Templo sa Kirtland, ni Al Rounds

Agosto 30–Septyembre 5

Doktrina ug mga Pakigsaad 94–97

“Alang sa Kaluwasan sa Zion”

Unsaon nimo pagtabang sa labing maayong paagi ang mga sakop sa klase nga magtinguha sa mga panalangin nga gisaad diha sa Doktrina ug mga Pakigsaad 94–97?

Irekord ang Imong mga Impresyon

Dapita ang Pagpaambit

Tingali ang mga sakop sa klase mahimong mopaambit og usa ka butang nga ilang nakit-an diha sa Doktrina ug mga Pakigsaad 94–97 nga nagdasig kanila nga mas kanunay nga moadto sa templo. O mahimo silang mopaambit og ubang mga mensahe nga nakadasig kanila samtang nagbasa sila niini nga mga seksyon.

Itudlo ang Doktrina

Doktrina ug mga Pakigsaad 95:8; 97:10–17

Diha sa templo ang Dios mopanalangin sa Iyang katawhan.

• Sa unsang paagi nimo gamiton ang mga kamatuoran nga gitudlo diha sa Doktrina ug mga Pakigsaad 95 ug 97 aron sa pagdasig sa mga sakop sa klase nga mas makugihong magtinguha sa mga panalangin sa templo? Usa ka paagi mao ang pagbutang og litrato sa templo diha sa sentro sa pisara ug mangutana sa mga sakop sa klase ngano kaha nga ang Ginoo misugo sa Iyang mga Santos sa pagtukod og mga templo. Ang mga sakop sa klase mahimong mangita og pipila ka tubag diha sa Doktrina ug mga Pakigsaad 95:8; 97:10–17 ug mosulat sa unsay ilang makit-an diha sa pisara libut sa litrato sa templo. Sa unsang paagi kini nga mga katuyoan natuman diha sa atong kinabuhi? Unsaon nato sa paghimo sa templo nga mas importante nga bahin sa atong kinabuhi?

Doktrina ug mga Pakigsaad 97:8–9

Mahimo kitang pagadawaton sa Ginoo.

• Unsa ang atong nakat-unan gikan sa Doktrina ug mga Pakigsaad 97:8 kon unsa ang gipasabut nianang pagadawaton sa Ginoo? Sa unsang paagi nga nalahi kana sa mga paagi nga usahay magtinguha kita og pagdawat sa kalibutan? Unsa nga mga panalangin ang gisaad diha sa bersikulo 9 ngadto niadtong gidawat sa Ginoo? Ang mga sakop sa klase mahimo usab nga moribyu sa mensahe ni Elder Erich W. Kopischke nga “Madawat sa Ginoo” (Liahona, Mayo 2013, 104–6) ug mopaambit kon sa unsang paagi kini nakatabang kanila sa pagsabut niini nga mga bersikulo. Ang pamahayag diha sa “Dugang nga mga Kapanguhaan” naglakip sa pagdapit ni Elder Kopischke nga magtinguha sa pagdawat sa Ginoo diha sa atong kinabuhi.

Doktrina ug mga Pakigsaad 97:18–28

Ang Zion mao “ang putli og kasingkasing.”

• Aron matabangan ang mga sakop sa imong klase sa paghunahuna kon unsa ang Zion, mahimo nimong isulat sa pisara ang Unsa ang Zion? ug dapita sila sa pagpangita og mga tubag diha sa Doktrina ug mga Pakigsaad 97:19 ug 21 (tan-awa usab sa Moises 7:18). Mahimong makatabang ang paghisgot kon sa unsang paagi ang Manluluwas nagtabang kanato nga mahimong “putli og kasingkasing.” Unsay atong gibati nga nadasig kita nga buhaton sa pagtukod sa Zion diha sa atong kinabuhi? sa atong ward o branch? sa atong komunidad?

  

  Ang pagtukod sa Templo sa Kirtland nakahimo sa mga Santos nga mas “putli og kasingkasing.”

• Ang Ginoo mitudlo mahitungod sa Zion human miuna og sugo sa mga Santos sa pagtukod og templo “alang sa kaluwasan sa Zion” (tan-awa sa Doktrina ug mga Pakigsaad 97:12, 18–28). Nganong ang templo importante man nga bahin sa pagtukod sa Zion? Sa unsang paagi ang mga saad nga gihimo sa Ginoo mahitungod sa Zion diha sa mga bersikulo 18–28 natuman sa atong panahon?

Dugang nga mga Kapanguhaan

Madawat sa Ginoo.

Naghisgot kalabut sa “yanong sumbanan” nga gitudlo diha sa Doktrina ug mga Pakigsaad 97:8, si Elder Erich W. Kopischke mitudlo:

“Ang pagtinguha ug pagkaangkon sa pagdawat sa Ginoo mogiya kanato ngadto sa kahibalo nga kita pinili ug Iyang panalanginan. Molambo ang atong pagsalig nga Siya mogiya kanato alang sa kaayohan. Ang Iyang malumo nga kalooy maklaro diha sa atong kasingkasing, sa atong kinabuhi, ug sa atong pamilya.

“Sa akong tibuok kasingkasing modapit ko ninyo sa pagtinguha nga madawat sa Ginoo ug matagamtaman ang Iyang gisaad nga mga panalangin. Samtang sundon nato kining yanong mga sumbanan nga gihatag sa Ginoo, mahibalo kita nga kita Iyang gidawat, bisan pa sa atong posisyon, kahimtang, o mortal nga mga limitasyon” (“Madawat sa Ginoo,” Liahona, Mayo 2013, 106).

Pagpalambo sa Atong Pagtudlo

Tinguhaa ang pagsabut sa imong mga gitudloan. Ang matag tawo nga imong tudloan adunay talagsaon nga mga kasinatian, mga panglantaw, ug mga talento. Pag-ampo aron masayud kon sa unsang paagi ang kontribusyon sa matag tawo mahimong panalangin ngadto sa tibuok klase. (Tan-awa sa Pagtudlo sumala sa Pamaagi sa Manluluwas, 7.)