Layo nga Kasadpan

Layo nga Kasadpan, ni Al Rounds

Oktubre 11–17

Doktrina ug mga Pakigsaad 115–120

“Ang Iyang Pagsakripisyo Mahimo nga Labaw pa nga Sagrado ngari Kanako kay sa Iyang Paglambo”

Samtang mangandam ka sa pagtudlo, hinumdumi nga ang imong nag-unang katuyoan mao ang pagtabang nga makapalig-on og pagtuo diha ni Jesukristo.

Irekord ang Imong mga Impresyon

pagpaambit nga icon

Dapita ang Pagpaambit

Sa dili pa ka maghisgot sa mga baruganan gikan sa mga seksyon 115–20 nga makahuluganon kanimo, hangyoa ang mga sakop sa klase sa pagpaambit sa unsay makahuluganon ngadto kanila. Sama pananglit, mahimo nimong dapiton ang mga sakop sa klase sa pagkompleto niini nga kapahayag: “Mapasalamaton ako nga gibasa nako ang mga seksyon 115–20 tungod kay …”

icon sa pagtudlo

Itudlo ang Doktrina

Doktrina ug mga Pakigsaad 115:4–6

Ang Simbahan ni Jesukristo sa mga Santos sa Ulahing mga Adlaw maoy usa ka panalipod ug usa ka dangpanan.

• Ang mga sakop sa klase mahimong mosiksik sa mensahe ni Presidente Russell M. Nelson nga “Ang Sakto nga Ngalan sa Simbahan” (Liahona, Nob. 2018, 87–90) alang sa mga panabut nga makatabang kanila sa pagsabut sa mga bersikulo 4–6. Nganong importante man ang paggamit sa sakto nga ngalan sa Simbahan?

• Human magbasa og dungan sa Doktrina ug mga Pakigsaad 115:4–6, ang mga sakop sa klase mahimong maghisgot kon sa unsang paagi ang Simbahan ug ang mga miyembro niini sama sa usa ka kahayag o usa ka sumbanan. Mahimo ka nga mopakita og hulagway sa usa ka parola panahon sa bagyo ug pangutan-a ang mga sakop sa klase kon sa unsang paagi kini adunay kalabutan sa mensahe sa mga bersikulo 5–6. Sa unsang paagi ang panagpundok ngadto sa “Zion, ug … sa iyang mga istaka” mihatag kaninyo og “usa ka dangpanan gikan sa unos”? (bersikulo 6).

  parola

  Mahimo kitang magdan-ag isip mga kahayag aron sa pagtabang sa uban nga makakaplag og dangpanan diha sa Simbahan.

Doktrina ug mga Pakigsaad 117

Ang atong mga sakripisyo sagrado ngadto sa Ginoo.

• Dapita ang mga sakop sa klase sa paghunahuna nga sila kintahay si Newel K. Whitney o ang iyang asawa, si Elizabeth, kinsa nanag-iya og usa ka malampuson nga tindahan sa Kirtland apan gihangyo sa Ginoo sa pagbiya sa ilang kabtangan ug sa pagbalhin ngadto sa Missouri. Mahimo dayon silang mobasa sa mga bersikulo 1–11 ug mopaambit og usa ka butang nga gisulti sa Ginoo nga makatabang nila sa paghimo niini nga sakripisyo.

• Ang mga visual aid tingali makatabang sa mga sakop sa klase sa pagkonsiderar sa “gamay nga butang” nga usahay atong kaibgan imbis ang “mahinungdanon nga mga butang” (bersikulo 8). Ikonsiderar ang pagpakita og mga butang sama sa usa ka tulo sa tubig ug usa ka botelya sa tubig o usa ka chocolate chip ug usa ka chocolate bar. Tingali ang mga sakop sa klase makahunahuna og ubang mga ehemplo. Mahimo usab nimong isulat ang gamay nga butang ug mahinungdanon nga mga butang diha sa pisara ug hangyoa ang mga sakop sa klase sa paglista og mga ehemplo sa mga butang nga tingali kinahanglan natong buhian (itandi sa bersikulo 5) aron madawat ang “kabuhong” (bersikulo 7) sa Dios.

• Kon ang mga sakop sa klase adunay mga impresyon samtang nagbasa sa mga pulong sa Ginoo mahitungod ni Oliver Granger diha sa mga bersikulo 12–15, dapita sila sa pagpaambit. Ngano kaha nga ang atong mga sakripisyo mas sagrado ngadto sa Ginoo kay sa atong paglambo?

Doktrina ug mga Pakigsaad 119–20

Pinaagi sa pagbayad sa ikapulo, mitabang kita sa pagtukod ug “[pag]balaan [sa] yuta sa Zion.”

• Hunahunaa ang espirituhanong kalig-on nga mahimong moabut gikan sa pagpaambit sa mga sakop sa klase ngadto sa usag usa sa mga panalangin nga ilang nadawat gikan sa pagsunod sa balaod sa ikapulo. Mahimo usab silang mobasa sa Doktrina ug mga Pakigsaad 119:6 ug maghisgot kon sa unsang paagi kini nga balaod “[mo]balaan [sa] yuta sa Zion” ug mohimo sa atong ward o branch nga “usa ka yuta sa Zion [ngari kanato].” Mahimo usab silang mobasa sa Malaquias 3:8–12 aron sa pag-ila sa mga panalangin nga gisaad sa Ginoo alang sa pagbayad sa ikapulo.

• Kon ang mga sakop sa klase adunay mga pangutana kon unsaon paggamit ang ikapulo, mahimo nimo silang dapiton sa pagbasa sa seksyon 120 ug ang pagpasabut diha sa “Dugang nga mga Kapanguhaan.” (Si Elder David A. Bednar mihatag usab og makatabang nga deskripsyon diha sa, “Ang mga Tamboanan sa Langit” [Liahona, Nob. 2013, 19–20].) Unsaon nato sa pagtabang sa uban nga madugangan ang ilang pagtuo sa balaod sa Ginoo sa ikapulo?

icon sa dugang nga mga kapanguhaan

Dugang nga mga Kapanguhaan

Ang Konseho sa Paggasto sa mga Ikapulo.

Si Elder Robert D. Hales miingon:

“Sama sa gipadayag sa Ginoo, ang paggamit sa ikapulo gitino pinaagi sa usa ka konseho nga gilangkuban sa Unang Kapangulohan, ang Korum sa Napulog Duha ka mga Apostoles, ug ang Presiding Bishopric. Ang Ginoo sa piho nga paagi miingon nga ang buhat sa konseho kinahanglang dumalaon ‘pinaagi sa akong kaugalingon nga tingog ngadto kanila’ [Doktrina ug mga Pakigsaad 120:1]. Kini nga konseho gitawag og Ang Konseho sa Paggasto sa mga Ikapulo.

“Talagsaon kini nga makasaksi niini nga konseho nga mopatalinghug sa tingog sa Ginoo. Ang matag sakop makahibalo ug makasalmot sa tanang mga desisyon sa konseho. Walay desisyon nga himoon hangtud ang konseho magkahiusa. Ang tanang mga salapi sa ikapulo gastoon alang sa mga katuyoan sa Simbahan, lakip ang welfare—ang pag-alima alang sa mga kabus ug mga timawa—mga templo, mga gambalay ug paggalam sa mga balay-tigumanan, edukasyon, kurikulum—sa laktod nga pagkasulti, ang buhat sa Ginoo. …

“… Mohatag ako sa akong pagpamatuod mahitungod sa Konseho sa Paggasto sa mga Ikapulo. Nahimo akong sakop niini nga konseho sulod sa 17 na ka tuig, isip Presiding Bishop sa Simbahan ug karon isip sakop sa Korum sa Napulog Duha ka mga Apostoles. Sa tanan gayud, ang mga salapi sa ikapulo niini nga Simbahan gigamit alang sa Iyang mga katuyoan” (“Ikapulo: Usa ka Pagsulay sa Hugot nga Pagtuo nga adunay Mahangturon nga mga Panalangin,” Liahona, Nob. 2002, 28).

Pagpalambo sa Atong Pagtudlo

Dapita ang mga tigkat-on sa pagtudlo sa usag usa. “Tingali angay nga dapiton ang mga tigkat-on sa pagtabang sa usag usa sa pagpangita og mga tubag sa ilang mga pangutana. Kon giaghat sa Espiritu, mahimo ka nga modesisyon sa pagbuhat niini bisan kon gibati nimo nga nakahibalo ka sa tubag” (Pagtudlo sumala sa Pamaagi sa Manluluwas, 24).