Si Joseph Smith nagsangyaw

Oktubre 4–10

Doktrina ug mga Pakigsaad 111–114

“Ako Mohan-ay sa Tanan nga mga Butang alang sa Inyong Kaayohan”

Samtang magbasa ka sa Doktrina ug mga Pakigsaad 111–14, ikonsiderar ang espirituhanon nga mga kamatuoran nga gusto sa Ginoo nga masabtan sa mga sakop sa imong klase. Ang Espiritu Santo motabang sa paggiya kanimo nga mahibalo unsa nga mga baruganan ang tutokan.

Irekord ang Imong mga Impresyon

pagpaambit nga icon

Dapita ang Pagpaambit

Ikonsiderar ang pagdrowing og kaban sa mga bahandi diha sa pisara. Ang mga sakop sa klase mahimong mosulat diha sa pisara og mga bersikulo gikan sa mga seksyon 111–14 diin aduna silay nakit-an nga ilang gikonsiderar nga “daghan nga bahandi” (Doktrina ug mga Pakigsaad 111:2). Hangyoa ang pipila ka sakop sa pagpaambit sa unsay ilang nakita nga bililhon diha niana nga mga bersikulo.

icon sa pagtudlo

Itudlo ang Doktrina

Doktrina ug mga Pakigsaad 111

Ang Ginoo mahimong “mohan-ay sa tanan nga mga butang alang sa [atong] kaayohan.”

• Ang tambag sa Ginoo diha sa Doktrina ug mga Pakigsaad 111 makatabang sa mga sakop sa imong klase kon maghunahuna sila sa temporal ug espiritwal nga mga kabalaka, sama nga kini nakatabang ni Joseph Smith sa iyang mga kabalaka mahitungod sa Zion. Mahimo ka nga mosugod og diskusyon niini nga seksyon pinaagi sa pagdapit sa mga sakop sa klase sa paglista diha sa pisara sa mga butang nga gikabalak-an nila o sa mga tawo nga ilang kaila. Dayon, samtang maghunahuna niadto nga mga kabalaka, mahimo nilang siksikon ang seksyon 111 alang sa tambag ug kahupayan nga gihatag sa Ginoo sa pagtabang kanato. Ang mga sakop sa klase mahimong mopaambit kon sa unsang paagi ang Manluluwas mitabang kanila sa dihang ilang gibutang ang ilang pagtuo diha Kaniya.

• Ang mga sakop sa imong klase tingali adunay mga kasinatian nga susama sa kang Joseph—sa diha nga gibati nila nga gidawat sila sa Ginoo bisan pa sa ilang “walay pulos nga mga buhat” (Doktrina ug mga Pakigsaad 111:1). Sa unsang paagi ang ilang mga kasinatian naghulagway sa mga kamatuoran nga gitudlo diha sa Doktrina ug mga Pakigsaad 111? Sama pananglit, kanus-a nila gibati nga ang Ginoo “[mi]han-ay sa tanan nga mga butang alang sa [ilang] kaayohan”? (bersikulo 11). Unsa ang gitudlo kanila niini nga mga kasinatian mahitungod sa Manluluwas ug mahitungod sa ilang kaugalingon?

Doktrina ug mga Pakigsaad 112:3–15, 22

Ang Ginoo mogiya niadtong mapaubsanong nagtinguha sa Iyang kabubut-on.

• Aron matabangan ang mga sakop sa klase sa paghisgot kon unsa ang gitudlo sa seksyon 112 mahitungod sa pagkamapainubsanon, ikonsiderar ang pagbahin sa klase ngadto sa tulo ka grupo. Hatagi ang matag grupo og usa sa mosunod nga mga pangutana nga pamalandungan samtang magribyu sila sa mga bersikulo 3–15 ug 22: Unsa ang pagkamapainubsanon? Unsaon nato nga mahimong mas mapainubsanon? Unsa nga mga panalangin ang gisaad ngadto sa mapainubsanon? Hatagi ang klase og panahon sa pagpaambit sa ilang mga tubag. Ang mga grupo mahimong makaangkon og dugang nga mga panabut pinaagi sa pagbasa sa pamahayag ni Elder Quentin L. Cook diha sa “Dugang nga mga Kapanguhaan” o ang seksyon nga giulohan og “Pagpaubos” sa Isangyaw ang Akong Ebanghelyo (pahina 146). Nganong ang pagkamapainubsanon mahinungdanon sa paghimo sa buhat sa Ginoo?

  duha ka tawo nga nag-ampo

  Kon kita mapaubsanon, ang Ginoo mogiya kanato ug motubag sa atong mga pag-ampo.

Doktrina ug mga Pakigsaad 112:12–26

Kadtong tinud-anay nga nakabig makaila ni Jesukristo.

• Ang kamatuoran nga ang pipila ka Apostoles niadtong 1837 mibatok sa Propeta usa ka maayong pahinumdom nga bisan unsa pa ang atong calling o unsa ka dako ang atong nahibaloan sa ebanghelyo, kinahanglang siguroon nato sa tinagsa-tagsa nga tinud-anay kitang nakabig. Ang pagbasa sa tambag nga gihatag sa Ginoo kang Thomas B. Marsh aron sa pagtabang kaniya nga mahiusa ang Korum sa Napulog Duha makahatag sa imong klase og mga panabut kon unsa ang kahulugan sa pagkakabig. Tingali ang mga sakop sa klase mahimong mobasa sa Doktrina ug mga Pakigsaad 112:12–26 nga maghunahuna sa usa ka sakop sa pamilya o higala—usa ka tawo nga tingali nanlimbasug sa ilang pagtuo. Unsa nga mga kamatuoran dinhi niini nga mga bersikulo ang angayng hatagan og gibug-aton sa mga sakop sa klase aron matabangan kana nga tawo nga mas hingpit nga makabig? Hatagi ang mga sakop sa klase og panahon nga mamalandong kon unsay ilang mahimo aron mapalig-on ang ilang kaugalingong pagkakabig ngadto sa Ginoo.

icon sa dugang nga mga kapanguhaan

Dugang nga mga Kapanguhaan

Ang Kristohanon nga hiyas sa pagkamapainubsanon.

Si Elder Quentin L. Cook nagtudlo:

“Walay swerte, sa atong panahon sa matag bahin sa katilingban, makita nato nga giplastar ang paghatag og importansya sa kaugalingon ug kaarogante samtang gipakaubos ang pagkamapainubsanon ug pagkadunay tulubagon ngadto sa Dios. Kadaghanan sa katilingban wala kahibalo bisan sa sukaranang kamatuoran ug wala makasabut nganong ania kita niining kalibutan. Ang tinuod nga pagkamapainubsanon, nga gikinahanglan aron makab-ot ang katuyoan sa Ginoo alang kanato, panagsa ra makita.

“Importante nga masabtan ang gibug-aton sa pagkamapainubsanon, pagkamatarung, kinaiya, ug salabutan ni Kristo, sama sa gipakita diha sa mga kasulatan. Binuang ang pagpakaubos sa panginahanglan sa padayon nga pagpaningkamot alang niining Kristohanong mga kinaiya ug mga hiyas kada adlaw, ilabi na ang pagkamapainubsanon. …

“Niadtong Hulyo 23, 1837, si Propeta Joseph nakigkita ni Elder Thomas B. Marsh, ang Presidente sa Korum sa Napulog Duha. Si Elder Marsh klaro nga nasagmuyo nga gitawag sa Propeta ang duha ka sakop sa iyang korum nga moadto sa England nga wala mokonsulta niya. Sa pakigkita ni Joseph kang Elder Marsh, ang bisan unsang dili maayo nga pagbati gipadaplin, ug ang Propeta nakadawat og talagsaong pagpadayag. Mao na kini karon ang ika-112 nga seksyon sa Doktrina ug mga Pakigsaad. Naghatag kini og talagsaong direksyon gikan sa langit kalabut sa pagkamapainubsanon ug misyonaryo nga buhat. Ang Bersikulo 10 mabasa, ‘Magpaubos ka; ug ang Ginoo nga imong Dios moagak kanimo pinaagi sa kamot, ug mohatag kanimo og tubag sa imong mga pag-ampo’ [Doktrina ug mga Pakigsaad 112:10]” (“Ang Mahangturong mga Butang nga Nahitabo Kada Adlaw,” Liahona, Nob. 2017, 52).

Pagpalambo sa Atong Pagtudlo

Pagpokus sa mga tawo. “Ang paagi sa imong pagtagad sa mga tawo sama kaimportante sa unsay imong itudlo kanila. Usahay ang atong pagkaokupado sa pagpresentar og usa ka leksyon makapugong nato sa pagpahayag sa atong gugma niadtong atong gitudloan. … Hunahunaa kon sa unsang paagi ikaw makatutok sa unsay labing importante” (Pagtudlo sumala sa Pamaagi sa Manluluwas, 6).