Nauvoo

Nauvoo ang Matahum, ni Larry Winborg

Oktubre 25–31

Doktrina ug mga Pakigsaad 124

“Usa ka Balay ngadto sa Akong Ngalan”

Aron ang Espiritu mopahinumdom kanato sa mga baruganan samtang magtudlo kita (tan-awa sa Juan 14:26), kinahanglang magmakugihon una kita sa pagtuon ug pagpamalandong niadto nga mga baruganan.

Irekord ang Imong mga Impresyon

pagpaambit nga icon

Dapita ang Pagpaambit

Ikonsiderar ang pagdapit sa mga sakop sa klase sa pagpaambit og usa ka butang nga ilang nakita diha sa Doktrina ug mga Pakigsaad 124 nga nakapahimo nila sa pagkonsiderar sa usa ka baruganan sa ebanghelyo sa bag-ong paagi. Unsa ang ilang nabasa—sa tinagsa o isip mga pamilya—nga nakapausab sa paagi nga sila mobati, maghunahuna, o magpakabuhi?

icon sa pagtudlo

Itudlo ang Doktrina

Doktrina ug mga Pakigsaad 124:15, 20

Ang Ginoo malipay kaayo tungod sa kaligdong.

• Sa seksyon 124, ang Ginoo midayeg ni Hyrum Smith ug George Miller tungod sa ilang kaligdong. Aron matabangan ang mga sakop sa klase sa mas lawom nga pagtuon niini nga hiyas, mahimo nimo silang dapiton sa pagbasa sa Doktrina ug mga Pakigsaad 124:15, 20 ug sa pagpamalandong sa unsay ilang nakat-unan mahitungod sa kaligdong gikan niini nga mga bersikulo. Unsa pa ang atong makat-unan gikan sa mga kasulatan nga nalista ubos sa “Kaligdong” diha sa Giya ngadto sa mga Kasulatan (scriptures.ChurchofJesusChrist.org) o gikan sa mensahe ni Elder Richard J. Maynes nga “Makabaton sa Pagsalig sa Ginoo ug sa Imong Pamilya”? (Liahona, Nob. 2017, 75–77). Tingali ang mga sakop sa klase mahimong mopaambit og mga ehemplo sa mga tawo nga ilang kaila nga adunay kaligdong. Nganong ang kaligdong bililhon man kaayo nga hiyas?

Doktrina ug mga Pakigsaad 124:22–24, 60–61

Gusto sa Ginoo nga kita mohangup ug modawat sa uban.

• Ang mga sakop sa imong klase mahimong dunay makat-unan gikan sa paghulagway sa Ginoo sa Balay sa Nauvoo nga makatabang nila sa ilang mga pagpakig-uban sa mga tawo nga dili mga Santos sa Ulahing mga Adlaw o kinsa mipalayo sa Simbahan. Mahimo ka nga modrowing og usa ka balay diha sa pisara ug dapiton ang mga sakop sa klase sa pagsiksik sa Doktrina ug mga Pakigsaad 124:22–24, 60–61 alang sa mga pulong nga gigamit sa Ginoo sa paghulagway sa mga katuyoan sa Balay sa Nauvoo. Mahimo dayon nilang isulat ang mga pulong libut sa balay. Sa unsang paagi kini nga mga termino magamit usab ngadto sa Simbahan ni Jesukristo? Unsay atong mahimo aron sa pagmugna sa samang mahinangpon nga kultura diha sa atong ward ug atong mga panimalay?

Doktrina ug mga Pakigsaad 124:25–45, 55

Ang Ginoo nagsugo kanato sa pagtukod og mga templo aron makadawat kita og sagrado nga mga ordinansa.

• Tingali ang mga sakop sa klase mahimong maghanduraw nga nagpuyo sila sa Nauvoo niadtong 1841 ug nagtrabaho sa Templo sa Nauvoo sa dihang nangutana ang usa ka higala, “Nganong nagsige man kita og tukod niini nga mga templo?” Unsa ang atong isulti niini nga higala? Ang mga sakop sa klase mahimong mangita og mga ideya diha sa Doktrina ug mga Pakigsaad 124:28–30, 37–42, 55. Kon ang pipila ka mga sakop sa klase dili pamilyar sa mga ordinansa nga gihisgutan niini nga mga bersikulo, ikonsiderar ang paghulagway sa mga katuyoan ug mga panalangin niini nga mga ordinansa.

  Si Joseph Smith kauban ang mga lalaki nga nagtukod sa Templo sa Nauvoo

  Si Joseph Smith sa Templo sa Nauvoo, ni Gary E. Smith

Doktrina ug mga Pakigsaad 124:45–55

Ang Ginoo mopanalangin niadtong naningkamot sa pagsunod sa Iyang mga sugo.

• Ang mga Santos gisugo sa pagtukod og templo sa Distrito sa Jackson apan “napugngan sa ilang mga kaaway” (Doktrina ug mga Pakigsaad 124:51). Sa mga bersikulo 49–55, diin gihisgutan sa Ginoo kini nga sitwasyon, mahimong adunay mapasaligong mensahe alang sa mga tawo kinsa gusto nga mosunod sa mga sugo sa Dios apan napugngan sa pagbuhat sa ingon tungod sa pamilya o ubang mga kahimtang. Mahimo nimong basahon kini nga mga bersikulo uban sa mga sakop sa klase ug hangyoa sila sa paghunahuna og mga sitwasyon diin ang mga tawo dili makahimo sa pagtuman sa ilang matarung nga mga tinguha tungod sa mga kahimtang nga dili nila makontrolar. Unsa nga tambag ang atong nakita dinhi niini nga mga bersikulo nga makatabang sa usa ka tawo sa ingon nga sitwasyon? Unsa ang gitudlo niini nga mga bersikulo kanato mahitungod sa pagkamasulundon?

Doktrina ug mga Pakigsaad 124:91–92

Ang Ginoo makagiya kanato pinaagi sa atong patriyarkal nga mga panalangin.

• Makabenepisyo ba sa mga sakop sa imong klase ang usa ka diskusyon mahitungod sa mga patriyarka ug patriyarkal nga mga panalangin? Mahimo nimong sugdan pinaagi sa pagdapit sa mga sakop sa klase sa pagbasa sa Doktrina ug mga Pakigsaad 124:91–92, nga mangita kon sa unsa gitawag si Hyrum Smith nga iyang buhaton. Dayon mahimo nimong isulat sa pisara ang Unsa ug Ngano ug dapita ang mga sakop sa klase sa pagbasa sa “Patriyarkal nga mga Panalangin” (Matinud-anon sa Tinuhoan, 194–96) aron masayran unsa ang patriyarkal nga mga panalangin ug nganong bililhon kini. Unsaon pagpangandam sa usa ka tawo sa pagdawat og patriyarkal nga panalangin? Ikonsiderar ang pagdapit og pipila ka tawo kinsa nakadawat na sa ilang patriyarkal nga mga panalangin sa pagpaambit kon nganong mapasalamaton sila niini. (Pahinumdumi sila nga dili mopaambit og bisan unsa nga hilabihan ka personal o sagrado gikan sa ilang mga panalangin.) Unsaon nato sa pagpakita nga atong gipakabililhon ang atong patriyarkal nga mga panalangin?

Pagpalambo sa Atong Pagtudlo

Pag-ampo alang sa mga sakop sa imong klase. I-ampo ang matag ngalan niadtong imong gitudloan. Mahimo ka nga mag-ampo aron makasabut sa ilang mga panginahanglan ug aron masayud unsay itudlo aron matubag kadto nga mga panginahanglan. Mahimo ka usab nga mohangyo sa Langitnong Amahan sa “pag-andam sa ilang mga kasingkasing” (Alma 16:16) nga modawat sa mga kamatuoran nga imong itudlo. (Tan-awa sa Pagtudlo sumala sa Pamaagi sa Manluluwas, 6.)