Septyembre 20–26

Doktrina ug mga Pakigsaad 106–108

“Aron Maabli ang Kalangitan”

Samtang magtuon ka sa Doktrina ug mga Pakigsaad 106–8, ikonsiderar ang espirituhanon nga mga kasinatian nga tingali naangkon sa mga sakop sa imong klase samtang magtuon sila niini nga mga seksyon. Samtang nangandam ka sa pagtudlo kanila, tingali makatabang ang pagsuta kon unsa ang ilang nakita nga makahuluganon sa dili pa kamo mag-abot.

Irekord ang Imong mga Impresyon

Dapita ang Pagpaambit

Dapita ang mga sakop sa klase sa pagpaambit og usa ka bersikulo gikan niini nga mga seksyon nga nagtudlo og baruganan nga mahimong makalig-on sa usa ka tawo sa ilang pagserbisyo sa Simbahan.

Itudlo ang Doktrina

Doktrina ug mga Pakigsaad 106; 108

Ang Ginoo nagtudlo, nag-awhag, ug nagsuporta niadtong Iyang gitawag sa pagserbisyo.

• Samtang ang mga sakop sa klase nagtuon sa Doktrina ug mga Pakigsaad 106 ug 108 niining semanaha, tingali nakakaplag sila og hugpong sa mga pulong nga makatabang niadtong nagserbisyo diha sa mga calling sa Simbahan (tan-awa ang outline niini nga semana diha sa Dali, Sunod Kanako—Alang sa mga Indibidwal ug mga Pamilya). Ikonsiderar ang paghatag sa mga sakop sa klase og panahon sa pagsulat diha sa pisara og hugpong sa mga pulong nga ilang nakit-an niini nga mga seksyon ug sa paghangyo kanila sa pagpaambit sa ilang mga panabut. Unsa nga mga kasinatian ang ilang naangkon nga adunay kalabutan o naghulagway niini nga mga pulong?

Doktrina ug mga Pakigsaad 107

Ang Ginoo nangulo sa Iyang Simbahan pinaagi sa awtoridad sa pagkapari.

• Makasugod ka og usa ka diskusyon mahitungod sa mga katungdanan sa pagkapari pinaagi sa pagdapit sa klase sa paghimo og lista sa mga rason nga ang Ginoo mihatag kanato og mga propeta, mga apostoles, ug ubang mga lider sa Simbahan. Tingali ang mga sakop sa klase makadugang ngadto sa ilang lista human mobasa sa Doktrina ug mga Pakigsaad 107:18–20. Dayon mahimo ka nga mogahin og panahon sa pagribyu sa mga responsibilidad nga gihatag sa Ginoo niadtong naghupot sa mosunod nga mga katungdanan: ang Unang Kapangulohan (mga bersikulo 9, 21–22, 65–66, 91–92), ang Napulog Duha (mga bersikulo 23–24, 33–35, 38, 58), ang Seventy (mga bersikulo 25–26, 34, 93–97), ug mga bishop (mga bersikulo 13–17, 68–76, 87–88). Unsa ang atong mahimo aron sa pagsuporta sa atong mga lider pinaagi sa atong “pagsalig, hugot nga pagtuo, ug [mga] pag-ampo”? (bersikulo 22).

• Unsaon nato pagtubag kon ang usa ka higala nga dili sama nato og tinuohan mangutana kanato, “Unsa ang pagkapari?” o “Unsa ang mga yawe sa pagkapari?” Sa unsang paagi ang mga pagtulun-an diha sa “Dugang nga mga Kapanguhaan” makaapekto sa atong mga tubag? Tingali ang mga sakop sa klase makakita usab og makatabang nga mga panabut diha sa Doktrina ug mga Pakigsaad 107:1–4, 18–20 (tan-awa usab sa Matinud-anon sa Tinuhoan, 124–28). Sa unsang paagi ang pagkapari motabang kanato sa pagdawat “sa mga misteryo sa gingharian” ug “maabli ang kalangitan [nganhi kanato]”? Sa unsang paagi kini motabang kanato nga “makasinati sa pakig-ambit ug sa pagtambong sa Dios nga Amahan, ug ni Jesus”? (bersikulo 19).

Doktrina ug mga Pakigsaad 107:27–31, 85

Ang Ginoo nagdumala sa Iyang gingharian pinaagi sa mga konseho [council].

• Si Presidente M. Russell Ballard miingon, “Nasayud ko nga ang mga council mao ang pamaagi sa Ginoo ug nga gilalang Niya ang tanang butang sa uniberso pinaagi sa council sa langit” (“Mga Family Council,” Liahona, Mayo 2016, 63). Unsaon nimo pagtabang niadtong imong gitudloan nga makasabut unsaon sa pagtinambagay diha sa panimalay ug diha sa simbahan? Tingali mahimo nimong hangyuon ang pipila ka mga sakop nga motambong nga andam mopaambit sa ilang mga kasinatian diha sa simbahan o sa panimalay diin gigamit nila ang mga baruganan sa pagtambag nga anaa sa Doktrina ug mga Pakigsaad 107:27–31, 85 (o sa mensahe ni Presidente Ballard nga gihisgutan sa ibabaw). Ikonsiderar ang pagdapit sa mga sakop sa klase niining semanaha nga motambong sa klase nga andam mopaambit og mga ideya kon unsa ang makapahimo sa konseho nga epektibo. Awhaga ang mga sakop sa klase sa pag-ila og mga baruganan nga ilang nakat-unan gikan niini nga diskusyon nga makatabang kanila nga mahimong mas epektibo samtang moapil sila sa umaabut nga mga konseho sa panimalay ug simbahan.

  

  Ang pagtinambagay maoy usa ka paagi nga matuman sa Ginoo ang iyang buhat.

Dugang nga mga Kapanguhaan

Awtoridad sa pagkapari.

Si Presidente Dallin H. Oaks nagtudlo:

“Wala kita maanad nga mosulti bahin sa mga kababayen-an nga dunay awtoridad sa pagkapari diha sa ilang mga calling sa Simbahan, apan unsa man diay kana nga lain nga awtoridad? Kon ang usa ka babaye—batan-on o tigulang—i-set apart sa pagsangyaw sa ebanghelyo isip full-time nga misyonaryo, gihatagan siya og awtoridad sa priesthood sa pagpahigayon og buluhaton sa priesthood. Ingon usab niana kon ang usa ka babaye i-set apart aron molihok isip opisyal o magtutudlo diha sa organisasyon sa Simbahan ubos sa pagdumala sa tawo kinsa naghupot sa mga yawe sa pagkapari. Bisan kinsa nga naglihok diha sa katungdanan [office] o calling nga nadawat gikan sa tawo nga naghupot sa mga yawe sa pagkapari naggamit sa awtoridad sa pagkapari sa paghimo sa iyang gisangun nga mga katungdanan” (“Ang mga Yawe ug Awtoridad sa Priesthood,” Liahona, Mayo 2014, 51).

Si Presidente M. Russell Ballard miingon:

“Ang atong Amahan sa Langit manggihatagon sa Iyang gahum. Ang tanang lalaki ug babaye makagamit niini nga gahum alang sa tabang diha sa kaugalingon nilang kinabuhi. Ang tanan nga mihimo og sagradong mga pakigsaad sa Ginoo ug kadtong mitahud sa mga pakigsaad mahimong makadawat og personal nga pagpadayag, nga mapanalanginan pinaagi sa pagpangalagad sa mga anghel, nga makigsulti sa Dios, nga makadawat sa kahingpitan sa ebanghelyo, ug, sa katapusan, nga mahimong mga manununod kauban ni Jesukristo sa tanan nga anaa sa atong Amahan” (“Ang mga Lalaki ug mga Babaye diha sa Buhat sa Ginoo,” Liahona, Abr. 2014, 48).

Pagpalambo sa Atong Pagtudlo

Tabangi ang mga tigkat-on sa pagbayaw sa usag usa. “Ang matag indibidwal sa imong klase usa ka abunda nga tinubdan sa pagpamatuod, mga panabut, ug mga kasinatian sa pagsunod sa ebanghelyo. Dapita sila sa pagpakigbahin ug pagbayaw sa usag usa” (Pagtudlo sumala sa Pamaagi sa Manluluwas, 5).