Si Joseph nakakita sa iyang amahan, inahan, ug igsoong lalaki sa celestial nga gingharian (Ang Panan-awon ni Joseph Smith sa Celestial nga Gingharian, Robert Barrett).

Nobyembre 29–Disyembre 5

Doktrina ug mga Pakigsaad 137–138

“Ang Panan-awon sa Katubsanan sa mga Patay”

Si Presidente Dallin H. Oaks mitudlo: “Mahimong mangutana kita sa tago bahin sa mga sirkumstansya sa kalibutan sa espiritu. … Apan dili nato itudlo o gamiton isip opisyal nga doktrina kanang wala mohaum sa mga sumbanan sa opisyal nga doktrina” (“Salig sa Ginoo,” Liahona, Nob. 2019, 28). Siguroa nga ang inyong diskusyon nakabase sa mga kasulatan ug sa mga pulong sa mga propeta.

Irekord ang Imong mga Impresyon

Dapita ang Pagpaambit

Adunay daghang makadasig nga mga kamatuoran sa doktrina nga makita diha sa Doktrina ug mga Pakigsaad 137–38. Dapita ang mga sakop sa klase sa paglista og pipila niini. Dayon mahimo ka nga mogahin og pipila ka minuto sa pagribyu sa ilang mga lista sa tibuok klase ug sa paghisgot nganong kini nga mga kamatuoran importante ngadto kanila. Aduna bay nakakat-on og usa ka butang gikan niini nga mga seksyon nga wala nila masabti kaniadto?

Itudlo ang Doktrina

Doktrina ug mga Pakigsaad 137; 138:32–37

Ang matag kalag makaangkon og oportunidad sa pagpili sa celestial nga himaya.

• Daghan kanato nakaila og mga tawo kinsa walay kahigayunan nga madawat ang ebanghelyo niini nga kinabuhi—lakip niadtong nangamatay nga mga bata pa. Dapita ang mga sakop sa klase sa pagpaambit og kamatuoran nga ilang nakita diha sa seksyon 137 nga mitabang kanila nga makasabut sa plano sa Dios alang niini nga mga indibidwal. Unsa nga mga kamatuoran ang atong makita diha sa Doktrina ug mga Pakigsaad 138:32–37 nga nakadugang sa atong pagsabut sa plano sa Dios? Ang mga sakop sa klase mahimong mopaambit kon unsa ang ilang gibati ngadto sa Langitnong Amahan, sa Iyang plano sa kaluwasan, ug sa Pag-ula ni Jesukristo tungod niini nga mga kamatuoran. Ang pamahayag diha sa “Dugang nga mga Kapanguhaan” mahimong makatabang sa inyong diskusyon.

Doktrina ug mga Pakigsaad 138:1–11, 25–30

Ang pagbasa ug pagpamalandong sa mga kasulatan nag-andam kanato sa pagdawat og pagpadayag.

• Ang kasinatian nga gihulagway ni Joseph F. Smith diha sa Doktrina ug mga Pakigsaad 138:1–11, 25–30 makatabang kanato nga makasabut unsaon nato sa pag-andam sa atong kaugalingon sa pagdawat og pagpadayag. Tingali ang mga sakop sa klase mahimong magtambayayong sa pagsuta unsa ang ilang nakat-unan mahitungod sa pagpadayag gikan niini nga mga bersikulo. Mahimo nimong hangyoon ang mga sakop sa klase sa pagpaambit kon sa unsang paagi ang pagbasa ug pagpamalandong sa mga kasulatan miandam kanila sa pagdawat og pagpadayag (tan-awa usab sa Joseph Smith—Kasaysayan 1:11–12).

• Ang mensahe ni Presidente M. Russell Ballard nga “Ang Panan-awon sa Katubsanan sa mga Patay” (Liahona, Nob. 2018, 71–74) naghulagway sa kang Joseph F. Smith nga “tibuok kinabuhi nga pagpangandam … aron makadawat niining talagsaon nga pinadayag [Doktrina ug mga Pakigsaad 138].” Kon ang mga sakop sa imong klase mobasa sa mensahe ni Presidente Ballard niining semanaha, awhaga sila sa pagpaambit og usa ka butang nga ingon og importante kanila. O mahimo kamong mobasa og mga porsyon sa mensahe isip tibuok klase. Unsa ang ingon og importante kanato mahitungod sa kinabuhi ni Presidente Smith ug sa iyang kinaiya? Unsa ang atong makat-unan gikan sa iyang ehemplo?

  

  Joseph F. Smith, ni Albert E. Salzbrenner

Doktrina ug mga Pakigsaad 138:12–60

Ang buhat sa kaluwasan magpadayon lapas sa kamatayon.

• Aron matabangan ang mga sakop sa klase sa pagdiskubre og mga kamatuoran diha sa Doktrina ug mga Pakigsaad 138:12–60, mahimo nimo silang hatagan og pipila ka pangutana mahitungod sa kalibutan sa espiritu nga gitubag dinhi niini nga mga bersikulo. Sama pananglit: Unsa ang gibuhat sa Manluluwas samtang didto Siya sa kalibutan sa espiritu? Kinsa ang mga mensahero sa Ginoo, ug unsa ang ilang mensahe? Ang mga sakop sa klase mahimong mopili og usa o sobra pa niini nga mga pangutana ug magtinabangay sa pagpangita og mga tubag diha sa ginagmay nga mga grupo. Dayon mahimo nilang ipaambit sa usag usa ang mga kamatuoran nga ilang nakita. Unsa nga kalainan ang nahimo niini nga mga kamatuoran sa atong kinabuhi?

• Unsa ang atong isulti sa tawo kinsa mangutana, “Unsay mahitabo kon kita mamatay?” Unsa ang atong mapaambit gikan sa Doktrina ug mga Pakigsaad 138:12–60 nga makatabang sa pagtubag niini nga pangutana? (tan-awa usab sa Alma 40:11–15).

Dugang nga mga Kapanguhaan

Ang plano sa Dios naghatag og paagi alang sa tanan Niyang mga anak nga makadawat sa ebanghelyo.

Si Presidente Henry B. Eyring mitudlo:

“Diyutay ra kaayo sa mga anak sa Dios ang makabaton niining kinabuhia sa kompleto nga panabut sa plano sa Dios, sa pag-access sa mga ordinansa sa priesthood ug pakigsaad nga mohimo sa maulaong gahum sa Manluluwas nga hingpit nga magamit sa atong kinabuhi. …

“Magtuo ang uban nga dili kini patas. Gani ang pag-ingon nga walay plano gamiton nila nga ebidensya, nga walay pihong mga rekisito para sa kaluwasan—mobati nga ang makiangayon, mahigugmaong Dios dili mohimo og plano nga para lang sa diyutayng gidaghanon sa Iyang mga anak. Ang uban tingali moingon nga gitino nang daan sa Dios kinsa sa Iyang mga anak ang Iyang luwason ug ipaabut kanila ang ebanghelyo, samtang kadtong wala makadungog sa ebanghelyo siyempre dili ‘pinili.’

“Apan kamo ug ako nasayud, tungod sa pagpahiuli sa mga kamatuoran pinaagi ni Propeta Joseph Smith, nga ang plano sa Dios mas labaw pa kamahigugmaon ug kamakiangayon kay sa niana. Gusto gayud sa atong Langitnong Amahan nga pundukon ug panalanginan ang tanan sa Iyang pamilya. Samtang nasayud Siya nga dili tanan nila mopili nga maapil sa pundok, ang Iyang plano maghatag sa tanan Niyang mga anak sa oportunidad nga modawat o mosalikway sa Iyang pagdapit” (“Pagpundok sa Pamilya sa Dios,” Liahona, Mayo 2017, 20).

Pagpalambo sa Atong Pagtudlo

Gamita ang mga pulong sa mga propeta. “Ang mga kasulatan ug mga pulong sa mga propeta ug mga apostoles sa ulahing mga adlaw mao ang tinubdan sa mga kamatuoran nga atong gitudlo. Sa matag oportunidad, dasiga ang imong mga gitudloan nga modangup ngadto sa pulong sa Dios alang sa giya” (Pagtudlo sumala sa Pamaagi sa Manluluwas, 21).