Mga Santos nga nanagan palayo sa mga manggugubot

C. C. A. Christensen (1831–1912), Saints Driven from Jackson County Missouri [Mga Santos nga Giabug gikan sa Distrito sa Jackson, Missouri], c. 1878, tempera diha sa muslin nga panapton, 77 ¼ × 113 ka pulgada. Brigham Young University Museum of Art, gasa sa mga apo ni C. C. A. Christensen, 1970

Septyembre 6–12

Doktrina ug mga Pakigsaad 98–101

“Pagmalinawon ug Hibaloi nga Ako mao ang Dios”

Unsa nga mga matang sa mga hagit o mga pagsulay ang nasinati sa mga sakop sa imong klase? Unsa nga mga pulong sa pagtambag ug paghupay diha sa Doktrina ug mga Pakigsaad 98–101 ang makatabang kanila?

Irekord ang Imong mga Impresyon

pagpaambit nga icon

Dapita ang Pagpaambit

Mahimo nimong dapiton ang mga sakop sa klase sa pagpaambit og usa ka butang nga ilang nakat-unan gikan sa Doktrina ug mga Pakigsaad 98–101 nga nakatabang kanila sa usa ka pagsulay o hagit nga ilang giatubang.

icon sa pagtudlo

Itudlo ang Doktrina

Doktrina ug mga Pakigsaad 98:1–3, 11–16, 23–30, 37; 101:2–5, 9–16

Ang atong mga pagsulay mahimong molihok alang sa atong kaayohan.

• Ang pagpanglutos o oposisyon nga atong giatubang karon tingali lahi sa giatubang sa mga Santos sa Missouri niadtong 1833, apan ang tambag sa Ginoo diha sa Doktrina ug mga Pakigsaad 98 magamit gihapon. Aron matabangan ang mga sakop sa klase nga makat-on gikan niini nga tambag, ikonsiderar ang pagsulat og mga pangutana sama sa mosunod diha sa pisara: Sa unsang mga paagi nga gusto sa Ginoo nga tan-awon sa Iyang mga Santos ang oposisyon? Sa unsang paagi gusto sa Ginoo nga motubag kita sa pagpanglutos? Ang mga sakop sa klase mahimong magtrabaho sa ginagmay nga mga grupo sa pagpangita og mga tubag diha sa Doktrina ug mga Pakigsaad 98:1–3, 11–16, 23–30 ug dayon hisgutan kon unsay ilang nakat-unan. Unsa nga mga kamatuoran ang atong nakit-an nga makatabang kanato nga mahimong mas maayo nga mga disipulo ni Jesukristo? Ang mga pamahayag diha sa “Dugang nga mga Kapanguhaan” mahimong makadugang niini nga diskusyon.

• Sa mga panahon sa pagpanglutos o mga pagsulay, kini nga mensahe gikan sa mga seksyon 98 ug 101 makatabang: ang Ginoo motabang kanato kon andam kita nga mosalig Kaniya. Aron matabangan ang mga sakop sa klase sa pagpangita niini nga mensahe, mahimo nimong isulat ang mosunod nga lista sa mga bersikulo diha sa pisara ug dapiton ang mga sakop sa klase sa pagpili og pipila nga basahon: Doktrina ug mga Pakigsaad 98:1–3, 11–12, 37; 101:2–5, 9–16. Hangyoa sila sa pagpaambit sa unsay ilang nakit-an nga nag-awhag kanila sa pagsalig sa Ginoo. Unsa ang gitudlo niini nga mga bersikulo kon unsaon sa pagbutang sa atong pagsalig diha sa Ginoo? (Tan-awa usab sa Linda S. Reeves, “Kuhaa ang mga Panalangin sa Inyong mga Pakigsaad,” Liahona, Nob. 2013, 118–20.)

Doktrina ug mga Pakigsaad 101:1–8, 43–62

Ang pagsunod sa tambag sa Dios makatabang kanato nga magpabiling luwas.

• Sa unsang paagi nimo matabangan ang mga sakop sa klase nga makamatngon sa seguridad nga moabut samtang kita “mopatalinghug ngadto sa tingog sa Ginoo”? (bersikulo 7). Tingali mahimo nimong dapiton ang pipila ka mga sakop sa klase sa pagdrama-drama sa sambingay diha sa Doktrina ug mga Pakigsaad 101:43–62 samtang ang laing sakop sa klase mobasa niini og kusog. Mahimo dayon nimong hisgutan ang mga pangutana nga sama niini: Unsa kaha ang girepresentar sa lain-laing mga elemento sa sambingay? Unsay hinungdan nga nawad-an sa ubasan ang mga sulugoon? Unsa nga mga leksyon ang atong makat-unan gikan sa mga lihok sa mga sulugoon? Unsa ang atong makat-unan mahitungod sa Ginoo gikan sa mga lihok sa halangdon nga tawo? Mahimong makatabang usab ang pagtandi sa mga bersikulo 1–8 ngadto sa mga bersikulo 47–51 ug hisgutan kon unsaon nato nga mahimong “matinud-anon ug maalamon” sa atong mga paningkamot sa pagtukod sa Zion sa atong indibidwal nga mga kinabuhi, sa atong mga panimalay, ug isip usa ka Simbahan.

  Jesukristo

  Detalye gikan sa Christ and the Rich Young Ruler [Si Kristo ug ang Adunahan nga Batan-ong Magmamando], ni Heinrich Hofmann

icon sa dugang nga mga kapanguhaan

Dugang nga mga Kapanguhaan

Ang pagpataon sa pikas aping magkinahanglan og Kristiyanong kaisug.

Si Elder Robert D. Hales mitudlo:

“Ang uban nga mga tawo nagtuo nga ang mga tubag sama sa pagpakahilum, kamapuanguron, pagpasaylo, ug paghatag og yano nga pagpamatuod mao ang mga tubag nga uyon-uyon lang o huyang. Apan, ang ‘paghigugma sa [atong] mga kaaway, pagpanalangin kanila nga nanghimaraut [kanato], pagbuhat og maayo kanila nga nasilag [kanato], ug pag-ampo alang sa magalutos [kanato],’ (Mateo 5:44) nagkinahanglan og hugot nga pagtuo, kalig-on, ug, labaw sa tanan, Kristohanong kaisug. …

“Kon dili kita mobalus—kon atong itunol ang pikas natong aping ug mopalayo sa mga pagbati sa kasuko—kita usab nagbarug uban sa Manluluwas. Atong gipakita ang Iyang gugma, nga mao lamang ang bugtong gahum nga makabuntog sa kaaway ug makatubag sa mga tig-akusar kanato sa walay pagbalus og akusar kanila. Dili kana kahuyang. Kana mao ang Kristohanong kaisug” (“Kristohanong Kaisug: Ang Bugti sa Pagkadisipulo,” Liahona, Nob. 2008, 72).

Ang pagpasaylo dili mao ang pagpaundayon.

Si Elder Kevin R. Duncan miingon: “Mga kaigsoonan, palihug ayaw kasayop sa pagsabut. Ang pagpasaylo dili mao ang pagpaundayon. Wala nato hatagig rason ang ngil-ad nga kinaiya o tugutan ang uban nga moabusar kanato tungod sa ilang mga kalisdanan, mga kasakit, o mga kahuyang. Apan makaangkon kita og mas dakong pagsabut ug kalinaw kon ato siyang makita gamit ang mas halapad nga panglantaw. … Ang pagpasaylo usa ka mahimayaon, makaayo nga baruganan. Dili kinahanglan nga kaduha kitang mabiktima. Makapasaylo kita” (“Ang Makaalim nga Haplas sa Pagpasaylo,” Liahona, Mayo 2016, 34–35).

Pagpalambo sa Atong Pagtudlo

Apila kadtong nanglimbasug. Usahay ang nanglimbasug nga mga sakop sa klase nagkinahanglan lamang nga maapil aron mobati nga gihigugma. Ikonsiderar ang paghangyo kanila sa pagdawat og buluhaton sa umaabut nga leksyon, pagdapit kanila ngadto sa klase, o pagsiguro nga sila makaadto sa simbahan. Ayaw paghunong kon sa sinugdanan wala dayon silay buhaton sa imong mga paningkamot (tan-awa sa Pagtudlo sumala sa Pamaagi sa Manluluwas, 8–9).