Ngadto sa Tanang Takus nga mga Miyembro nga Lalaki, ni Emma Allebes

Disyembre 6–12

Ang Mga Artikulo sa Hugot nga Pagtuo ug Mga Opisyal nga Pahayag 1 ug 2

“Kami Nagtuo”

Basaha sa mainampoong paagi ang Mga Artikulo sa Hugot nga Pagtuo ug Mga Opisyal nga Pahayag 1 ug 2, ug tinguhaa ang inspirasyon sa Espiritu Santo samtang magplano ka og makahuluganong kasinatian sa pagkat-on alang sa mga sakop sa klase sa Dominggo.

Irekord ang Imong mga Impresyon

Dapita ang Pagpaambit

Mahimo nimong dapiton ang mga sakop sa klase sa pagkompleto sa mosunod nga pamahayag: “Nalipay ko nga akong gibasa ang mga kasulatan karong semanaha tungod kay …”

Itudlo ang Doktrina

Ang Mga Artikulo sa Hugot nga Pagtuo

Ang Mga Artikulo sa Hugot nga Pagtuo naglangkob og sukaranang mga kamatuoran sa gipahiuli nga ebanghelyo.

• Aniay paagi sa pagtabang sa mga sakop sa klase sa pagpaambit sa unsay ilang nakita nga labing makahuluganon diha sa Mga Artikulo sa Hugot nga Pagtuo: Mahimo nimong isulat ang mga numero 1 hangtud 13 diha sa pisara ug hangyoa ang mga sakop sa klase sa pagsulat tapad sa mga numero sa usa ka butang nga ilang nakat-unan gikan sa katakdo nga artikulo sa hugot nga pagtuo. Unsa ang kalainan nga nahimo niini nga mga kamatuoran diha sa atong relasyon sa atong Langitnong Amahan ug ni Jesukristo? Tingali ang mga sakop sa klase mahimong mopaambit kon sa unsang paagi ang Mga Artikulo sa Hugot nga Pagtuo nakapalambo sa ilang pagtuon sa ebanghelyo o nakatabang kanila sa pagpaambit sa ebanghelyo ngadto sa uban.

Mga Artikulo sa Hugot nga Pagtuo 1:9; Mga Opisyal nga Pahayag 1 ug 2

Ang Simbahan ni Jesukristo gigiyahan sa pagpadayag.

• Nganong ang nagpadayon nga pagpadayag importante man kanato? Dapita ang mga sakop sa klase sa pagpaambit sa ilang mga pagbati mahitungod niini nga pangutana. Ang mga sakop sa klase mahimo usab nga maghisgot kon sa unsang paagi ang baruganan sa nagpadayon nga pagpadayag adunay kalabutan sa Mga Opisyal nga Pahayag 1 ug 2. (Ang Outline niini nga semana sa Dali, Sunod Kanako—Alang sa mga Indibidwal ug mga Pamilya nagsugyot og makatabang nga mga kapanguhaan kalabut niini nga mga pagpadayag.) Unsa ang atong makat-unan gikan sa Mga Opisyal nga Pahayag 1 ug 2 mahitungod sa tahas sa pagpadayag sa paggiya sa Simbahan? (tan-awa usab sa Mga Artikulo sa Hugot nga Pagtuo 1:9 ug ang pamahayag ni Presidente Gordon B. Hinckley diha sa “Dugang nga mga Kapanguhaan”). Unsa pang uban nga mga ehemplo sa nagpadayon nga pagpadayag ang mahunahunaan sa mga sakop sa klase? Sa unsang paagi kini nga mga pagpadayag nakaimpluwensya sa atong kinabuhi ug makatabang nato sa pagtukod sa gingharian sa Langitnong Amahan?

• Ikonsiderar ang pagdapit sa mga sakop sa klase sa pagribyu sa Mga Opisyal nga Pahayag 1 ug 2 ug sa pagpaambit og usa ka butang gikan niini nga mga pagpadayag nga tingali makatabang sa usa ka tawo kinsa nanlimbasug sa pagdawat sa bag-o nga kausaban sa polisiya, pagpadayag, o doktrina sa Simbahan. Sa unsang paagi ang mga sakop sa klase nakakat-on sa pagsalig sa Dios sa dihang nanlimbasug sila kalabut sa usa ka butang diha sa Simbahan? Sa unsang paagi ang ilang pagtuon niining semanaha nakalig-on sa ilang pagtuo nga ang Ginoo mao ang nangulo sa Iyang Simbahan? Ang mga panabut gikan ni Presidente Dieter F. Uchtdorf diha sa “Dugang nga mga Kapanguhaan” mahimong makatabang usab.

  

  Wilford Woodruff, ni H. E. Peterson

Dugang nga mga Kapanguhaan

“Ang Espiritu sa Dios anaa didto.”

Si Presidente Gordon B. Hinckley nag-alagad isip sakop sa Korum sa Napulog Duha ka mga Apostoles sa dihang ang pinadayag nga gihulagway diha sa Opisyal nga Pahayag 2 nadawat. Paglabay sa katuigan iyang gihulagway ang iyang kasinatian:

“Adunay tinahud ug nabalaan nga palibut diha sa kwarto. Alang kanako, mabati nga daw adunay agianan nga naabli tali sa langitnong trono ug sa nagluhod, nangamuyo nga propeta sa Dios kinsa giubanan sa iyang mga Kaigsoonan. Ang Espiritu sa Dios anaa didto. Ug pinaagi sa gahum sa Espiritu Santo dihay miabut niana nga propeta nga usa ka kasiguroan nga ang butang nga iyang giampo husto, nga ang panahon miabut na, ug nga karon ang talagsaon nga mga panalangin sa pagkapari kinahanglang ihatag sa takus nga mga lalaki bisan asa sa walay pagsapayan sa kaliwatan.

“Ang matag usa nianang nag-alirong nga mga lalaki, pinaagi sa gahum sa Espiritu Santo, nasayud sa samang butang.

“Usa kadto ka hilum ug halangdon nga okasyon. … Walay tingog nga madungog sa among pisikal nga mga dunggan. Apan ang tingog sa Espiritu mihunghong uban sa kasiguroan ngadto sa among mga hunahuna ug sa amo mismong mga kalag” (“Priesthood Restoration,” Ensign, Okt. 1988, 70).

“Natural lang nga dunay mga pangutana.”

Si Presidente Dieter F. Uchtdorf misulti sa mosunod ngadto niadtong adunay mga pagduhaduha mahitungod sa kasaysayan o doktrina sa Simbahan:

“Natural lang nga dunay mga pangutana—ang gamayng liso sa matinuorong pangutana sagad mogitib ug mohingkod sa pagkadakong kahoy sa panabut. Dunay pipila ka miyembro sa Simbahan kinsa, sa usa ka higayon, wala makasulay og seryuso o sensitibong mga pangutana. Usa sa mga katuyoan sa Simbahan mao ang pag-alima ug pag-ugmad sa liso sa pagtuo—bisan sa balason nga yuta sa pagduhaduha ug kawalay kasiguroan. Ang hugot nga pagtuo molaum sa mga butang diin dili makita diin mga tinuod.

“Busa, mga kaigsoonan—akong mga higala—palihug, duhaduhai una ang inyong pagduhaduha sa dili pa mo magduhaduha sa inyong pagtuo. Dili gayud nato tugutan nga himoon kitang binilanggo sa atong pagduhaduha ug ilayo kita sa diosnong gugma, kalinaw, ug mga gasa nga moabut pinaagi sa pagtuo kang Ginoong Jesukristo” (“Dali, Pakig-uban Kanamo,” Liahona, Nob. 2013, 23; tan-awa usab sa Lawrence E. Corbridge, “Stand Forever” [debosyonal sa Brigham Young University, Ene. 22, 2019], speeches.byu.edu).

Pagpalambo sa Atong Pagtudlo

OK ra nga moingon og, “Wala ko kahibalo.” Bisan kon kinahanglan nimong paningkamutan nga motabang sa mga sakop sa klase nga matubag ang ilang mga pangutana mahitungod sa ebanghelyo, ang Ginoo wala magdahum nga nakahibalo ka sa tanan. Kon wala ka mahibalo unsaon pagtubag sa usa ka butang, angkona kini. Dayon giyahi ang imong mga tigkat-on ngadto sa gipadayag nga doktrina, ug pagpahayag og sinserong pagpamatuod sa unsay imong nahibaloan. (Tan-awa sa Pagtudlo sumala sa Pamaagi sa Manluluwas, 24.)