugyot niini nga outline, mahimo ka nga mangita og mga video, musika, o artwork sa Simbahan aron sa pagtudlo sa mga baruganan diha sa Doktrina ug mga Pakigsaad 88. (Tan-awa sa Pagtudlo sumala sa Pamaagi sa Manluluwas, 17–18.)