ang gawas sa Bilanggoan sa Carthage

Carthage Jail

Nobyembre 22–28

Doktrina ug mga Pakigsaad 135–136

Siya “Nakasilyo sa Iyang Misyon ug sa Iyang mga Buhat uban sa Iyang Kaugalingon nga Dugo”

Samtang magbasa ka sa mga seksyon 135–36, ang Espiritu Santo mahimong mohatag kanimo og mga panabut nga tingali makatabang sa mga sakop sa imong klase. Ang mga ideya dinhi niini nga outline mahimong makaaghat usab og mga ideya nga imong magamit sa imong pagtudlo.

Irekord ang Imong mga Impresyon

pagpaambit nga icon

Dapita ang Pagpaambit

Ania ang usa ka paagi sa pagdapit sa mga sakop sa klase sa pagpaambit sa ilang mga hunahuna mahitungod sa mga seksyon 135–36. Dapita sila sa paghanduraw nga makahimo sila sa pagpakigsulti sa usa ka miyembro sa Simbahan gikan sa 1844, usa ka tawo nga naguol sa kamatayon ni Joseph Smith ug nabalaka kon unsa kaha ang gipasabut niini alang sa Simbahan. Unsa ang atong mapaambit gikan niini nga mga seksyon nga posibleng makatabang niining tawhana?

icon sa pagtudlo

Itudlo ang Doktrina

Doktrina ug mga Pakigsaad 135; 136:37–39

Gisilyohan ni Joseph ug Hyrum Smith ang ilang mga pagpamatuod pinaagi sa ilang dugo.

• Sa unsang paagi ang mga sakripisyo ni Joseph ug Hyrum Smith “misilyo” sa ilang mga pagpamatuod? Tingali ang mga sakop sa klase mahimong mamalandong niini nga pangutana samtang magribyu sila sa Doktrina ug mga Pakigsaad 135; 136:37–39. Mahimo dayon silang mopaambit sa bisan unsang panabut nga ilang nadawat. Mahimo usab silang mopaambit sa ilang mga pagbati mahitungod sa kaandam ni Joseph ug Hyrum nga mohatag sa ilang mga kinabuhi alang sa kamatuoran. Samtang dili kita hangyoon sa pagpakamatay alang sa kamatuoran, sa unsang paagi ang atong kinabuhi mahimong sama sa usa ka “silyo” alang sa atong mga pagpamatuod?

Doktrina ug mga Pakigsaad 135:3

Si Joseph Smith mas daghan og nabuhat alang sa atong kaluwasan kay ni bisan kinsa gawas ni Jesukristo.

• Unsaon nimo pagtabang ang mga sakop sa klase nga makasabut unsa ang nabuhat ni Joseph Smith alang sa ilang kaluwasan? Mahimo nimong isulat sa pisara ang Tungod sa gipadayag sa Ginoo pinaagi ni Joseph Smith, ako … ug dayon dapita ang mga sakop sa klase sa paghunahuna og mga paagi sa pagkompleto niini nga kapahayag. Mahimo nilang sugdan pinaagi sa pagsiksik sa Doktrina ug mga Pakigsaad 135:3 alang sa mga butang nga gibuhat ni Joseph Smith sa pagtabang kanato nga makaangkon og kaluwasan. Ikonsiderar ang pagdapit sa mga sakop sa klase sa pagpaambit sa ilang mga pagbati mahitungod ni Joseph Smith ug unsa ang gipadayag sa Ginoo pinaagi kaniya.

• Usa ka laing paagi sa pagtabang sa mga sakop sa klase sa paghunahuna mahitungod sa misyon ni Joseph Smith mao ang pagdapit kanila sa pagsulat og mubo nga istorya bahin sa namatay [obituary] o pagdayeg [eulogy] alang kaniya. Mahimo nimong hisgutan ang importante nga mga panghitabo o mga kalampusan gikan sa iyang kinabuhi nga mahimo nilang ilakip. Unsa ang ilang nakita diha sa Doktrina ug mga Pakigsaad 135 nga mahimo nilang hisgutan? Unsa ang ilang masulti sa ilang pagdayeg nga makatabang sa uban nga mapalig-on ang ilang pagtuo sa balaanong misyon ni Joseph Smith?

• Daghang kamatuoran mahitungod ni Jesukristo ug sa Iyang Pag-ula ang gipadayag pinaagi ni Joseph Smith—mga kamatuoran nga nakatampo sa kaluwasan sa tanang lalaki ug babaye. Aron matabangan ang mga sakop sa klase nga makaila niini nga mga kontribusyon, pwede ka nga mopakita og hulagway ni Jesukristo ug hangyoa ang pipila ka mga sakop sa klase sa pagpaambit og paborito nga bersikulo mahitungod ni Jesukristo gikan sa mga kasulatan nga gipadayag pinaagi ni Joseph Smith: ang Basahon ni Mormon, Doktrina ug mga Pakigsaad, ug Perlas nga Labing Bililhon. Sa unsang paagi kini nga mga kasulatan makatabang kanato nga makasabut ug mas mapaduol sa Manluluwas? Sa unsang paagi ang mga kamatuoran niini nga mga bersikulo makatampo sa atong kaluwasan?

Doktrina ug mga Pakigsaad 136

Atong matuman ang kabubut-on sa Ginoo samtang mosunod kita sa Iyang tambag.

• Ang outline niini nga semana sa Dali, Sunod Kanako—Alang sa mga Indibidwal ug mga Pamilya nagsugyot nga ang mga sakop sa klase mangita og tambag diha sa Doktrina ug mga Pakigsaad 136 nga makatabang kanila sa paghimo sa usa ka pagsulay ngadto sa usa ka espirituhanon nga kasinatian. Mahimo nimong hangyoon ang mga sakop sa klase sa pagpaambit sa bisan unsang tambag nga ilang nakit-an. Mahimo usab nimo silang hangyoon sa pagsiksik niini nga seksyon nga mangita og tambag nga makatabang kanato sa pagtuman sa kabubut-on sa Ginoo sa atong panahon, sama nga nakatabang kini sa mga Santos sa ilang “mga pagpanaw ngadto sa Kasadpan” (bersikulo 1).

  Winter Quarters

  Winter Quarters, ni Greg Olsen

• Posibleng makalingaw sa imong klase ang paghimo og poster sama niadtong makita diha sa mga magasin sa Simbahan mahitungod sa usa sa mga bersikulo sa seksyon 136. Magtrabaho nga magparis o tinagsa, ang mga sakop sa klase makasugod pinaagi sa pagsiksik sa mga bersikulo alang sa usa ka kamatuoran nga daw mahinungdanon kanila. Makahimo dayon sila og yano nga poster nga nagpakita kon sa unsang paagi kini nga kamatuoran, gitudlo niadtong 1847, makatabang gihapon kanato karon.

icon sa dugang nga mga kapanguhaan

Dugang nga mga Kapanguhaan

May Kalabutan nga Musika

Ang pagkanta sa mosunod nga mga himno makadapit sa Espiritu Santo o makadasig og diskusyon mahitungod sa buhat ni Propeta Joseph Smith ug sa mga sakripisyo sa mga Santos nga mipadayon human kaniya.

“Ang Subo nga Magpapanaw” (Mga Himno, nu. 20). Samtang anaa sa Bilanggoan sa Carthage, si Joseph Smith mihangyo ni John Taylor sa pagkanta niini nga himno.

“Pagdayeg sa Tawo” (Mga Himno, nu. 27). Ang teksto niini nga himno gisulat isip usa ka pasidungog kang Joseph Smith.

“Dali, Dali, Kamo mga Santos” (Mga Himno ug mga Awit sa mga Bata, nu. 2).

“Faith in Every Footstep”.

Pagpalambo sa Atong Pagtudlo

Pagpamatuod sa tinuod nga doktrina. Mahimo ka nga mopaambit sa imong pagpamatuod mahitungod sa mga kamatuoran sa doktrina sa tibuok leksyon, dili lang sa katapusan. Sa imong pagbuhat niini, ang Espiritu Santo mokompirma sa kamatuoran sa doktrina diha sa mga kasingkasing sa imong gitudloan. (Tan-awa sa Pagtudlo sumala sa Pamaagi sa Manluluwas, 21.)