Templo sa Kirtland, ni Jon McNaughton

Septyembre 27–Oktubre 3

Doktrina ug mga Pakigsaad 109–110

“Kini mao ang Imong Balay, usa ka Dapit sa Imong Pagkabalaan”

Ang mga seksyon 109 ug 110 naghulagway sa pipila sa labing sagrado nga mga panghitabo sa Pagpahiuli. Siguroha nga makapaambit ang mga sakop sa klase sa unsay ilang hunahuna ug gibati samtang nagtuon sila niini nga mga panghitabo.

Irekord ang Imong mga Impresyon

Dapita ang Pagpaambit

Ang Ginoo mideklarar nga “ang pagkabantog niini nga balay [ang Templo sa Kirtland] mokaylap ngadto sa langyaw nga mga yuta” (Doktrina ug mga Pakigsaad 110:10). Mahimo nimong dapiton ang mga sakop sa klase sa pagpaambit og usa ka butang nga ilang nakaplagan sa ilang pagtuon nga gibati nila nga kinahanglang mapakatap ngadto sa mga tawo sa tibuok kalibutan.

Itudlo ang Doktrina

Doktrina ug mga Pakigsaad 109; 110:1–10

Gusto sa Ginoo nga mopanalangin kanato diha sa Iyang balaan nga balay.

• Ang pagtuon sa seksyon 109 maoy usa ka nindot nga oportunidad sa pagtabang sa mga sakop sa klase nga mapalig-on ang ilang tinguha sa pagsimba diha sa templo. Mahimo nimong isulat sa pisara ang mga numero sa pipila ka bersikulo nga naghisgot sa mga panalangin sa templo—sama sa mga bersikulo 12–13, 22–23, 24–28, 29–32. Ang mga sakop sa klase mahimong mopili og mga bersikulo nga basahon ug pamalandungan kini, nga magtinagsa o diha sa mga grupo, ug dayon i-summarize alang sa klase ang panalangin nga gihulagway niana nga mga bersikulo. Ang mga sakop nga nakaadto na sa templo mahimong mopaambit kon sa unsang paagi nila nasinati kini nga mga panalangin sa ilang kinabuhi.

  Mahimo usab ninyong basahon o kantahon nga magdungan ang “Ang Espiritu sa Dios” (Mga Himno, nu. 2), nga gikanta sa pagpahinungod sa Templo sa Kirtland. Ang mga sakop sa klase mahimong mohisgot sa mga panalangin sa templo nga gihulagway diha sa himno ug mopaambit og bisan unsang konektado nga mga kasinatian nga nasinati nila, kon angay.

• Ang pagdawat og mga panalangin sa templo kasagaran nagkinahanglan og sakripisyo. Unsa ang gitudlo sa Doktrina ug mga Pakigsaad 109:5 mahitungod sa mga sakripisyo nga gihimo sa nag-unang mga Santos sa pagtukod sa Templo sa Kirtland? Unsa nga mga sakripisyo ang atong buhaton aron makadawat sa mga panalangin sa templo karon? Tingali ang mga sakop sa klase andam nga mopaambit sa ilang mga kasinatian.

• Ang pagtuon sa deskripsyon sa nabanhaw nga Manluluwas diha sa Doktrina ug mga Pakigsaad 110:1–10 maoy usa ka maayong paagi sa pagpalig-on sa atong pagtuo diha ni Jesukristo. Mahimo nimong hangyuon ang mga sakop sa klase sa pagtimaan sa paglarawan niini nga mga bersikulo ug ikonsiderar kon unsa ang gitudlo kanato niini nga mga imahe mahitungod ni Jesukristo. Unsa kaha ang girepresentar sa “hinlo nga buhat sa lunsay nga bulawan”? o ang tingog “ingon sa dahunog sa dagko nga mga katubigan”?

  

  Ang matag tumoy sa Templo sa Kirtland adunay mga pulpito alang sa mga lider sa pagkapari.

Doktrina ug mga Pakigsaad 110:11–16

Ang mga yawe sa pagkapari nga gikinahanglan aron sa pagtuman sa buhat sa Dios anaa sa Simbahan karon.

• Aron matabangan ang mga sakop sa klase nga makasabut sa mga yawe sa pagkapari nga gitugyan ni Moises, Elias, ug Elijah ngadto ni Joseph Smith ug Oliver Cowdery sa Templo sa Kirtland, mahimo nimo silang dapiton sa pagbasa ug paghisgot sa pamahayag diha sa “Dugang nga mga Kapanguhaan,” nga magtinagsa o diha sa mga grupo. Nganong mahinungdanon man kini nga mga yawe sa atong kinabuhi karon? Mahimo usab nimong hangyoon ang mga sakop sa klase sa pagpili og usa sa mga propeta kinsa mihatag niadto nga mga yawe—Moises, Elias, ug Elijah—ug magkat-on mahitungod kaniya gikan sa Giya ngadto sa mga Kasulatan. Unsa ang gitudlo kanato sa mga kinabuhi niini nga mga propeta mahitungod sa mga yawe nga ilang gihatag? Mahimong mosangput kini ngadto sa usa ka diskusyon kon unsa ang gipaabut sa Ginoo nga atong buhaton karon nga kini nga mga yawe anaa sa kalibutan.

Dugang nga mga Kapanguhaan

Ang mga yawe naghatag og gahum ug awtoridad alang sa buhat sa Dios.

Si Elder Quentin L. Cook mipasabut:

“Ang nahimutangan ug gidak-on sa Templo sa Kirtland wala maklaro. Apan kabahin sa pagkaimportante kaayo niini ngadto sa katawhan, kini adunay mahangturong-sangputanan. Ang karaang mga propeta mipahiuli sa mga yawe sa pagkapari alang sa mahangturong makaluwas nga mga ordinansa sa ebanghelyo ni Jesukristo. Miresulta kini sa tumang kalipay sa matinud-anong mga miyembro.

“Kini nga mga yawe naghatag sa ‘gahum gikan sa kahitas-an’ [Doktrina ug mga Pakigsaad 38:38] alang sa balaang gitudlo nga mga responsibilidad nga kaniadto ug karon naglangkob sa importanting katuyoan sa Simbahan. Nianang talagsaong adlaw sa Pasko sa Pagkabanhaw didto sa Templo sa Kirtland, tulo ka yawe ang gipahiuli:

“Una, si Moises nagpakita ug mitugyan sa mga yawe sa pagpundok sa Israel gikan sa upat ka bahin sa yuta, nga mao ang misyonaryo nga buhat.

“Ikaduha, si Elias nagpakita ug mitugyan sa mga yawe sa dispensasyon sa ebanghelyo ni Abraham, nga naglakip sa pagpahiuli sa pakigsaad ni Abraham [tan-awa sa Abraham 2:8–11]. Si Presidente Russell M. Nelson mitudlo nga ang katuyoan sa yawe sa pakigsaad mao ang pag-andam sa mga miyembro alang sa gingharian sa Dios [tan-awa sa “Mga Pakigsaad,” Liahona, Nob. 2011, 88]. …

“Ikatulo, si Elijah nagpakita ug mitugyan sa mga yawe sa gahum sa pag-seal niini nga dispensasyon, nga mao ang buhat sa family history ug mga ordinansa sa templo nga nakapahimo sa kaluwasan alang sa mga buhi ug mga patay” (“Pagpangandam sa Pagsugat sa Dios,” Liahona, Mayo 2018, 115).

Pagpalambo sa Atong Pagtudlo

Dapita ang Espiritu diha sa imong pagtudlo. “Ang kinatas-ang katuyoan sa tanan nga buhaton sa usa ka magtutudlo sa ebanghelyo—matag pangutana, matag kasulatan, matag kalihokan—mao ang pagdapit sa Espiritu sa pagtukod og hugot nga pagtuo ug sa pagdapit sa tanan sa pagduol ngadto kang Kristo. … Ang sagrado nga musika, ang mga kasulatan, mga pulong sa mga propeta sa ulahing mga adlaw, mga pagpahayag sa gugma ug pagpamatuod, ug mga panahon sa hilum nga pagpamalandong tanan makadapit sa presensya sa Espiritu” (Pagtudlo sumala sa Pamaagi sa Manluluwas, 10).