pamilya nga naglakaw padulong sa templo

Agosto 2–8

Doktrina ug mga Pakigsaad 85–87

“Barug Kamo sa Balaan nga mga Dapit”

Ayaw batia nga obligadong hisgutan ang matag bersikulo—o bisan ang matag seksyon—sa Doktrina ug mga Pakigsaad diha sa Sunday School. Tuguti ang Espiritu nga mogiya nimo, ug pagmatngon sa unsay nakita sa mga sakop sa klase nga makahuluganon sa ilang kinabuhi.

Irekord ang Imong mga Impresyon

pagpaambit nga icon

Dapita ang Pagpaambit

Ang mga sakop sa klase mahimong mobasa sa daklit sa Doktrina ug mga Pakigsaad 85–87 alang sa usa ka pulong o hugpong sa mga pulong nga daw importante kanila (tingali usa nga ilang namarkahan diha sa ilang mga kasulatan). Hangyoa sila sa pagsulat sa ilang mga pulong o hugpong sa mga pulong diha sa pisara, ug pagpili og pipila nga hisgutan.

icon sa pagtudlo

Itudlo ang Doktrina

Doktrina ug mga Pakigsaad 85:6

Ang Espiritu mamulong sa “ligdong nga hinagawhaw nga tingog.”

• Sa Doktrina ug mga Pakigsaad 85:6, si Propeta Joseph Smith migamit og mahulagwayong pinulongan sa pagsulti kon sa unsang paagi ang Espiritu namulong ngadto kaniya. Unsay atong makat-unan mahitungod sa Espiritu Santo gikan sa iyang paghulagway? Mahimo nimong hangyoon ang mga sakop sa klase sa paghunahuna og mga panahon sa dihang ang Espiritu namulong ngadto kanila—unsaon nila sa paghulagway ang ilang kasinatian? Makakita sila og dugang nga mga deskripsyon diha sa mga tudling sa kasulatan nga sama niini: Lucas 24:32; Mosiah 5:2; Alma 32:28; Helaman 5:30; Doktrina ug mga Pakigsaad 6:22–23; 11:12–13.

• Makahunahuna ba kamo og leksyon gamit ang usa ka butang o demonstrasyon nga naghulagway sa ligdong, hinay nga mga hunghong sa Espiritu? Tingali mahimo kamong magpatukar og hinay nga sagradong musika samtang ang mga sakop sa klase mosulod sa kwarto. Ang mga sakop sa klase mahimong maghisgot kon unsa ang gibati nila tungod sa musika ug unsa ka lisud ang pagkadungog niana nga musika kon adunay makalinga nga mga kasaba. Mahimong mosangpot kini ngadto sa usa ka diskusyon mahitungod sa mga makalinga sa atong kinabuhi nga makapugong kanato sa pagkadungog sa hinay, hinagawhaw nga tingog. Ang mga sakop sa klase mahimong mopaambit kon unsay ilang buhaton aron mapalambo ang ilang kasensitibo sa Espiritu—pipila ka tambag makita diha sa “Dugang nga mga Kapanguhaan.”

Doktrina ug mga Pakigsaad 86:1–7

Ang mga matarung pundukon sa katapusang mga adlaw.

• Ang mosunod nga kalihokan makatabang sa mga sakop sa klase nga makasabut sa simbolismo diha sa sambingay sa trigo ug bunglayon: Mahimo nimong isulat ang simbolikanhong hugpong sa mga pulong gikan sa sambingay (sama sa “mga tigsabwag sa mga binhi,” “mga sagbut miturok sa trigo,” “ang udlot migitib,” ug “pagpundok sa trigo” [mga bersikulo 2–4, 7]) ug ang posible nga mga interpretasyon (sama sa “mga Apostoles,” “ang Apostasiya,” “ang Pagpahiuli” ug “misyonaryo nga buhat”) diha sa managlahi nga mga piraso sa papel ug ipapilit kini sa pisara. Dayon ang mga sakop sa klase mahimong magtinabangay sa pagpares sa mga simbolo ngadto sa mga kahulugan niini, gamit ang ilang nakat-unan gikan sa Doktrina ug mga Pakigsaad 86:1–7 (mahimo usab silang mobasa sa Mateo 13:37–43). Nganong importante man nga itumong sa Ginoo kini nga pagpadayag “nganha kaninyo akong mga sulugoon”? (bersikulo 1). Unsa nga mga mensahe ang atong makita nga konektado sa atong pagserbisyo sa Ginoo? (tan-awa usab sa bersikulo 11).

Doktrina ug mga Pakigsaad 87:2, 6, 8

Ang kalinaw makita diha sa “balaan nga mga dapit.”

babaye nga naa sa gawas sa templo

Ang templo usa ka balaan nga dapit diin atong mabati ang gugma sa Dios.

• Aron matabangan ang mga sakop sa klase nga makasabut sa panginahanglan nga “[mo]barug … sa balaan nga mga dapit,” mahimo nimong sugdan pinaagi sa pagdapit kanila sa paglista og pipila sa mga hagit nga atong giatubang sa ulahing mga adlaw. Makakita sila og pipila ka ehemplo diha sa Doktrina ug mga Pakigsaad 87:2, 6. Dayon mahimo nimong hisgutan kon sa unsang paagi ang pagdapit sa Ginoo diha sa bersikulo 8 makatabang kalabut niini nga mga hagit. Ang mga pangutana nga sama niini makatabang:

  Unsa ang importansya sa pulong nga “barug” niini nga bersikulo?

  Unsa ang makahimo sa usa ka dapit nga balaan?

  Unsay makapabalhin sa usa ka tawo gikan sa balaan nga dapit?

  Unsaon nato sa pagsiguro nga dili kita mabalhin?

• Tingali ang mga sakop sa klase andam nga mopaambit sa usag usa og mga ehemplo sa “balaan nga mga dapit” ug unsay nakapahimo niini nga balaan (pwede nimong ipasabut nga ang usa ka balaang dapit mahimong dili lang usa ka pisikal nga lokasyon). Samtang magpaambit sila, awhaga sila sa paghisgot kon nganong kadto nga mga dapit balaan alang kanila. Sa unsang paagi kining balaan nga mga dapit makatabang kanato sa pagkakaplag og kalinaw taliwala sa mga kakuyaw sa ulahing mga adlaw?

icon sa dugang nga mga kapanguhaan

Dugang nga mga Kapanguhaan

Pangita og “ligdong ug hilum nga panahon matag adlaw.”

Si Sister Vicki F. Matsumori, kanhi magtatambag sa Kinatibuk-ang Kapangulohan sa Primary, mihatag niini nga tambag: “Tungod kay ang Espiritu kanunay nga gihulagway nga usa ka ligdong, hinagawhaw nga tingog, importante … nga adunay panahon sa kahilum diha usab sa atong kinabuhi. Ang Ginoo mitambag kanato nga ‘humilum kamo ug ilhon ninyo nga ako mao ang Dios’ [Salmo 46:10]. Kon kita mohatag og usa ka malinawon ug hilum nga panahon matag adlaw kon kita dili mabantang sa telebisyon, computer, mga dula sa video, o personal nga mga galamiton nga de-kuryente, kita mitugot niana nga ligdong, hinagawhaw nga tingog og usa ka kahigayunan sa paghatag og personal nga pagpadayag ug sa paghunghong og matam-is nga giya, kasigurohan, ug kahupayan alang kanato” (“Pagtabang sa Uban nga Makaila sa mga Hunghong sa Espiritu,” Liahona, Nob. 2009, 11).

Pagpalambo sa Atong Pagtudlo

Pangandam nga maghunahuna sa mga gitudloan. “Himoa ang imong pagsabut sa mga tawo nga imong gitudloan nga maoy mogiya sa imong [pagpangandam]. … Ang Kristohanon nga mga magtutudlo dili mapasaligon sa usa ka piho nga estilo o pamaagi; sila mapasaligon sa pagtabang sa mga tawo nga mopalambo og hugot nga pagtuo kang Jesukristo.” (Pagtudlo sumala sa Pamaagi sa Manluluwas, 7).