pamilya kauban ang mga katigulangan sa kalibutan sa mga espiritu

Kami uban Kanila ug Sila uban Kanamo, ni Caitlin Connolly

Nobyembre 1–7

Doktrina ug mga Pakigsaad 125–128

“Ang Tingog sa Kalipay alang sa mga Buhi ug sa mga Patay”

Pamalandungi kini nga mga pulong ni Elder Ulisses Soares: “Ang labing maayo nga magtutudlo usa ka maayong ehemplo. Ang pagtudlo og butang nga ato gayud nga gisunod makahimo og kalainan sa kasingkasing niadtong atong gitudloan” (“Unsaon Nako Pagkasabut?” Liahona, Mayo 2019, 7).

Irekord ang Imong mga Impresyon

pagpaambit nga icon

Dapita ang Pagpaambit

Ang mga sakop sa klase mahimong mosulat diha sa pisara sa mga hugpong sa mga pulong gikan sa Doktrina ug mga Pakigsaad 125–28 nga daw importante kanila. Tugoti sila sa pagpaambit sa ilang mga hunahuna mahitungod niadto nga mga hugpong sa mga pulong. Sa unsang paagi ang pagtuon niini nga mga kamatuoran nakaimpluwensya sa ilang mga lihok karong semanaha?

icon sa pagtudlo

Itudlo ang Doktrina

Doktrina ug mga Pakigsaad 126

“Moamuma pag-ayo sa imong banay.”

• Ang mga tawag nga nadawat ni Brigham Young sa pagserbisyo sa Simbahan nagkinahanglan kaniya ug sa iyang pamilya nga mohimo og dagko nga mga sakripisyo; ang mga pulong sa Ginoo ngadto ni Brigham diha sa seksyon 126 mahimong makadasig og diskusyon sa klase kon nganong ang Ginoo usahay magkinahanglan og sakripisyo sa atong pagserbisyo. Sa unsang paagi ang Ginoo mitabang kanato nga matuman ang atong mga responsibilidad sa panimalay, sa mga calling sa Simbahan, ug sa ubang mga aspeto sa kinabuhi?

Doktrina ug mga Pakigsaad 127:2–4

Makasalig kita sa Ginoo sa lisud nga mga panahon.

• Sa unsang paagi kaha makatabang ang Doktrina ug mga Pakigsaad 127:2–4 sa mga sakop sa klase kinsa mibati nga, sama kang Joseph Smith, sila naglangoy sa “lawom nga tubig”? Mahimo nimong dapiton ang mga sakop sa klase sa pagbasa niini nga mga bersikulo ug sa pagpaambit kon unsaon nila sa pag-summarize ang kinaiya ni Joseph ngadto sa iyang mga hagit. Unsa nga mga pulong niini nga mga bersikulo ang makatabang sa usa ka tawo nga nanlimbasug? Sa unsang paagi misalig si Joseph sa Ginoo panahon sa iyang mga pagsulay? Unsaon nato sa pagsunod ang iyang ehemplo?

Doktrina ug mga Pakigsaad 128

Ang kaluwasan sa atong mga katigulangan mahinungdanon sa atong kaluwasan.

• Ikonsiderar kon sa unsang paagi nimo madasig ang mga sakop sa klase nga moapil sa buhat sa templo ug sa family history. Ang Doktrina ug mga Pakigsaad 128:15–18 makatabang nila nga mobati sa kadinalian niini nga buhat; mahimo nimo silang dapiton sa pagsiksik niini nga mga bersikulo alang sa usa ka butang nga makadugang sa ilang tinguha sa pagbuhat og mga bunyag alang sa ilang katigulangan nga namatay na. Ang mga pangutana nga sama niini tingali makatabang kanila sa pagpamalandong niini nga mga bersikulo: Nganong dili man “kita [mahingpit] kon wala ang atong mga patay”? (bersikulo 15). Nganong gitawag man ni Joseph Smith ang bunyag alang sa mga patay nga “labing mahimayaon sa tanan nga hilisgutan nga nahiapil sa walay katapusan nga ebanghelyo”? (bersikulo 17; tan-awa usab ang kinutlo diha sa “Dugang nga mga Kapanguhaan”). Sa unsang pagsabut nga tingali tungluhon ang yuta kon walay “nagsumpay … tali sa mga amahan ug sa mga anak”? (bersikulo 18). Kon ang mga sakop sa klase magkinahanglan og tabang sa pagsugod diha sa buhat sa family history, mahimo nimong dapiton ang lider sa templo ug family history sa ward nga ipahibalo kanila ang FamilySearch.org.

  Mahimo usab nimo silang dasigon pinaagi sa mga bersikulo nga nagpadayag og kalipay sa buhat sa templo ug family history, sama sa Doktrina ug mga Pakigsaad 128:19–23. Ang mga sakop sa klase mahimong mobasa niini nga mga bersikulo ug mangita og mga pulong nga nagpakita kon unsa ang gibati ni Joseph Smith mahitungod sa kaluwasan sa mga patay. Dayon mahimo nimo silang hangyuon sa pagpaambit og mga kasinatian sa dihang aduna silay susama nga mga pagbati mahitungod niini nga buhat.

• Tungod kay ang kaluwasan sa mga patay anaa lamang sa Ang Simbahan ni Jesukristo sa mga Santos sa Ulahing mga Adlaw, mahimong aduna kitay mga oportunidad sa pagpasabut niini nga doktrina ngadto sa mga tawo nga wala pa makadungog niini sukad. Ang mga sakop sa klase mahimong mosiksik sa Doktrina ug mga Pakigsaad 128 alang sa usa ka butang nga mahimo nilang mapaambit sa pakig-istorya sa usa ka tawo kinsa nangutana mahitungod sa bunyag alang sa mga patay. Unsa ang gitudlo kanato niini nga doktrina mahitungod sa Langitnong Amahan ug ni Jesukristo? Papraktisa ang mga sakop sa klase sa unsay ilang isulti.

  batan-ong lalaki nga adunay mga family name card

  Ang pagbuhat og serbisyo sa templo alang sa atong katigulangan mokonektar kanato ngadto kanila.

icon sa dugang nga mga kapanguhaan

Dugang nga mga Kapanguhaan

Si Presidente Gordon B. Hinckley miingon:

“Ang Pag-ula ni Jesus alang sa tanan nagrepresentar sa mahinungdanon nga puli nga sakripisyo. Iyang gipahimutang ang sumbanan diin Siya nahimong proxy alang sa tanang katawhan. Kini nga sumbanan diin ang usa ka tawo makabuhat alang sa laing tawo gihimo diha sa mga ordinansa sa balay sa Ginoo. Dinhi nagserbisyo kita alang niadtong nangamatay na nga wala makahibalo sa ebanghelyo. Kadtong nangamatay adunay opsyon sa pagdawat o pagsalikway sa ordinansa nga gipahigayon. Pareha sila niadtong ania pa sa kalibutan. Ang mga patay gihatagan og pareho nga oportunidad sama sa buhi. Makausa pa, pagkamahimayaon ug pagkatalagsaon ang paagi nga gihimo sa Makagagahum pinaagi sa Iyang pagpadayag ngadto sa Iyang Propeta” (“Ang Pinakaimportanteng mga Butang nga Gipadayag sa Dios,” Liahona, Mayo 2005, 82–83).

Pagpalambo sa Atong Pagtudlo

Pag-ampo alang sa mga sakop sa imong klase. I-ampo ang matag ngalan niadtong imong gitudloan, ug tinguhaa ang pagsabut sa ilang piho nga mga panginahanglan. Sa imong pagbuhat niini, ang Langitnong Amahan makatabang kanimo nga masayud unsay itudlo aron sa pagtabang nga matubag kadto nga mga panginahanglan. (Tan-awa sa Pagtudlo sumala sa Pamaagi sa Manluluwas, 6.)