Ang Pamanhonon Nagsingabut, ni Elizabeth Gibbons

Nobyembre 15–21

Doktrina ug mga Pakigsaad 133–134

“Pag-andam Kamo alang sa Pag-anhi sa Pamanhonon”

Unsa nga mga kamatuoran diha sa Doktrina ug mga Pakigsaad 133–34 ang imong gibati nga labing makatabang sa imong klase? Ikonsiderar sa mainampoong paagi ang ilang mga panginahanglan samtang magtuon ka niining semanaha.

Irekord ang Imong mga Impresyon

Dapita ang Pagpaambit

Mahimo nimong isulat ang pulong nga patalinghugi diha sa pisara ug dapita ang mga sakop sa klase sa pagsulat tapad niini og mga bersikulo gikan sa Doktrina ug mga Pakigsaad 133–34 nga nagtuo sila nga kinahanglan natong patalinghugan sa atong panahon. Hangyoa sila sa pagpaambit sa ilang mga hunahuna mahitungod niana nga mga bersikulo. (Tabangi ang mga sakop sa klase nga tutokan ang mga baruganan sa doktrina imbis ang politikanhon nga mga opinyon.)

Itudlo ang Doktrina

Doktrina ug mga Pakigsaad 133:1–19; 37–39

Gusto sa Ginoo nga mangandam kita alang sa Iyang Ikaduhang Pag-anhi.

• Unsaon nimo pagtabang ang imong klase nga makasabut nganong importante nga mabalaan ang atong kaugalingon aron makatabang sa uban sa pagpangandam alang sa Ikaduhang Pag-anhi sa Manluluwas? Mahimo nimong dapiton ang mga sakop sa klase sa pagribyu sa Doktrina ug mga Pakigsaad 133:1–19, 37–39 ug sa paghimo og duha ka lista: usa ka lista sa tambag sa Ginoo kon unsaon sa pagbalaan sa atong kaugalingon ug laing lista sa tambag kon unsaon sa pag-andam sa kalibutan alang sa pagbalik sa Manluluwas. Unsa ang kahulugan, sa espirituhanong pagsabut, nga “[mo]gawas … gikan sa Babelonia” (bersikulo 5) ug “modangop ngadto sa Zion”? (bersikulo 12). Alang sa dugang kon unsa ang gipasabut sa pagbalaan, tan-awa ang “Pagbalaan” diha sa Giya ngadto sa mga Kasulatan (scriptures.ChurchofJesusChrist.org).

Doktrina ug mga Pakigsaad 133:19–53

Ang Ikaduhang Pag-anhi malipayon alang sa mga matarung.

• Sa ilang pagtuon sa kasulatan sa panimalay, ang mga sakop sa imong klase tingali nakakaplag og makahuluganon nga mga bersikulo sa kasulatan niini nga seksyon nga nakahimo nila nga maghinam-hinam sa Ikaduhang Pag-anhi sa Manluluwas. Dapita sila sa pagpaambit niini nga mga tudling. Mahimo usab nimong dapiton ang klase nga magsiksik sa mga bersikulo 19–53 nga magpares, mangita sa mga rason nga maghinam-hinam sa Ikaduhang Pag-anhi ni Jesukristo. Samtang ang mga sakop sa klase mopaambit sa ilang nakaplagan, awhaga sila sa paghisgot kon sa unsang paagi ang Manluluwas “mitubos kanila, ug miagak kanila, ug midala kanila” (bersikulo 53). Tingali nindot kini nga oportunidad nga manganta og dungan sa usa ka himno mahitungod sa matubsanong gahum sa Manluluwas, sama sa “Manunubos sa Israel” (Mga Himno, nu. 6). Unsa pa ang ubang “mga awit sa walay katapusan nga kalipay” (bersikulo 33) ang makatabang kanato nga mobati sa “mahigugmaon nga kalooy sa [atong] Ginoo”? (bersikulo 52).

Doktrina ug mga Pakigsaad 134

“Ang mga gobyerno gipasiugdahan sa Dios alang sa kaayohan sa tawo.”

• Aron matabangan ang mga sakop sa klase nga makat-on gikan sa Doktrina ug mga Pakigsaad 134, mahimo ka nga mobutang og mga pangutana sama niini diha sa usa ka sudlanan o diha sa pisara: Sa unsang paagi gusto sa Dios nga ang mga gobyerno makabenepisyo sa Iyang mga anak? Unsa ang atong buhaton kon ang kalibutanon nga mga balaod mosukwahi sa langitnon nga mga balaod? Unsa ang atong mga katungdanan ug mga reponsibilidad isip mga lungsuranon? Dapita ang mga sakop sa klase sa pagpili og usa ka pangutana ug sa paggamit sa seksyon 134 aron sa paghimo og tubag. Awhaga ang mga sakop sa klase nga likayan ang paghisgot og piho nga politikanhong mga isyu o mga opinyon.

• Ang kagawasan nga “[mo]simba … sa bisan unsa nga paagi, asa, o unsa ang [atong] buot simbahon” (Mga Artikulo sa Hugot nga Pagtuo 1:11) maoy usa ka pribilehiyo nga gusto sa Ginoo nga maangkon sa tanan. Kon gibati nimo nga makabenepisyo sa imong klase ang paghisgot mahitungod sa baruganan sa relihiyuso nga kagawasan, ikonsiderar ang dungan nga pagbasa sa Doktrina ug mga Pakigsaad 134:4, 7, 9. Unsa ang gitudlo kanato niini nga mga bersikulo mahitungod sa tahas sa gobyerno sa pagpanalipod sa relihiyusong kagawasan? Unsaon nato pagpasiugda og relihiyusong kagawasan alang sa uban ug sa atong kaugalingon? Ang mga sakop sa klase mahimong makakaplag og mga panabut nga makatabang sa pagtubag niini nga pangutana diha sa “Dugang nga mga Kapanguhaan.”

Dugang nga mga Kapanguhaan

Mga nag-unang aspeto sa kagawasan sa relihiyon.

Si Elder Robert D. Hales mitudlo:

“Dunay upat ka nag-unang aspeto ang kagawasan sa relihiyon nga kinahanglan natong masandigan ug protektahan isip mga Santos sa Ulahing mga Adlaw.

“Una ang kagawasan nga motuo. Kinahanglan nga walay sawayon, gukuron, o atakihon sa mga tawo, o gobyerno, kon unsa ang iyang gituohan mahitungod sa Dios. …

“Ang ikaduhang aspeto sa kagawasan sa relihiyon mao ang kagawasan sa pagpakigbahin sa atong pagtuo ug gituohan ngadto sa uban. … Isip mga ginikanan, full-time nga mga misyonaryo, ug mga member missionary, nagasalig kita sa kagawasan sa relihiyon aron makatudlo sa doktrina sa Ginoo diha sa atong mga pamilya ug sa tibuok kalibutan.

“Ang ikatulong aspeto sa kagawasan sa relihiyon mao ang kagawasan sa pagporma og mga relihiyusong organisasyon, simbahan, ug sa malinawong pagsimba kuyog sa uban. Ang ika-onse nga artikulo sa hugot nga pagtuo nag-ingon, ‘Kami nag-angkon sa kahigayunan sa pagsimba sa Dios nga Makagagahum sumala sa pagmando sa among kaugalingon nga tanlag, ug nagtugot sa tanan nga mga tawo sa samang kahigayunan, sa pagpasimba kanila sa bisan unsang paagi, asa, o unsa ang ilang buot simbahon.’ …

“Ang ikaupat nga aspeto sa kagawasan sa relihiyon mao ang kagawasan sa pagsunod sa atong gituohan—gawasnong paggamit sa atong gituohan dili lang sa panimalay ug sa simbahan apan sa publikong mga dapit usab” (“Pagpreserbar sa Kabubut-on, Pagpanalipod sa Kagawasan sa Relihiyon,” Liahona, Mayo 2015, 112).

Pagpalambo sa Atong Pagtudlo

Tudloan sa “ngano.” “Kon [ang mga sakop sa klase] nakasabut sa mahangturong plano sa Langitnong Amahan alang sa kalipay sa Iyang mga anak, ang mga hinungdan sa mga baruganan sa ebanghelyo ug mga sugo mahimong mas klaro ug ang kadasig sa pagsunod magkadako” (Pagtudlo sumala sa Pamaagi sa Manluluwas, 20).