Si Joseph Smith sa Nauvoo, 1840, ni Theodore Gorka

Nobyembre 8–14

Doktrina ug mga Pakigsaad 129–132

“Kon Kita Makadawat og Bisan Unsa nga Panalangin gikan sa Dios, Kini Tungod sa Pagsunod”

Samtang importante ang pagbaton og plano sa pagtudlo, importante usab nga mahimong sensitibo sa Espiritu ug sa mga panginahanglan sa mga sakop sa klase. Sutaa gikan sa mga sakop sa klase unsa nga mga baruganan diha sa mga seksyon 129–32 ang makahuluganon kanila.

Irekord ang Imong mga Impresyon

Dapita ang Pagpaambit

Ang mga sakop sa klase tingali adunay nakat-unan gikan sa ilang pagtuon sa mga seksyon 129–32 nga may kalabutan sa nagkadaiyang mga hilisgutan sa ebanghelyo. Aron mahatagan sila og kahigayunan sa pagpaambit sa unsay ilang nakat-unan, mahimo nimong isulat ang pipila niadto nga mga hilisgutan diha sa pisara, sama sa mga anghel, kahimayaan, pagkamasulundon, ang kinaiya sa Dios, ug mahangturong kaminyoon (mahimo ka usab nga mosulat og uban pa sa pisara alang sa dugang nga mga hilisgutan). Ang mga sakop sa klase mahimong mogahin og pipila ka minuto sa pagpangita og usa ka bersikulo dinhi niini nga mga seksyon nga adunay kalabutan sa usa sa mga hilisgutan ug isulat ang reperensya diha sa pisara. Mahimo dayon ninyong basahon sa tibuok klase ang mga bersikulo ug hisgutan kon unsa ang gitudlo sa matag usa mahitungod niana nga hilisgutan.

Itudlo ang Doktrina

Doktrina ug mga Pakigsaad 130:2, 18–23; 131:1–4; 132:20–25

Kini nga kinabuhi gituyo sa pag-andam kanato alang sa kahimayaan.

• Adunay daghan nga wala nato mahibaloi mahitungod sa kahimayaan o kinabuhi sa celestial nga gingharian—ang kadaghanan niini tingali lapas sa atong kasamtangang abilidad sa pagsabut. Apan ang Dios mipadayag og pipila ka bililhong timailhan, ug daghan niini makita diha sa Doktrina ug mga Pakigsaad 130–32. Ang mga sakop sa klase mahimong magtuon og usa o sobra pa sa mga reperensya nga gilista sa ibabaw ug mopaambit og bisan unsang panabut nga ilang nakit-an mahitungod sa kahimayaan o sa celestial nga gingharian. Sa unsang paagi ang pagkasayud niini nga impormasyon mahitungod sa kinabuhing dayon makapanalangin sa atong kinabuhi karon?

Doktrina ug mga Pakigsaad 130:20–21; 132:5

Ang mga panalangin moabut gikan sa pagkamasulundon ngadto sa Dios.

• Ang Doktrina ug mga Pakigsaad 130:20–21 ug 132:5 nagtudlo sa samang baruganan. Awhaga ang mga sakop sa klase sa pagbasa sa duha ka tudling ug isulti, sa ilang kaugalingong mga pulong, kon unsa kana nga baruganan. Sa unsang paagi kini nga baruganan napakita diha sa atong kinabuhi? Unsaon nato pagkakaplag og paglaum ug kasiguroan diha ni Kristo kon nagmasulundon kita apan ang mga panalangin nga atong gipaabut wala dayon moabut? Alang sa dugang pa niini nga hilisgutan, mahimo ninyong ribyuhon og dungan ang mga panabut gikan sa mensahe ni Elder Dale G. Renlund “Magamadagayaon [Buhong] sa mga Panalangin” (Liahona, Mayo 2019, 70–73).

Doktrina ug mga Pakigsaad 131:1–4; 132:3–25

Ang Langitnong Amahan mihimong posible nga ang mga pamilya mahimong mahangturon.

• Unsa kaha ang atong isulti sa usa ka higala kinsa nangutana, “Nganong ang kaminyoon ug pamilya importante man kaayo sa inyong simbahan?” Ang mga sakop sa klase mahimong maghunahuna kon unsaon nila pagtubag niana nga pangutana samtang mobasa sila sa Doktrina ug mga Pakigsaad 131:1–4; 132:3–25; o ang mga pulong ni Elder Dieter F. Uchtdorf diha sa “Dugang nga mga Kapanguhaan.” Sa unsang paagi kini nga mga kamatuoran makaapekto sa paagi sa atong pagpuyo?

  

  Ang mga relasyon sa pamilya mahimong mahangturon pinaagi sa mga ordinansa sa templo.

Doktrina ug mga Pakigsaad 132:1–2, 29–40

Ang dinaghan nga kaminyoon madawat lamang sa Dios kon gisugo Niya kini.

• Kon ang mga sakop sa klase adunay mga pangutana mahitungod sa dinaghan nga kaminyoon, tabangi sila nga makasabut nga si Joseph Smith ug ubang nag-una nga mga Santos adunay mga pangutana usab. Awhaga sila sa pagpangita sa pangutana nga gipangutana ni Joseph sa Ginoo diha sa Doktrina ug mga Pakigsaad 132:1 ug ang tubag nga iyang nadawat diha sa mga bersikulo 29–40 (tan-awa usab sa Jacob 2:27, 30). Tingali ang mga sakop sa klase mahimong mopaambit kon giunsa nila sa pagtinguha og mga tubag sa mga pangutana sa ebanghelyo ug sa unsang paagi sila nagpabilin nga matinud-anon bisan kon ang pipila sa ilang mga pangutana nagpabilin nga wala matubag.

Dugang nga mga Kapanguhaan

Ang pamilya mao “ang han-ay sa langit.”

Si Presidente Dieter F. Uchtdorf mitudlo:

“Mapasalamaton ko nga nahisakop sa simbahan nga mihatag og bili sa kaminyoon ug pamilya. Ang mga miyembro sa Ang Simbahan ni Jesukristo sa mga Santos sa Ulahing mga Adlaw nailhan sa tibuok kalibutan nga dunay kinanindotan nga kaminyoon ug mga pamilya nga inyong makita. Nagtuo ko niini, sa usa ka bahin, tungod sa bililhong kamatuoran nga gipahiuli ni Joseph Smith nga ang kaminyoon ug mga pamilya gituyo nga magmahangturon. Ang tumong sa pamilya dili lang kay aron mahapsay ang dagan dinhi sa yuta ug isalikway kon maabut na sa langit. Hinoon, mao kini ang han-ay sa langit. Kini ang kopya sa celestial nga sumbanan ug sa pagsundog sa mahangturong pamilya sa Dios.

“Apan ang lig-on nga kaminyoon ug mga relasyon sa pamilya dili lang sulagma tungod kay kita mga miyembro sa Simbahan. Nagkinahanglan kini og kanunay, tinuyo nga mga buhat. Ang doktrina sa mahangturong mga pamilya kinahanglan magdasig nato sa pagpahinungod sa atong pinakamaayo nga paningkamot sa pagluwas ug pagpalambo sa atong mga kaminyoon ug mga pamilya” (“Agig Pagdayeg Niadtong Miluwas,” Liahona, Mayo 2016, 77–78).

Pagpalambo sa Atong Pagtudlo

Pagmugna og luwas nga palibut. “Awhaga [ang mga sakop sa klase] nga motabang kanimo sa pag-establisar og usa ka bukas, mahigugmaon, ug matinahurong palibut aron ang tanan mobati nga luwas sa pagpakigbahin sa ilang mga kasinatian, mga pangutana, ug mga pagpamatuod” (Pagtudlo sumala sa Pamaagi sa Manluluwas, 15).