lalaki ug babaye nga nag-andam og pagkaon

Agosto 16–22

Doktrina ug mga Pakigsaad 89–92

“Usa ka Baruganan uban sa Saad”

Samtang mangandam ka sa pagtudlo, ikonsiderar ang mga baruganan nga nakita nimo nga makahuluganon samtang nagtuon ka sa seksyon 89–92 karong semanaha.

Irekord ang Imong mga Impresyon

pagpaambit nga icon

Dapita ang Pagpaambit

Aniay mga pangutana nga imong magamit sa pag-awhag sa mga sakop sa klase nga mopaambit og usa ka butang gikan sa ilang pagtuon sa kasulatan: Unsay inyong nabasa niining semanaha nga nakapalig-on sa inyong pagtuo diha ni Jesukristo? diha sa propetikanhong tawag ni Joseph Smith? Unsay inyong nabasa nga nakatabang ninyo nga mas makasabut sa plano sa Langitnong Amahan alang sa Iyang mga anak?

icon sa pagtudlo

Itudlo ang Doktrina

Doktrina ug mga Pakigsaad 89

Ang Pulong sa Kaalam maoy “usa ka baruganan uban sa saad.”

• Daghang mga tawo tingali motan-aw sa Pulong sa Kaalam isip usa lang ka lista sa “mga angay buhaton” ug “mga dili angay nga buhaton.” Aron matabangan ang mga sakop sa klase nga mamalandong sa mga baruganan luyo niini nga instruksyon, dapita sila sa pagsiksik sa Doktrina ug mga Pakigsaad 89 nga maghunahuna og sama niini nga mga pangutana: Nganong ang Ginoo mihatag man kanato sa Pulong sa Kaalam? Unsa ang gitudlo niini nga pinadayag kanato mahitungod sa Langitnong Amahan ug sa Iyang plano alang kanato? Ang pamahayag diha sa “Dugang nga mga Kapanguhaan” mahimong makatabang usab. Kon gibati nimo nga makabenepisyo kini sa mga sakop sa klase, mahimo nimo silang dapiton sa paglista sa pisara sa makaayo ug makadaut sa lawas nga mga buhat nga giila sa Ginoo diha sa Doktrina ug mga Pakigsaad 89:5–17. Dayon mahimo nilang ribyuhon ang “Pisikal ug Emosyonal nga Kahimsog” sa Alang sa Kalig-on sa Kabatan-onan (25–27) ug idugang sa ilang mga lista ang ubang butang nga ilang makit-an. Sa unsang paagi ang mga saad sa mga bersikulo 18–21 natuman diha sa atong kinabuhi?

• Ania ang laing paagi sa pagtabang sa mga sakop sa klase nga maghisgot sa mga baruganan diha sa Pulong sa Kaalam. Mahimo nimong bahinon ang klase ngadto sa tulo ka grupo ug hangyoa ang matag grupo sa pagbasa sa seksyon 89, nga mangita og mga tubag sa usa sa mosunod nga pangutana: Unsa nga mga baruganan ang makaawhag sa usa ka tawo kinsa naglisud sa pagsunod sa Pulong sa Kaalam? Unsa nga mga baruganan ang makatabang kanato nga dili manghusga niadtong naglisud sa pagsunod niini? Unsa nga mga baruganan ang makahupay kanato kon kita adunay mga problema sa panglawas bisan pa sa pagsunod sa Pulong sa Kaalam? Isip kabahin niini nga kalihokan, mahimo nimong ipaambit ang kasinatian ni Presidente Dieter F. Uchtdorf samtang nagbansay aron mahimong usa ka fighter pilot (tan-awa sa “Ipadayon ang Pagpailub,” Liahona, Mayo 2010, 58). Awhaga ang mga sakop sa klase sa pagpamalandong sa usa ka butang nga ilang gibati nga buhaton panahon sa diskusyon, ug hatagi sila og panahon sa pagsulat sa ilang mga impresyon.

  mga batang lalaki nga nanagan sa baybayon

  Ang Dios mipadayag sa Pulong sa Kaalam aron sa pagtabang sa Iyang mga anak.

Doktrina ug mga Pakigsaad 90:1–17

Ang Unang Kapangulohan naghupot sa “mga yawe sa gingharian.”

• Ang outline niini nga semana sa Dali, Sunod Kanako—Alang sa mga Indibidwal ug mga Pamilya nagsugyot nga ang mga miyembro magsiksik sa Doktrina ug mga Pakigsaad 90:1–17 aron makat-on mahitungod sa Unang Kapangulohan. Mahimo nimong hangyoon ang mga sakop sa klase sa pagpaambit sa unsay ilang nakat-unan sa panimalay gikan niini nga kalihokan, o mahimo ninyong siksikon kini nga mga bersikulo isip tibuok klase. Ang mga sakop sa klase makakita usab og mga hugpong sa mga pulong diha sa “Dali, ug Paminawon Nato ang Pulong sa Propeta” (Mga Himno, nu. 15) o laing kanta mahitungod sa mga propeta nga mokonektar sa mga pagtulun-an niini nga mga bersikulo. Sa unsang paagi ang serbisyo sa Unang Kapangulohan nakatabang ninyo nga makaila sa Langitnong Amahan ug ni Jesukristo?

Doktrina ug mga Pakigsaad 91

“Ang Espiritu mopadayag sa kamatuoran.”

• Sa kalibutan karon, nabantang kita sa mga mensahe nga naglangkob og “daghan nga mga butang … nga mga tinuod” ug “daghan nga mga butang … nga dili mga tinuod” (bersikulo 1–2). Dapita ang mga sakop sa klase sa pagpangita diha sa seksyon 91 og tambag mahitungod sa Apokripa nga makatabang kanila sa pag-ila sa kamatuoran diha sa mga mensahe nga ilang masugatan. Unsa nga mga ehemplo ang ilang mapaambit kon sa unsang paagi ang Espiritu mitabang kanila sa pag-ila sa kamatuoran?

icon sa dugang nga mga kapanguhaan

Dugang nga mga Kapanguhaan

Ang Pulong sa Kaalam.

Si Presidente Boyd K. Packer mitudlo:

“Ang Pulong sa Kaalam ‘gihatag alang sa usa ka baruganan uban sa saad’ [Doktrina ug mga Pakigsaad 89:3]. Kana nga pulong nga baruganan nga anaa sa pagpadayag importante kaayo. Ang baruganan usa ka malungtarong kamatuoran, usa ka balaod, usa ka lagda nga pwede nimong gamiton aron mogiya sa paghimo og mga desisyon. Sa kasagaran ang mga baruganan wala idetalye sa pagpasabut. Naghatag kana kanimo og kagawasan sa pagpili og usa ka mohangtud nga kamatuoran, usa ka baruganan, isip imong basihan.

“Ang mga miyembro misulat aron mangutana kon kini o kana nga butang supak ba sa Pulong sa Kaalam. Nahibaloan na nga ang tsa, kape, bino, ug tabako supak niini. Wala kini ipasabut nga mas detalyado. Hinoon, atong gitudlo ang baruganan uban sa gisaad nga mga panalangin. Adunay daghang makapaanad, makaadik nga mga butang nga mahimong imnon o usapon o hinguson o i-indyiksyon nga makadaot sa lawas ug espiritu nga wala hisguti diha sa pinadayag. …

“Tahura ang baruganan sa Pulong sa Kaalam ug makadawat kamo sa gisaad nga mga panalangin” (“The Word of Wisdom: The Principle and the Promises,” Ensign, Mayo 1996, 17–18).

Pagpalambo sa Atong Pagtudlo

Paghatag kanunay og pagpamatuod. Ang imong yano, kinasingkasing nga pagsaksi sa espiritwal nga mga kamatuoran mahimong dunay gamhanang impluwensya niadtong imong tudloan. Ang imong pagsaksi dili kinahanglan nga larino o taas. Sama pananglit, pwede kini nga usa ka yanong pagpamatuod sa mga panalangin nga imong nadawat tungod sa pagsunod sa Pulong sa Kaalam. (Tan-awa sa Pagtudlo sumala sa Pamaagi sa Manluluwas, 35.)