Bilanggoan sa Liberty

Ang Bilanggoan sa Liberty Panahon sa Tingpamulak, ni Al Rounds

Oktubre 18–24

Doktrina ug mga Pakigsaad 121–123

“O Dios, Hain Ba Ikaw?”

Ang labing maayong paagi sa pagpangandam sa pagtudlo mao ang pagbasa sa mga kasulatan, paghunahuna sa mga tawo nga imong tudloan, ug pagsunod sa Espiritu. Ang mga kalihokan dinhi niini nga outline makadugang sa inspirasyon nga imong madawat.

Irekord ang Imong mga Impresyon

pagpaambit nga icon

Dapita ang Pagpaambit

Dapita ang mga sakop sa klase sa pagpili og usa ka mensahe gikan sa Doktrina ug mga Pakigsaad 121–23 nga gusto nilang ipaambit sa usa ka tawo kinsa nag-antus. Sultihi sila sa pagpasabut sa ilang pagpili.

icon sa pagtudlo

Itudlo ang Doktrina

Doktrina ug mga Pakigsaad 121:1–33; 122

Kon malahutay nato pag-ayo ang atong mga pagsulay, ang Dios mobayaw kanato sa kahitas-an.

• Tingali adunay mga sakop sa imong klase kinsa, tungod sa lisud nga mga pagsulay, adunay mga pagbati nga susama sa gipadayag ni Joseph Smith diha sa Doktrina ug mga Pakigsaad 121:1–6. Human dungan nga mobasa niini nga mga bersikulo, mahimo nimong dapiton ang mga sakop sa klase sa pag-ila ug pagpaambit og mga mensahe diha sa mga bersikulo 7–33 nga makahatag kanila og paglaum ug kahupayan panahon sa ilang mga pagsulay. Unsa ang gipasabut sa “molahutay pag-ayo”? (bersikulo 8). Sa unsang paagi ang Manluluwas makatabang kanato nga molahutay pag-ayo? Unsaon nato pagtabang sa usag usa nga molahutay pag-ayo?

• Aron matabangan ang mga sakop sa klase sa pagkonsiderar kon sa unsang paagi ang mga pagsulay “makahatag [kanato] og kasinatian” ug “alang sa [atong] kaayohan” (Doktrina ug mga Pakigsaad 122:7), mahimo nimo silang hatagan og usa ka piraso nga papel ug hangyoa sila sa pagsulat og usa ka pagsulay nga ilang nasinati. Sa pikas bahin sa papel, ang mga sakop sa klase mahimong mosulat sa mga pulong nga “kasinatian” ug “kaayohan.” Samtang hisgutan ninyo ang Doktrina ug mga Pakigsaad 122, awhaga ang mga sakop sa klase sa pagsulat sa bisan unsang hunahuna nila mahitungod sa “pikas bahin” sa ilang mga pagsulay: ang “kasinatian” o “kaayohan” nga ilang naangkon. Ang pipila ka mga sakop sa klase mahimong komportable nga mopaambit kon sa unsang paagi ang ilang pagsulay nahimo hinoong alang sa ilang kaayohan. O mahimo nilang basahon ang kasinatian ni Elder Koichi Aoyagi diha sa “Padayon sa Imong Pamaagi” (Liahona, Nob. 2015, 126–28).

Doktrina ug mga Pakigsaad 121:34–46

Kinahanglan gayud kita nga magmatarung aron makagamit sa “mga gahum sa langit.”

• Mahimong makaikag ang pagtandi kon sa unsang paagi ang “gahum o impluwensya” gipadayon diha sa kalibutan ngadto sa paagi nga gitudlo sa Ginoo nga ang gahum o impluwensya angay nga ipadayon (tan-awa sa seksyon 121). Aron sa pagtabang niini nga diskusyon, pwede ka nga mohimo og duha ka kolum nga talaan sa pisara nga sulatan og Kalibutanong Gahum ug Mga Gahum sa Langit. Ang mga sakop sa klase mahimong mosulat diha sa talaan og mga pulong ug mga hugpong sa mga pulong gikan sa Doktrina ug mga Pakigsaad 121:34–46. Sa unsang paagi kini nga mga bersikulo makausab sa atong pagtan-aw sa atong mga responsibilidad diha sa atong mga pamilya, isip tigpangalagad nga mga kaigsoonan, o sa ubang mga sitwasyon diin naglaum kita nga makaimpluwensya sa uban alang sa kaayohan?

• Usa ka paagi sa paghisgot sa tambag ug talagsaon nga mga panalangin diha sa Doktrina ug mga Pakigsaad 121:45–46 mao ang pagbahin sa klase ngadto sa mga grupo ug sa paghangyo sa matag grupo sa pagtuon ug paghisgot og hugpong sa mga pulong gikan niini nga mga bersikulo, sama sa “himoa ang hiyas nga modayan-dayan sa inyong mga hunahuna nga walay paghunong” o “ingon sa mga yamog nga gikan sa langit.” Mahimo silang mangita sa mga kahulugan sa mga pulong, mobasa og konektado nga mga kasulatan diha sa mga footnote, ug maghisgot kon unsay kahulugan sa mga hugpong sa mga pulong diha kanila. Ang ubang mga grupo tingali gusto nga modrowing og mga imahe aron sa paghulagway sa ilang hugpong sa mga pulong. Dapita ang matag grupo sa pagpaambit diha sa klase sa ilang nakat-unan.

Doktrina ug mga Pakigsaad 122:8–9

Si Jesukristo mikunsad ubos sa tanang butang ug naglig-on kanato sa atong mga pagsulay.

• Ang pagsabut nga si Jesukristo “mikunsad ubos [sa] tanan [nga butang]” makahatag sa mga sakop sa klase sa pagsalig nga modangup Kaniya. Kining dugang nga mga kasulatan makatabang sa pagpasabut kon unsa ang kahulugan niini nga hugpong sa mga pulong: Isaias 53:3–4; Mga Hebreohanon 2:17–18; 1 Nephi 11:16–33; Alma 7:11–13. Ang mga sakop sa klase mahimong mobasa niini nga mga bersikulo, apil sa Doktrina ug mga Pakigsaad 122:8, nga mangita og usa ka butang nga makalig-on sa ilang pagtuo nga si Jesukristo makatabang kanila sa ilang mga pagsulay. Mahimo usab silang makakaplag og inspirasyon diha sa mga himno mahitungod sa Manluluwas, sama sa “Ang Kalinaw Asa Ko Pangitaa?” (Mga Himno, nu. 129).

• Ang pamahayag diha sa “Dugang nga mga Kapanguhaan” naghatag og dugang nga panabut kon sa unsang paagi ang Manluluwas mikunsad ubos sa tanang butang. Mahimo ka nga maghunahuna og paagi nga imong mapakita kon sa unsang paagi ang pagkaanaa “ubos” sa usa ka bug-at nga butang nakahimo kanato nga “hingpit nga nakapahimutang sa pagtuboy [niini].” Sa unsang paagi ang pagkahibalo nga ang Manluluwas mikunsad ubos sa tanang butang nakatabang kanato sa atong mga pagsulay?

  Si Jesus nga anaa sa yuta sa Getsemani

  Si Jesus nakasabut sa atong pag-antus. Dili Sumala sa Akong Pagbuot, Kondili sa Imo, ni Walter Rane.

icon sa dugang nga mga kapanguhaan

Dugang nga mga Kapanguhaan

Si Kristo mikunsad ubos sa tanang butang.

Si Presidente Dallin H. Oaks mitudlo, “Dunay minilyon ka mga tawo nga may kahadlok sa Dios kinsa nag-ampo sa Dios nga matuboy pagawas sa ilang mga kasakit. Ang atong Manluluwas mipadayag nga Siya ‘nakasinati sa tanan nga mga butang’ (D&P 88:6). Sama sa gitudlo ni Elder Neal A. Maxwell, ‘Kay “mikunsad sa tanan nga mga butang,” Siya nakasabut, sa hingpit ug sa personal, sa kinatibuk-ang pag-antus sa katawhan’ [Ensign, Nob. 1997, 23]. Mahimo pa gani kitang moingon nga tungod kay mikunsad sa tanan nga mga butang, Siya hingpit nga nakapahimutang sa pagtuboy kanato ug paghatag kanato og kalig-on nga atong gikinahanglan aron makalahutay sa atong mga kasakit” (“Nalig-on pinaagi sa Pag-ula ni Jesukristo,” Liahona, Nob. 2015, 64).

Pagpalambo sa Atong Pagtudlo

Ang imong tawag dinasig. Isip usa ka magtutudlo, ikaw gitawag sa Ginoo sa pagpanalangin sa Iyang mga anak. Gusto Niya nga magmalampuson ka, mao nga samtang magpakabuhi ka nga takus sa Iyang tabang, mohatag Siya kanimo sa pagpadayag nga imong gikinahanglan (tan-awa sa Pagtudlo sumala sa Pamaagi sa Manluluwas, 5).